12
1 Genuai Bidigo te po wai,
“Te Israel dabego tigidali sę
te giligade me hulide yali,
te augwa digi dolabo dwai sę yalio.
Te tibo po wabo kolesaga,
me hwįbo kolesaga te augwali tomode
genuai pedelali.
Augwaligo te Asiria dabe dali sę yabo po mia sali.
Me ma, augwa te bisnis sę te ni oliv welgo elama,
te Isipba tolama, te Isip dabego abelali.”
2 Genuai Bidigo te Juda dabe dali po elalubao.
Tama agai te Israel dabeba dwai dene mayu,
te augwa yali sęde usu nama tiaibao wai.
3 Augwa wąį nǫų Jekopgo te aga ama dali hwįani,
te augwa si idago haligade bidibadi tialio.
Nosali Jekop te genuai igulama,
tama agai te God dali hwįai dao. *Gag 25:26
4 Te hwįani side, agai te Godigo ensel
mobo bidi dali pagelama,
tǫba pinayu hwįai, te aga usu si igulama,
ugwaba ela holali.
Tama Jekopgo gela hauwa weyu, te Godiba hanalu,
te aga olo tau sabo wiegi yai homu
kolesaga yao po wali.
Tama gasa sogo Jekopba te Betelde God pedelama,
tama aga dali po miai dao. *Gag 28:10-22; 32:24-26
5 Te Jekop dali po miani God,
aga te Tigidali Bomo Elalubo Genuai Bidi dao.
Dago aga nogi te tiwai wao, Genuai Bidi dao.
6 Tialima, dagego duga Godiba konealubo
po dąų olama, ma begasa asiąo.
Tama dagego aga naga wali mu asiyu,
te po tų ebode te doloba pai kolesaga naga eyu,
tama agai dage tau sabo tonaluiąo.
Te Israel dabego yali dwai sę te genuai mu yai
7 Genuai Bidigo te po wai,
“Te Israel dabe bisnis bidi nigali,
tiali goli augwaligo te bisnis sęde
doloba pai kolesaga me ebeo.
Augwali te Kenan bisnis bidi dabe tobage tiwai pedelai.
Te bidi dabego te augwaligo nai dabe abelagasobode,
te augwali tibo po ola maiabo homu eyu,
tede augwa homu tomode gisugu weyu,
puba hwi po wabo dao.
Augwaligo te nai dabe dolo si me dagalubeo.
8 Tialima, augwaligo te tama po wabo dao,
‘Da te mone bidi pedelalio,’ wabo.
‘Dago doado bage hauwa elalubao.
Tama niwai bidi me deligo te po weyu,
dago te nai wi sabo kolesagade
te mone bidi pedelali me wagobeo.’
Augwaligo te po tama wabo dao.
9 Tiali goli, ena God, te duga Genuai Bidi,
eno te dagego tibo po koneai.
Polobadu eno dage te Isipde selama, odasa asai.
Tialima, eno dagego te wiegi yai be dabe
tagalumainu elama,
te dage ugwa bede ma piagameo wali,
te polobadu eno dage dali te masigi kemi tǫde
te moni nai daa tuabo sogode deliba
gesabidi ununiyu yali tiwai gilama emainu
ma yaibao,” po walio. *Prs 23:42-43
10 “Eno po te profet dabeba olama,
tama te eno nade wabo tiwai
te hauwa nai po augwaliba wali.
Te profet dabego pedauwalidu eno
te Israel dabeba weyu,
te augwaligo dwai kolesaga ebo
te tudiba muiąo po wai dao.
11 Tiali goli, augwaligo te po me odobeo. Menio.
Te Gileatde augwaligo dwai kolesaga hauwa yali,
tama te augwali mu hagawaibao.
Te taun Gilgalde augwaligo te bulmakau
dwai alta dabede ofa yai.
Tialima, te alta dabe te besela sąnama,
te masigi pesage holali te pepeli delide
hania olo elalueibao,” po wai dao.
12 Polobadu mu dago wąį nǫų Jekop
aga ama Isode wi ebaso,
aga te tǫ kantri Mesopotemiaba wi pai.
Tama aga te we sabo homu eyu, tama tiali,
tialima aga te gasa bidigo sipsip tonalubo sę yali,
te bidi aga wegi ma abelainu tama tiai dao.*Gag 29:1-20
13 Tama te Israel dabe Isipde bidali sogo,
Genuai Bidigo te profet me deligo
augwali sigi pomainu tagala palama,
tama augwaligo te Isip taga soali,
te kalabus yali bulu da.
Tama te profetgo augwali bugagia tonaluai dao.*Sai 12:50-51
14 Tiali goli, te Israel dabego
dwai kolesaga hauwa ebaso,
tama Genuai Bidigo wado po dwai mu wai.
Tama augwali isimainao wai.
Te Israel dabego Genuai Bidigo nogide
hagela homu eyu, aiyaba elalubaso,
tialima te agai augwaligo dwai
sęgę sali te sela sągobeo wai.
Godigo te Israel dabe dolaibao wai