3
የሱሳ ኩሸ ስላ አꬃ ፓꬄዛ
(ማቶ. 12:9-14፤ ሉቃ. 6:6-11)
1 የሱሳ አይሁድታይ ዎሳ ኬꬅ ማቂ ገሌዛ። ኤዛይዳ ኩሸ ስሌዝ ፐቲ አꬃይ የዛ። 2 ፐቲ ፐቲ አሳይ የሱሳ ሞቶዳይስ ኮዪ፥ ኩሸ ስሌዝ አꬃ ማላ ጋላስ ኤ ፓꬆዳዛኮኔ አሾዳዛኮ በአዳይስ ኮዪ ሚንጊ ናግዛ። 3 የሱሳ ኩሸ ስሌዝ አꬃ፥ «ደንዲ Ꮊና ይኢ ኑ ጋንጨ ኤቆባ» ዬጌዛ። 4 የይፕ ጉየ፥ አስታይኮ፥ «ማላ ጋላስ ሎኦ ባዝ ኦꬅዛይ ዎጋኔ ኢታ ባዝ ኦꬅዛይ ዎጋ? አስ ሸምፖ አሾኔ ዎꬎ?» ዬጊ ኦይጬዛ።
ዝን አሳይ ስኤ ጌዛ። 5 የሱሳ ሸንቲ ኡንታን ፋ ካላይር የዝታ ዳኪ ብኢ፥ ኡ ዎዝና ዶጬዝታ ማቄዝ ግሾስ ኡንታን ካጬዛ። ያ አꬃይኮ፥ «ነ ኩሻ ፕድ ኡዶባ» ዬጌዛ። አꬃይ ፕድ ኡድን ኤ ኩሽታይ ፓጼዛ። 6 ኤልሲ ፈርሳዋይ አይሁድታይ ዎሳ ኬꬃፕ ባለ ከዚ፥ የሱሳና ዋይዚ ዎꬎዳዛኮ ቶቦዳይስ ሄሮዶሳ ባግታይር ፐቲ ካራ ሺቄዛ።
አሳይ የሱሳኮ ሺቄዛ
7 የሱሳ ፋ ታማርታይር ጋልላ አባ ላንቀ Ꮊንጌዛ። ጋልላፐራ ይሁዳፕ የኤዝ ጋመ አሳይ ኤዛ ካሌዛ። 8 ማካ የሩሳላመፕ፥ ኤዶማሳፕ፥ ዮርዳኖሳ ሃꬅ ፕንꬃፐ፥ ጽሮሳ ካታማፐር ስዶና ግዝ ካታማፕ የሱሳ ኦꬄዝ ባዝታ ስኢ፥ ጋመ አሳይ ኤዝኮ የኤዛ። 9 ሺቄዝ አሳይ ጋመትꬃይፕ ደንዴዛይድ ኤዛ ዋይꬃም ጋርክ ኤ ታማርታይ ዎጎሎ ኤዝስ ሎእꬆዳይ ጋርክ አዛዜዛ። ማር. 4:1፤ ሉቃ. 5:1-3 10 ጋመ አስታ ኤ ፓꬄዝ ግሾስ ሀርግንትዛ አሳይ ኡቢታይ ኤዛ ቦቾዳይስ ኡርቅንትዛ። 11 ቱና አያና አይኬዝ አስታይ ኤዛ በኤዛን ጋርክ ኤ ቲና ጹጉኒ፥ ፋ ቃላ ꬎቅ ኡዲ፥ «ነ ጾስ ናአያ ባሳ?» ዬጌዛ።
12 የሱሳ ኡንታን ፋ ሱንꬃ ኦስካ ኦዳማይ ጋርክ ሚንꬂ አዛዜዛ።
የሱሳ ታጶ ናምኢ ሀዋርታ ዶሬዛ
(ማቶ. 10:1-4፤ ሉቃ. 6:12-16)
13 የሱሳ ደረል አፋ ከዚ፥ ፋ ኮዤዝ አስታ ፋኮ ጼጌዛ፤ ኡንትካ ኤዝኮ Ꮊንጌዛ። 14 ኡንትካ ፓር የዞዳይ ጋርከኔ ቃላ ታማርሶዳይ ጋርክ ታጶ ናምእታ ዶሪ፥ ኡንታን፥ «ሀዋርታ»*ሀዋረ፦ ሀዋረ ጉሳይ ኪትንቴዝ አስ ጉሲ። ግ ጼጌዛ። 15 ቱና አያንታካ ከሶዳይ ጋርክ ኡንትስ ማዉተ እንጌዛ።
