2 Ya tsyelika, beno zaba mambu nyonso!

Ndwenga ke kufwa kintwadi na beno.

3 Munu mpe, mu ke na mayela mutindu beno,

beno me lutila munu ve na mayela.

Nani zaba ve mambu nyonso yina beno me zonza?

4 Mu kele muntu yina ba ke na kuseka na bandiku ya yandi,

ntangu yandi ke sambilaka Nzambi samu ti yandi pesa yandi mvutu,

mu kele muntu ya kudedama, muntu ya kusungama, muntu yina ba ke sekaka!

5 «Kyadi mingi na bamputu.» Ni bamvwama ke tubaka yawu.

Kyadi samu na bantu yina me syelumuka na luzingu.

6 Kasi bayina ke labaka bima ya bantu ke yangalalaka na kizunu na bayinzo ya bawu ya lele,

bayina ke sombolaka Nzambi, bawu kele na lukengolo ya mbote,

bawu yina ke talaka ti, ngolo ya bawu, ke ni nzambi ya bawu.

7 Kasi, mulemvo ya nge, yufula bibulu ya mfinda, mpe bawu ke longa nge yawu.

Yufula bandeke ya mazulu, mpe bawu ke zabisa nge yawu.

8 Yufula na ntoto, yandi ke longisa nge yawu.

Yufula na bambisi ya mubu, bawu ke zabisa nge yawu.

9 Na kati ya nyonso yayi nani zaba ve ti,

ni Yave yidikaka nyonso na diboko ya yandi?

10 Luzingu ya bima nyonso kele na maboko ya yandi,

kiwumunu ya konso muntu kele na maboko ya yandi.

11 Kingana mosi ke tubaka: «Dikutu ke swasikisaka ve mbote mambu,

mutindu yinwa ke swasikisaka madya?

12 Ndwenga kele ya biboba

mpe luzingu ya yinda kele na bantu ya mayela».

13 Kasi ndwenga mpe lulendo kele na sika ya Nzambi,

malongi mpe mayela kele ya yandi.

14 Kana yandi mwangisa, ata muntu lenda kutunga dyaka.

Kana yandi kanga muntu, ata muntu lenda kufungudila yandi.

15 Kana yandi kanga mvula, ntoto nyonso ke yuma.

Kana yandi fungula mvula, yawu ke mwangisa ntoto.

16 Ngolo na ndwenga ke zingaka na sika ya yandi.

Muntu yina ba ke vunaka na yina ke vunaka bampangi, bawu nyonso kele ya yandi.

17 Yandi ke salaka ti, bamfumu ya luyalu kutambula makulu-ngulu,

yandi ke lawukisaka bazuzi.

18 Yandi ke katulaka kimfumu ya bantinu,

mpe yandi ke salaka ti bawu kuma bankole.

19 Yandi ke salaka ti banganga-Nzambi kutambula makulu-ngulu,

yandi ke mwangisaka bimfumu yina me zingila.

20 Yandi ke kangisaka yinwa ya bantu yina ke na bunzonzi ya mbote,

yandi ke katulaka biboba mayela ya kuswasikisa.

21 Yandi ke fwisaka bantwadisi nsoni,

yandi ke bwisaka binwanunu ya bantu ya lulendo.

22 Yandi ke salaka ti mansweki ya kitombe kutalana na pwelele nyonso,

mpe yandi ke lakisaka na pwelele nyonso mpewo ya lufwa.

23 Yandi ke salaka ti bantu ya bayinsi kukuma mingi, mpe yandi ke kufwaka bawu,

yandi ke salaka ti bantu ya bayinsi kumwangana, mpe yandi ke vutulaka dyaka bawu.

24 Yandi ke katulaka mayela na bamfumu ya bayinsi,

yandi ke dyengisaka bawu na yinsi ya kuyuma, kisika yina nzila kele veMga 107.40,

25 mpe bawu ke kwendaka tambula mutindu bampofo na kati ya kitombe, ata kutala nsemo.

Yandi ke dyengisaka bawu mutindu bantu me kola malafu.