15
የሱሳና ጵላጾሳኮ ካንጌዛ
(ማቶ. 27:1-2፥ 11-14፤ ሉቃ. 23:1-5፤ ዋን. 18:28-38)
1 ዎንት ጉር ኤልሲ ቄሰ ሀላቅታይ፥ ጭምታይ፥ ህገ አስታማርታይኔ ፕርደ ሻንጎ ኡቢታይ ሺቂ ቶቤዛ። ኡ የሱሳና አጪ ካንጊ ጵላጾሳስ ኣꬂ እንጌዛ።
2 ጵላጾሳ ኤዝኮ፥ «ነ አይሁድታይስ ካቶ?» ዬጊ ኦይጬዛ።
የሱሳ ማሂ፥ «ነ ጌዛ» ዬጌዛ።
3 ቄሰ ሀላቅታይ የሱሳና ጋመ ባዛ ሞቴዛ። 4 ዝን ጵላጾሳ ማሂ የሱሳኮ፥ «ኔስ ማህዝባዝ ባሳ? ኡ ኔል አፋ አብ ጋርክ ሞቶ ክእዛኮ በአሞ?» ዬጌዛ።
5 ዝን የሱሳ ሀራ ባዝ ማሃም እጽን፥ ጵላጾሳ ማላባዝ ጌዛ።
የሱሳና Ꮊይቆ ግ ፕርዴዛ
(ማቶ. 27:15-26፤ ሉቃ. 23:13-25፤ ዋን. 18:39-40፤ 19:1-16)
6 ጵላጾሳስ ፓዝቃ ባለ ቦንችዛ ጋላስ አስታይ ኮይዝ ፐቲ አꬃ አቻፕ ብልእዝ ዎጋ የዛ። 7 የ ዎደ ፐቲ ባእርባና ግዝ አꬃይ ዳፋ ከሲ ሸምፖ ዎꬌዝ አስታይር ዎላ አች ካራ የዛ። 8 ጋመ አስታይ ጵላጾሳክ ይኢ ካሴሳይ ጋርክ ኦꬆድ ጋርክ ኤዛ ኦይጬዛ። 9 ጵላጾሳ አሳና ማሂ፥ «ታ ይንትስ አይሁድታይ ካታ ብልኦዳና ኮይኔ?» ዬጊ ኦይጬዛ። 10 Ꮊ ኤ ጌዛይ፥ ቄሰ ሀላቅታይ የሱሳ ቅናተ ኣꬂ እንጌዛና ኤርዝ ግሾሲ።
11 ዝን ቄሰ ሀላቅታይ ባእርባና ብሎዳይ ጋርክ፥ የ ሺቄዝ አስታይ ጵላጾሳ ዎሶዳይ ጋርክ አስታ ደንꬅꬄዛ። 12 ጵላጾሳ ማሂ፥ «የዝን፥ ይ አይሁደ ካተ ግዛና ዋይሳዳይ ጋርክ ኮዬ?» ዬጌዛ።
13 አስታይ ጵላጾሳል አፋ ኡኪ፥ «ማዝቃለል አፋ ኤዛ ሶቶባ» ዬጌዛ።
14 ጵላጾሳ አሳይኮ፥ «አብሶ? ኤ አብ ኢታ ባዝ ኦꬄኔ?» ዬጌዛ።
ዝን አሳይ ቲናሳይፕ ጉጂ ኡኪ፥ «ማዝቃለል አፋ ኤዛ ሶቶባ» ዬጌዛ።
15 ጵላጾሳ አሳ ኡፋይሶዳይስ ኮዪ፥ ባእርባና አሳይስ ብልኤዛ፤ የይፕ የሱሳና አላንጊ፥ ማዝቃለል አፋ ሶቶዳይ ጋርክ ኣꬂ እንጌዛ።
ዎታዳርታይ የሱሳና ቶቼዛ
(ማቶ. 27:27-31፤ ዋን. 19:2-3)
