1 Kamhan ya mga oripen nga minsakop di kan Kristo kinahanglan magtahod ka kanirang agaron dazaw waray makatongazaw ka ngaran na Diyos daw ya sindo mahitenged kan Kristo nga indara nita. 2 Kamhan kon may agaron nga minsakop di kan Kristo kinahanglan magtahod ya oripen ka agaron bisan singed ka maglomon di iza daw ya oripen dizan kan Kristo. Kinahanglan dazawen gazed na oripen ya toong pag-alagad kay si Kristo ani di ya insakopan na agaron daw kinaazak disab iza na mga sakop ni Kristo.

Timotiyo, dizan ka mga sakop ni Kristo magtoldo iko kaini nga sindo daw ipasabot mo. 3 Kamhan ya nagatoldo ka sindo nga wara magkaangay ka sindo mahitenged kan Kristo nga kantang tinoohan 4 nagapagarbo iza ka batasan kamhan waray kasabtan naiza ka bisan ono. Naazak gazed iza pagpakiglalis daw pagpakig-away mahitenged ka mga panabaenen lamang. Ani ini ya sinogdan ka batasan nga maarigen daw magalinalis daw magapanaba ka bakak daw makaonga isab ka hena-hena 5 daw makahatag ka kasamok pag-onay nga garing ka mga tao nga minsopak ka sindo na Diyos. Wara disab siran makasabot ka sindo mahitenged kan Kristo. Silaong niran nga ya pagsakop niran kan Kristo ani makahatag kaniran ka dakolang kowarta.

6 Kon tomanen nita ya naazakan na Diyos panaranginan matood kita ka madazaw kon magasaza kita ka bisan ono ya kaazi ta. 7 Kay pagkatao nita waray kantang dara ngarini ka kalibotan. Kay-an ka pagkapatay nita wara disab ya kantang dara bisan ono. 8 Agon kon may makaen daw bado ta anika iton igo di kanta koman ka bohi pen kita. 9 Kamhan ya mga tao nga naazak ka dakolang kowarta magakatintal gazed siran. Kamhan singed ka malit-ag siran ka mga mataed nga binoang nga makadaet daw makaonga kaniran koman daw makapatay isab kaniran kay-an. 10 Ya tao nga naazak ka dakolang kowarta mahimo ya paghinang naiza ka bisan ono nga maonga. Kamhan may mga minbiza ka kanirang pagsakop kan Kristo kay naazak siran ka dakolang kowarta. Kamhan mataed ya kawied niran.

11 Timotiyo, maglikay iko kaiton nga maonga kay iko ya pinili na Diyos ka pag-alagad kanangiza. Agon magpakalaki ko pagtoman ka batasan nga naazakan na Diyos. Hegeten mo ya pagsarig mo kan Kristo. Magmainangazen iko ka mga iba mo. Bisan daegdaegen iko kay si Kristo ya insakopan mo angeten mo. Dazawen mo ya pagdomara mo ka mga tao. 12 Maglimbasog iko pagtoman ka tarabaho nga insarig na Diyos kanmo dazaw antoo ya mga tao kaini nga sindo mahitenged kan Kristo. Kamhan tagan iko ka bag-ong kinabohi nga diri mawara. Kay ani ya tood na Diyos pagpili naiza kanmo ka pagsakop kan Kristo daw pagpanan-og mo mahitenged ka pagsakop mo kan Kristo dizan ka pagpanalinga na mga tao. 13 Kamhan dini ka pagseleng na Diyos nga tag-iza ka tanan kinabohi daw dini ka pagseleng ni Kristo Hisos nga waray kahaldek naiza ka pagpanaba ka matood dizan kan Ponsiyo Pilato nga gobirnador, minsogo hao kanmo. 14 Magtoman gazed iko kaini nga sindo na Diyos, diri ko magsazep dazaw waray makasaway kaini keteb ka pagbalik ni Kristo Hisos nga kantang Ginoo. 15 Andateng matood ya hostong panahon nga pabaliken na Diyos si Kristo kay iza ya nagadomara ka tanan. Madazaw iza. Kamhan iza ya nagaponto ka tanan mga hari daw dato. 16 Iza ka lamang ya waray kamatazen. Nagahela gihapon iza ka masarang kapawa nga diri maaranzan na tao. Sokad kawandini pen daw kawanihen ka waray makakita kanangiza. Iza gazed ya sazaen ta kawanihen ka kay iza ya labaw ka gahem kawanihen ka. Matood ini.

17 Tambagan mo ya mga dato nga diri siran magpagarbo daw diri magsarig ka kanirang kowarta kay diri kita mahagdam kon kon-o iton mawara. Tambagan mo siran ka pagsarig ka Diyos kay onay iza maazak paghatag kanta ka tanan mga madazaw dazaw magasaza kita. 18 Tambagan mo siran ka paghinang ka madazaw pag-onay, diri maereg. Madazaw kon maazak siran paghatag ka tao nga nakolangan daw antabang ka mga nagalised nga tao. 19 Kon ani ini ya batasan niran magadapog siran ka dinapog nga diri madonot kawanihen ka. Tagan sab siran ka bag-ong kinabohi nga matood gazed daw diri mawara.

20 Timotiyo, tomanen mo ya sindo mahitenged kan Kristo nga insarig na Diyos kanmo. Likazan mo ya paglaonglaong nga wara makaangay ka Diyos. Diri ko mag-arani ka mga tao nga magapakahinang nga may dakolang kahagdamanan niran ambaza kay may sazep niran. 21 Mataed ya mga nagahena-hena nga dakola ya kahagdamanan niran piro minbiza di siran ka sindo mahitenged kan Kristo nga tinoohan nita.

Gosto nao nga tabangan kamong tanan na Diyos.