16 ኤ ዶሬዝ ታጶ ናምእታይ Ꮊይትታ፦ ጵጽሮሳ ዬግንቲ ጼግንትዝ ስሞና፥ 17 ቦአነርገሰ (ዳዳ ናእታ) ዬጊ ሱንꬅ ጋዴዝታ፥ ዛብዶሳ ናእታ ያይቆባራኔ ያይቆባ እሻ ዋንሳ፥ 18 እንድራሰ፥ ፍልጶሳ፥ ባርቶሎሞሳ፥ ማቶሳ፥ ቶማሳ፥ ኢልፎሳ ናአ ያይቆባ፥ ታዶሳ፥ ካናነፕ ማቄዝ ስሞናራኔ፥ 19 የሱሳ ኣꬂ እንጌዝ አስቆሮቶ ይሁዳ።
የሱሳራኔ ብኤልዘቡላር
(ማቶ. 12:22-32፤ ሉቃ. 11:14-23፤ 12:10)
20 የይፕ ጉየ፥ የሱሳ ካራ ገሌዛ። ማ ጋመ አሳይ ሺቅን፥ ኤዛራ ኤ ታማርታይ ሀራ አቶዝን ካꬃ ማዳይስካ ዳንዳኤካያ። 21 አሳይ ኤዛ፥ «ኤይዛ» ግዝ ግሾስ ኤ ዳብታይ የያ ስኢ ኤዛ አይኮዳይስ Ꮊንጌዛ።
22 ህገ አስታማርታይፕ ፐታይ ፐታይ የሩሳላመፕ ይኢ፥ «ኤዛል አፋ ብኤልዘቡላ የዛ»፥ ኤ፥ «ጻላሄ ዎልቃር ጻላሄ አያንታ ከስዛ» ዬጊ ዎላ ኦድንቴዛ። ማቶ. 9:34፤ 10:25
23 የሱሳ አስታ ፋኮ ጼጊ ኣዝሶ ኦዴዛ። «ጻላሄ ጻላሄ ዋይዚ ከሶዳይስ ዳንዳኤ? 24 ፐቲ ካተትꬃይ ፋ ጋንጨ ሻኮ ከስኮ ያ ካተትꬃይ ኤቆዳይስ ዳንዳኦያ። 25 የይ ጋርክ፥ ፐቲ ካራ አሳይካ ዎል ጋንጨ ሻኮ መꬍኮ ꬋቦዳይፕ አትን የዞዳይስ ዳንዳኦያ። 26 ይኬ፥ ጻላሄ ዎልር ሞርክንቲ ዱጽኮ ꬋቦዳይፕ አትን የዞዳይስ ዳንዳኦያ።
27 «ዝን ቲናቲ ዎልቃማ አꬃ አጨካዛር ኤ ካራ ገሊ፥ ኤ ሻላ ቦንቆዳይስ ዳንዳእዛ አሲ ባያ። አጪ ማቄዛይፕ ኤ ካራ ቦንቆዳይስ ዳንዳእዛ።
28 «ታ ይንትስ ቱሮ ኦድዛ፤ ጾሲ አስ ናእታይስ ናጋራ ኡባኔ ኡ ጫዤዝ ጫሽ ኡባ አቶ ጎዳ። 29 ዝን ጌሻ አያናል አፋ ኢታ ባዝ ኦድንትዛ ኦስካ መꬍናስ ናጋራ ማቆዳይፕ አትን ጾሲ ኡባራካ ኤዛ ማራሚ» ዬጌዛ። ሉቃ. 12:10 30 የሱሳ የያ ጌዛይ፥ አሳይ፥ «ኤዛል አፋ ቱና አያና የዛ» ዬጌዝ ግሾሲ።
የሱሳ እንዳትራኔ ኤ እሽታ
(ማቶ. 12:46-50፤ ሉቃ. 8:19-21)
31 ኤ እንዳትኔ ኤ እሽታይ ይኢ ባለ ኤቂ፥ ኤዛ ጼግሴዛ። 32 ኤ ላንቀ በቴዝ ጋመ አስታይ፥ «ነ እንዳትራኔ ነ እሽታይር ባለ ኤቂ ነና ኮይዛ» ዬጌዛ።
33 የሱሳ ማሂ፥ «ታ እንዳት ኦኖ? ማ ታ እሽታይ ኣይታ?» ዬጌዛ። 34 ፋ ካለ በቴዝ አሳ ዩዪ ብኢ፥ «ታ እንዳትኔ ታ እሽታይ Ꮊይትታ። 35 ጾስ አዛዞ ኦꬅዝ ኡቢታይ ታ እሸ፥ ታ ምሾ ታ ኣዮ» ዬጌዛ።