16 የይፕ ጉየ፥ ዎታዳርታይ የሱሳ ፕራይቶራ ግንትዝ ዎታዳርታይ ዛባ ኤኪ ካንጊ፥ ሀራ ዎታዳርታ ኡባ ጼግሴዛ። 17 ማ ዞቆ አፍላ ኤዛ ማእሴዛ፤ አንጉꬅ ዛዉደ ኮቺ፥ ኤ ኦማይድ ጋዴዛ። 18 የይፕ ጉየ፥ ኤዝኮ፥ «አይሁድታይ ካታዮ ሳሮ» ዬጊ፥ ኤስ ኩሸ ደንꬄዛ። 19 ኤ ኦማይድ ጉፈር ሾጬዛ፤ ማ ኤዛል አፋ ጩቴዛ፤ ጹጉኒ ኤስ ጎይኔዛ። 20 ኤዛ ለቄዛይፕ ጉየ ዞቆ አፍላ ኤፕ ቃሪ ኤኪ፥ ኤ አፍላ ኤዛ ማእስ ማዝቃለል አፋ ኤዛ ሶቶዳይስ ኤኪ ካንጌዛ።
የሱሳና ሶቴዛ
(ማቶ. 27:32-44፤ ሉቃ. 23:26-43፤ ዋን. 19:17-27)
21 ኡ Ꮊንግታር፥ ኢስክንድረራኔ ሩፎሳ ኣዳ፥ ስሞና ግዝ ቀረና ጋደ አስ፥ ጋጻረፕ ካታማ ይእዛና ሄሊ፥ የሱሳ ማዝቃላና ዎልቃንꬂ ቶሴዛ። ኦሮ. 16:13 22 ዬዚ ጎልጎታ ግዝ አቆ የሱሳ ካንጌዛ። «ጎልጎታ» ጉሳይ «ኦማ ኦታ» ጉሲ። 23 ካርበ ግዝ ꬋለር ዋላክንቴዝ ዎይነ ኡዦ ግ ኤስ እንጌዛ። ዝን ኤ ኡዣም እጼዛ። 24 ኡ ማዝቃለል አፋ ኤዛ ሶቴዛይፕ ጉየ ኦና አቢ ሄሎዳዛኮ ግ ኤ አፍላይል ዎላ እጻ ኦሊ ሻግንቲ ኤኬዛ።
25 ኡ ማዝቃለል አፋ ኤዛ ሶቶዳር ዎንታፕ ሀይꬒ ሳተ። 26 ኡንቲ፥ «አይሁድታይ ካታ» ዬጊ ኤዛ ሞትዛ ጹፈ ጻፊ ጋዴዛ። 27 የሱሳር ናምኢ ፓንታ ፐታ ኤዝፕ ኡሻች ባጋር Ꮊንካ ኤዝፕ ሀድርስ ባጋር ማዝቃለል አፋ ሶቴዛ። 28 ጌሻ ማጻፈ፥ «ኢታ ባዝ ኦꬄዝ አስታይር ኤ ታይብንቴዛ» ዬግንቴዛይ ፖልንቴዛ። *ኢሳ። 53:12 ብኒ ኩሸር ጻፍንቴዝ ማጻፍታይድ Ꮊ ቁጹራይ ባያ
29 ኦገር ኣꬊዝ አሳይ የሱሳ ቶቺ፥ ፋ ኦማ ኤንእሲ ጫዤዛ፤ «የዝን! ጾስ ካራ ላሊ ሀይꬒ ጋላሳ ጋንጨ ኬጽዛዮ፥ ማዝ. 22:7፤ 109:25፤ ማር. 14:58፤ ዋን. 2:19 30 አን ማዝቃላይፕ ሱለ ዎꬊ ነና አሾባ» ዬጌዛ።
31 የይ ጋርከካ፥ ቄሰ ሀላቅታይ ህገ ታማርስዝታይር ዎላ የሱሳ ቶቺ «Ꮊንክታ አሼዛ፥ ዝን ፋና አሾዳይስ ዳንዳኦያ፤ 32 ኑ ብኢ አማኖድ ጋርክ ክርስቶሳ፥ ኤ እስሬለ ካትዛኮ፥ አን ማዝቃላይፕ Ꮊት ዎꬎ» ዬጌዛ። ማ ሀራ አቶዝን፥ ኤዛር ማዝቃለል አፋ ሶትንቴዝታይካ ኤዛ ቶቼዛ።
የሱሳ Ꮊይቆ
(ማቶ. 27:45-56፤ ሉቃ. 23:44-49፤ ዋን. 19:28-30)
