53
1 Te Israel hani we bidi dabego te tiwai po wai,
“Dego te megi dago odali pode konealubo homu
dąų
waibawe?
Tama dego Genuai Bidigo te megi yali bomai sę tiwai
ebo suai dawe? * Jon 12:38; Rom 10:16
2 Genuai Bidigo aga sę bidi te olo ni me deli tiwai te
tǫ pesagede pedalumainu ilali.
Awe, aga te ni me deli te wa pai tǫdu
pedalubo tiwai pedalali.
Te sę bidigo nogi meni yai, magi baso meni,
te bidi dabego gedude tonobo sawi isiąwai.
Te agade te bidi dabego godolo elama,
tonabo nai me deli elalusąwai.
3 Te bidi dabego aga tudi ola menama,
te aga begela dolama, te aga godolo mu me isąwai.
Sesemane sogo agade te homu dene me
haniani sęgę pągąnaluali.
Augwaligo aga tudiba mu muanio.
Te dago aga te olo bidi me tonobo tiwai yai dao.”
4 “Te dago tama homu yali,
te Godigo agaba dwai dene mawainu eba homu eyu,
te dwai sę agaba pedalainogo ebao homu yali.
Tiali goli, menio.
Te sę bidigo dago sęgę me dene te agai tolali dao.* Mat 8:17
5 Te dago yali dwai sęgęde naga aga dolali.
Te augwaligo aga dodagia mu elama,
te aga tigi tologola pali,
agai te tolali sęgęde aga da usu ma ilama pedelali,
te da bugagia mu bidibo dao. * 1 Pi 2:24
6 Da tigidali te sipsip besela palama, bilibo tiwai yali,
te da deli deligo te dena digi homu wali bilali.
Tama tibaso, Genuai Bidigo daba
te dene mabo sę yabo usu igi da,
te dena yali dwai sęde wei ponainu yali,
tiali goli aga te tama me tebeo. Menio.
Te dena digi tolabo sęgę te agai aga sę bidiba te sęgę
menama,
tolomainu yai dao.” * 1 Pi 2:25
7 Genuai Bidigo te tiwai po wali, * Te kolesaga koneai bidi dabego bugagia konesiąyu, dego mu te ves 7-9de po wali. Mebago homugo te po Genuai Bidigo wali homu yali, te mebago homugo we bidi po udali homu yai, te mebago homugo te profetgo po wali homu yai dao.
“Te bidi dabego te sę bidiba dwai sę ilali,
tiali goli aga digi aga aiyaba elaluama, te dene tolali.
Te agai po me deli wabeo.
Agai pedauwali pania sali,
te augwaligo sipsip wai sela pelama,
elainu ebo tiwai eyu,
te sipsip augwaligo te nisi poawainogo sela pabo
tiwai yai dao. * Ped 5:6
8 Augwaligo aga odolali mu kalabus elama,
te aga po tų odoboba odasa pali,
te po tųde aga isimainao po wai.
Te augwaligo aga ela muai.
Tama tibaso, aga nosali pedelabo hani
we bidi me pedalugobeo.
Agai te eno we bidi dabego pesage siyu, hasegelama,
te augwa digi tolabo sęgę te agai tolama,
te augwaligo yali dwai sęgę dodoliyu,
te aga isai dao. * Tpi 8:32-33
9 Te augwaligo aga te haniani dwai kolesaga yali bidi
dabe dali me,
te mone doado bage hauwa elaluali bidi dabe dali,
pubulali.
Tiali goli, te aga digi dwai kolesaga deli me isąwai,
te agai tibo po me deli me wabeo,” te po wali.* 1 Pi 2:22
10 Tiali goli, Genuai Bidigo digi aga sę bidi aiyaba
elaluama,
tama agai te dene selama, tolomainu yali,
magi baso meni,
te sę bidigo digi aga bidibo ula mayu,
te we bidi dabego sęgę sela sąbo ofa tiwai ebaso da,
teda aga bidibo sogo te bobobage mu igi pelama,
te aga bulai wąį nǫų wai dabe sueibao.
Te aga yali sęde, te sę bidigo te Genuai Bidigo homugo
yao homu ebo sę ebaso,
te agai te sę bugagia pedalumainu ebo dao.
11 Te aga genuai sęgę tolama da,
nosali te aga wiegi yai nai hauwa pedalubo sulama,
te aga wiegi yai pemene umabo mu yaibao.
Genuai Bidigo te tiwai po wali,
“Eno te doloba pai sę bidi, agai ena bugagia koneai.
Agai te hauwa we bidigo dwai sę yali sęgę tolama,
te kolesagade agai te augwali
doloba pai we bidi pedelaibao.
12 Te we bidi dabego aga
te dwai bidi me deli tonobo tiwai yai.
Tiali goli, aga bidibo ula digi
te olo wę mu gelebo tiwai eyu,
agai te hauwa we bidigo dwai sę yali sęgę tolalio. † Bidi mebago homugo te ede wali po te tiwai begelaibao homu yali. “Agai te dwai sę yali we bidi dabego sęgę selama, te augwa digi tolabo sęgę te agai tolai dao.”
Tama augwali dolidali weyu,
agai te dwai sę ebo we bidi tau siyu,
gedu haluasa po wai dao.
Tama tibaso, eno agaba te genuai bidi dabe tomode
te agaba genuai nogi mawaibao.
Eno te bomai ami bidi dabego te boi hwįnama,
te sali nai dabe agaba dobolama mawaibao,” wali.* Mak 15:28; Luk 22:37
*53:7: Te kolesaga koneai bidi dabego bugagia konesiąyu, dego mu te ves 7-9de po wali. Mebago homugo te po Genuai Bidigo wali homu yali, te mebago homugo we bidi po udali homu yai, te mebago homugo te profetgo po wali homu yai dao.
†53:12: Bidi mebago homugo te ede wali po te tiwai begelaibao homu yali. “Agai te dwai sę yali we bidi dabego sęgę selama, te augwa digi tolabo sęgę te agai tolai dao.”