16
የሱሳ Ꮊይቆፕ ደንዴዛ
(ማቶ. 28:1-8፤ ሉቃ. 24:1-12፤ ዋን. 20:1-10)
1 ማላ ጋላሳይ ኣꬌዛይፕ ጉየ ማግዴላወ ማይራሞ፥ ያይቆባ እንዳት ማይራማኔ ሳሎመ Ꮊንጊ፥ የሱሳ አሃ ትዦዳይስ ሽቶ ዎንጌዛ። 2 ዎጋ ጋላስ ጉራ ዠርክዠርኮ ጻልቀ ከሳዳር፥ ዱፎ Ꮊንጌዛ። 3 ኡ ፋ ጋንጨ ፐታቲ ፐታትራ፥ «ዱፋይ ዶናፕ ኑስ ሹቻ ኦኖ ጎልእሲ ሃሶዳይ?» ዬጊ ዎላ ኦድንቴዛ።
4 ኡ በአዳር የ ዳም አቴዝ ሹቻይ ጎልአልኢ ሀልኤዛና በኤዛ። 5 የሱሳ ሞግንቴዝ ዱፋይ ጋንጨ ገሎዳር ፐቲ የላጋ አꬃይ ቦꬅ አፍላ ማኢ፥ ኡሻች ባጋር በቴዛና ብኢ ዳጋሜዛ።
6 ዝን ኤ ኡንትኮ፥ «ዳጋምፓተ፤ ማዝቃለል አፋ ሶትንቴዝ፥ ናዝረተ የሱሳ ይ ኮይዛና ታ ኤርዛ። ኤ Ꮊይድ ባያ፥ Ꮊይቆፕ ደንዴዛ። ኡ ኤዛ ሞጌዝ አቃ Ꮊያ ቦኦይታ። 7 Ꮊት Ꮊንጊ የሱሳ ታማርታይስኔ ጵጽሮሳስ፥ ‹የሱሳ ይንታፕ ቲናቲ ጋልላ ኣꬍዛ። ኤ ይንትስ ኦዴዛይ ጋርክ ይ ኤዛ ኤዛይድ በአዳ› ዬጊ ኦዶይታ» ዬጌዛ። ማቶ. 26:32፤ ማር. 14:28
8 ማችታይ ያሻር ኩኩርታር ዱፋይፕ ከዚ ላሲ ቅቴዛ። ማ ኡ ያሽቴዝ ግሾስ የያ ኦስካ አብካ ኦደካያ። *ፐቲ ፐቲ ብኒ ማጻፍታይ ማርቆሳ ዎንግለ ታይቦ 8ናል አፋ ኤስዛ። ማ ፐቲ ፐቲ ማጻፍታይ ታይቦ 9-20 ሄሎዳይስ የዝ ቆፋና ጉጆያ። ማቆዝን፥ ታይቦ 8 ካል የዛና ጉጅዛ። የይካ [ማችታይ Ꮊንጊ፥ ኪታንቻይ ኦዴዝ ባዝ ኡባ ጵጽሮሳስኔ ኤዛር የዝታይስ ቃንꬃር ኦዴዛ። የይፕ ጉየ፥ የሱሳ ፋ ታማርታ ጌሽኔ መꬍናስ አሽዛ ዎንግለ ኪታ አዋ ከሳፕ አዋ ገሎ ሄሎዳይስ ኪቴዛ]
የሱሳ ማግዴላ ማይራምስ በንቴዛ
(ማቶ. 28:9-10፤ ዋን. 20:11-18)
9 የሱሳ Ꮊይቆፕ ደንዴዛይፕ ጉየ ዎጋ ጋላስ ጉራ፥ ላፑን ቱና አያንታ እዝፕ ኤ ከሴዝ ማግዴላ ማይራምስ ቲናቲ በንቴዛ። 10 እዛ Ꮊንጊ ቲና ኤዛር የዝታይስ፥ ኡ አዛንታራኔ ዬክታር የዝን ኦዴዛ። 11 ዝን የሱሳ ፓꬅ የዛናኔ እዝስ በንቴዛና ኡ ስኤዝ ዎደ እዛ ግዛ አማነካያ።
የሱሳ ፋ ናምኢ ታማርታይስ በንቴዛ
(ሉቃ. 24:13-35)
12 የይፕ ጉየ፥ ኡንታፕ ናምእታይ ካታማፕ ከዚ Ꮊማዳር፥ ኦገላ የሱሳ ቲናሳይፕ ዱማቲ ኡንትስ በንቴዛ። 13 ኡ ጉየ ማቂ፥ ሀራ አሳይስ ኦዴዛ፥ ዝን ሀራ አሳይካ ኡ ኦዳ ቱማ ጌካያ።
የሱሳ ፋ ታጶ ፐቲ ታማርታይስ በንቴዛ
(ማቶ. 28:16-20፤ ሉቃ. 24:36-49፤ ዋን. 20:19-23፤ ሀዋ. ኦ. 1:6-8)
14 ጉየፕ ታጶ ፐቲ ኤ ታማርታይ ካꬃ ማዳር፥ የሱሳ ኡንትስ በንቴዛ። ኡንትስ አማኖ ባዛይ ግሾኔ Ꮊይቆፕ ኤ ደንዴዛና በኤዝ አሳይ ኦድን ኡ አማናም እጼዛይስ ኤ ኡንታን ቦሬዛ።
15 ኤ ኡንትኮ፥ «ቢታ ኡባይል Ꮊንጊ አስ ኡባይስ ዎንግለ ኦዶይታ። ሀዋ. ኦ. 1:8 16 አማኔዛይኔ ጻማቅንቴዛይ አቶዳ፥ ዝን አማነካዛይ ፕርድንቶዳ። 17 አማንዝታይስ Ꮊ ማላትታይ እንግንቶዳ። ኡ ታ ሱንꬃይር ቱና አያንታ ከሶዳ፥ ኦሮꬅ ዶና ናሾዳ። 18 ኡ ሾሽ አይክኮ ዎይ ዎꬍዛ ባዝ ኡዥኮካ ኡንታን ቆሃሚ። ማ ኡ ፋ ኩሸ ሀርግንቴዝታይል አፋ ጋዲ ኡንታን ፓꬆዳ» ዬጌዛ።
የሱሳ ፑደ ደንዲ ሳሎ ከዜዝ
(ሉቃ. 24:50-53፤ ሀዋ. ኦ. 1:9-11)
19 ጎዳ የሱሳ ታማርታይራ ናሼዛይፕ ጉየ ፑደ ደንዲ ሳሎ ከዜዝ፤ ጾሳፕ ኡሻች ባጋር በቴዛ። ሀዋ. ኦ. 1:9 20 ኤ ታማርታይ Ꮊንጌዝ አቆ ኡባይድ ቃላ ኦዴዛ። ጎዳይካ ኡንታር ዎላ ኦꬅዛ። ኡ ኦድዛ ቃላይ ቱማ ማቄዛ ጾሳይ ኡንትስ እንግዛ ማላይር ፋ ቃላ ሚንꬄዛ።