33 ኡሱፑን ሳተፕ አይኪ፥ ኡዱፉን ሳተ ሄሎዳይስ ቢታ ኡባይ ꬉሜዛ። 34 ኡዱፉን ሳተል የሱሳ ፋ ቃላ ꬎቅ ኡዲ፥ «ኤሎሄ፥ ኤሎሄ፥ ላማ ሳባቅታኒ?» ዬጊ ኡኬዛ። የያ ጉሳይ፥ «ታ ጾሳዮ፥ ታ ጾሳዮ፥ ታና አብስ አሼነ?» ጉሲ። ማዝ. 22:1
35 ያ አቃይድ ኤቄዝ አሳይፕ ፐታይ ፐታይ የያ ስኢ፥ «ዬዛኮ፥ ኤላሳ ጼግዛ» ዬጌዛ። 36 የ አሳይፕ ፐታይ ላሲ፥ ዛንዛር ጫላ ዎይነ ኩንꬅ፤ ጉፈ ጼራል ጋዲ፥ «ናጎይታ፤ ኤላሳ ማዝቃላይፕ ኤዛ ዎꬆዳይስ የኦዳዛኮ አን ዎላ በአዳ» ዬጊ የሱሳ ዶናይኮ ኡሾዳይስ ሺሼዛ። ማዝ. 69:21
37 የሱሳ ፋ ቃላ ꬎቅ ኡዲ ኡኪ፥ Ꮊይቄዛ።
38 ጾስ ካራ ሶትንቴዝ ማጋራዣይ ኣፋፕ ሳአ ሄሎዳይስ፥ ናምኢ ከዚ ፐርእንቲ ዎꬌዛ።ከስ 26:31 39 ማዝቃላይፕ ቲና ባጋር ኤዛይድ ኤቄዝ ፐቲ ማቶ ሀላቃይ፥ የሱሳ ዋይዚ Ꮊይቄዛኮ ብኢ «Ꮊ አꬃይ ቱማ ጾስ ናአ» ዬጌዛ።
40 ያ ሃኮር ኤቂ ብእዛ ማችታይ የዛ። ኡ ጋንጨ ማግዴላ ማይራማ፥ ጌዶ ናአ ያይቆባስኔ ዮሳ እንዳት ማይራምራኔ ሳሎምራ የዛ። 41 የ ማች አስታይ የሱሳ ጋልላ ቢታ የዝ ዎደ ኤዛ ካለዝታኔ ኤዛ ሞኬዝታ። ማ የሱሳር ዎላ የሩሳላመ Ꮊንጌዝ ሀራ ጋመ ማች አስታይ ኤዛይድ የዛ። ሉቃ. 8:2-3
የሱሳ ሞግንቴዛ
(ማቶ. 27:57-61፤ ሉቃ. 23:50-56፤ ዋን. 19:38-42)
42-43 ሳአይ ኦማርሴዝ ግሾስ ሺቄዝ አሳይ ጋንጨ ቦንችንቴዝ አይሁደ ሻንግታይፕ ፐታይ፥ ዮሴፋ ግዝ አꬃይ፥ ጾስ ካተትꬃይ የኦዳ ጊታር የዛይ፥ አርማታሳ ካታማ አሳይ የኤዛ። ዎንትꬃ ማላ ዎንትዛ ጋላስ ማቄዝ ግሾ ዮሴፋ ሚንጊ ጵላጾሳክ Ꮊንጊ፥ የሱሳ አሃ ኤኮዳይስ ዎሴዛ። 44 ጵላጾሳካ የሱሳ Ꮊይቃ ስኢ ማላባዝ ጌዛ፤ ማቶ ሀላቃ ጼጊ፥ «ኤ Ꮊይቂ ጋምኤነኔ?» ዬጊ ኦይጬዛ። 45 ጵላጾሳ የሱሳ Ꮊይቃ ማቶ ሀላቃይፕ ስኢ ኤ አሃ ዮሴፋስ እንጌዛ። 46 ዮሴፋ ሞጎ አፍላ ዎንጊ፤ የሱሳ አሃ ማዝቃላይፕ ዎꬂ፥ አፍላር ጻጺ፥ ዛላፕ ዎጭንቴዝ ዱፎ ጋንጨ ሞጌዛ። ማ የ ዱፋይ ዶናይድ ዳማ ሹች ጎልእሲ ጋዴዛ። 47 ማግዴላ ማይራምራ ዮሳ እንዳት ማይራምራ የሱሳ አሃ ኡንቲ አባ ጋድዛኮ ብእዛ።