2 Mambu nyonso yayi me lunga ve na kuzwa mvutu?

Kuzonza mbote lenda sala ti muntu kununga? Ve!

3 Mambu ya nge ya kidi-kidi yina nge ke na kuzonza, ni yawu ke sala ti bantu nyonso kuvwanda swii?

Ntangu nge ke seka bawu, bawu ke talisa ve nge nsoni?

4 Nge me tuba mpe ti: «Ndongosolo ya munu kele ya kulunga,

mu kele ya kuvedila na meso ya nge».

5 Aa! Kana Nzambi zolaka zonzila nge yandi mosi,

kana yandi fungula yinwa ya yandi, samu na kupesa nge mvutu!

6 Kana yandi lakisa nge

- mansweki ya ndwenga yina me lutila mayela,

na yina, nge ke bakula ti,

Nzambi me bumba mwa ndambu ya yimbi ya nge.

7 Nge lenda kuzaba mansweki ya Nzambi?

Nge lenda kuzaba bandilu ya bunene ya Nzambi-Mpungu?

8 Ndwenga ya yandi me lutila kuzangama na dizulu. Yinki nge ke sala?

Yawu me lutila yinda na yinsi ya bantu ya kufwa. Yinki nge ke zaba?

9 Yawu me kulutila ntoto na yinda,

yawu me lutila mubu na nene.

10 Kana yandi luta, kana yandi kangisa muntu na boloko,

kana yandi bokila, nani ke tumama ve?

11 Ya tsyelika, yandi zaba bantu ya luvunu,

yandi ke bakulaka yimbi na nswalu nyonso.

12 Kasi kizoba ke kuma muntu ya ndwenga,

ntangu mbuluku ya mfinda ke kuma kibulu ya bwala.

13 Nge, kana nge pesa ntima ya nge na Nzambi,

kana nge nanguna maboko ya nge na sika ya yandi,

14 kana nge katula yimbi yina kele na maboko ya nge,

mpe kana nge bika ti, kondwa ludedomo kuzinga ve na kati ya yinzo ya nge ya lele,

15 na yina, nge ke vumbula yintu ya nge ata kutala nsoni.

Nge ke telama mbote, nge ke tala boma ve.

16 Nge ke zimbana bampasi yina vwandaka na nge,

nge ke zimbana yawu mutindu ba ke zimbanaka maza yina me tanga mpe me yuma.

17 Luzingu ya nge ke lezima kulutila ntangu yina ke lezimaka na midi,

bampimpa ya nge ke kuma mutindu nsemo ya suka-suka.

18 Nge ke fuluka na kivuvu,

na kutalaka ti luzingu me kuma mbote, nge ke banda na kulalaka na kizunu.

19 Ntangu nge ke lala pongi,

ata muntu ke banda na kuzengaka pongi ya nge,

bantu mingi ke sosa na kuzwa bumbote ya nge.

20 Kasi bantu ya yimbi ke lemba na kwendaka sosa ti ba sadisa bawu,

bawu ke kuzwa ve kiswamunu,

kivuvu yina ke bikana na bawu, ke kaka ni lufwa.