1 Mambu nyonso yayi, disu ya munu me tala yawu.

Dikutu ya munu me kuwa yawu, mpe mu me visa yawu.

2 Mambu nyonso yina beno zaba, munu mpe, mu zaba yawu,

beno me lutila munu ve.

3 Kasi munu, mu zola kusolola na Nzambi-Mpungu.

Mu zola kutalisa ti mu me sala ve yimbi na ntadisi ya Nzambi.

4 Beno, beno ke na kuvuna munu,

beno kele banganga ya mpamba.

5 Kana beno lenda kuvwanda swii!

Beno ke kuma mutindu bantu ya ndwenga.

6 Mulemvo ya beno, beno kuwa.

Beno fungula makutu na kuwa mambu ya yinwa ya munu,

mu zola kutalisa ti mu me sala ve yimbi.

7 Beno ke banza ti beno ke sadila Nzambi na kuzonzaka mambu ya luvunu?

Mpe samu na yandi beno ke sadila yandi na luvunu?

8 Ya tsyelika, beno ke vwanda na lweka ya Nzambi na kusalaka yimbi?

Beno kele banzonzi ya Nzambi?

9 Ya ke vwanda mbote samu na beto ti yandi kufyongonina beno?

Beno lenda kuvuna yandi mutindu ba ke vunaka muntu?

10 Kana beno kele ve ya kudedama,

ya tsyelika, yandi ke semba beno.

11 Bunene ya yandi ke na kutalisa ve beno boma?

Nsisi ya yandi ke bwidila beno ve?

12 Malongi ya beno kele mpamba mutindu bombi.

Bamvutu ya beno kele mutindu bima ba yidikaka na kibuma.

13 Beno kanga bayinwa ya beno, beno bika munu!

Mu ke zonza,

yina ke kumina munu, ya kuma ya yawu.

14 Mu me ndima nyonso,

kana mu kufwa, mbote mu kufwa.

15 Yandi kufwa munu,

mu ke na kuvingila kima mosi ve na sika ya yandi.

Kasi mu zola kutalisa ti mu me sala ve yimbi na ntadisi ya yandi.

16 Na kusala mutindu yina, yawu ke sala ti mu vuuka,

samu ti, Nzambi ke ndimaka ve muntu ya bantima zole na ntadisi ya yandi.

17 Beno kuwa, beno kuwa mambu ya munu,

mpe beno fungula makutu na mambu ya munu.

18 Beno bika ti mu nwanina luzingu ya munu.

Mu zaba ti yawu kele luve ya munu.

19 Nani zola kufunda munu?

Kana mu salaka yimbi, mu ke vwanda swii mpe mu ke kufwa.

20 Nzambi pesa munu bima zole,

mu ke kwenda bumbama ve ntama na nge.

21 Katula ntete diboko ya nge na zulu ya munu,

bunsisi ya nge kutalisa dyaka ve munu boma.

22 Na manima, bokila munu mu ke ndima,

to mu ke zonza, nge ke vutula.

23 Wapi lutangu ya masumu mpe ya yimbi yina mu me sala?

Lakisa munu yimbi mpe masumu yina mu me sala.

24 Samu na yinki nge me pesa munu manima?

Samu na yinki nge ke na kutala munu mutindu mbeni ya nge?

25 Nge ke na kuzola kutekitisa dikasa yina mupepe me nata?

Nge ke na kulanda mwa dititi ya nyanga ya kuyuma?

26 Samu ti nge sonikaka mambu ya mpasi mingi samu na munu.

Nge ke na kufutisa munu, yimbi yina mu salaka na buntwenya ya munu.

27 Nge ke na kukanga makulu ya munu na bampanga,

nge ke na kufyongoninaka nyonso yina mu ke na kusalaka!

Nge ke na kulanda mbote-mbote bisika yina mu ke na kutula makulu.

28 Kasi muntu ke bolaka mutindu yinti ya kubwa,

mutindu kinkuti yina banselele me kudya,

to, mutindu kinkuti yina ba me kudya na bankami.