Bugagia Bidibo Kolesagade Po Asęai Buku
Hasia nedebo tau sabo po
Te Israel dabe augwaligo homude wei ebo kolesaga tama telaluali. Te po pęwadage toga selama pusubo pogo te wiegi yai pusu yai po mu da homu elama, tama te pogo te we bidi dabe augwali bidabo ula dodolama, tama te kolesagago bugagia bidabo page ola mabo dao. Te Inglis pode te tobage pogo pęwadage nogi e tama telalubao, te proverb wabo. Te e bukude da te Wiegila Bugagia Bidibo Kolesaga da, waibao. Augwaligo te tobage po hauwa deliba sisinani, te po dabe da te Israel dabe augwa po ola mabo bidi dabego te gesi ogwa bidi dabe po mobo mayu ola mani dao.
Te podolama elalubo sę te bugagia bidabo pagede te tama sęde augwa nogi poali, te wiegi yai homu kolesaga, me koneani kolesaga ebo dao. Te e tama tiaibao te bugagia gedu dagalama, tonono bilama, te nai dabe dobawaibao. Te e bukude dabolo te tama tiwai sę ola mayu, te wiegi yai homu kolesaga page te koneani kolesaga me ebaso, te konealubo homu dąų olama, tama Genuai Bidide wi eyu, aga dologode bidibaso, te usu dao.
Te e bukude dabolo te wiegila bugagia bidabo te tobage haniani po hauwa dabolo ola mani elalubao. Agai te tama pogo da te dena we wai dali bugagia bidabo sunumi dodolama ola mawai. Te agai dabolo te wiegi yai bisnis yabo sunumi me ola mayu, tama gasa bage dali me bugagia bidimainu yali. Te gesi ogwa bidi dabe bugagia bidimainu mobo mabo po hauwa me elalubao. Augwa te po bugagia odama, tama te dwai hagoma elama po sela sąbo bidi hani dali deliba kisasa bilamu wali. Me badu wali pode e tama po weyu, te dago dena digi dena nogi ugaba selamu wai. Te dena digi dena aiyaba elaluama, tama te magi nai doado bage meni yai bidi dabe tau sabo homu yao.
Te e bukude elalubo po me badugo te Godigo bomai po dąų walobo po elalu, te me badu e tama telalu te wiegi yai homu kolesaga elalu, te kolesaga koneai bidi dabego digi sulama konea peyu, tama augwaligo te dago bidabo ulade tau sabo po pusali. Augwaligo te po tigidali e bukude deliba sisinama asęani, tama da tǫde we bidi te bugagia dolasa bidabo po page dabolo ola mabo dao.
Te dago koneani, Jisasgo te buku godolo homu yali, magi baso meni, te hauwa sogo Jisasgo po te bukude selama, tama agai po pusuyu yai dao.
Te bugagia bidibo kolesaga ola mabo po dabe
1
(Dąį 1–9)
E po da, te Solomongo wiegi yai po dabe dao, te Devitgo ogwa, tama te Israel king bidi dao. * 1 Kin 4:32 Te wiegi yai pogo agai dabolo te wiegi yai homu kolesaga mayu, te dabolo te tigidali sę bugagia dolo mu naga ebo kolesaga ola mawaibao. Tama dago te nai dabede po page odobaso da, teda dago te tobage po page elalubo te koneaibao. Te bukugo wiegi yai pogo da ola mayu, te wiegi yai kolesaga koneai bidi tiwai, me te wiegi yai doloba pai kolesaga wali peyu, te tobage deli tigi poai kolesaga te tigidali bidi dali ebo te kolesagade bilao po elalubao. Tama te bidi mebago te koneai kolesaga dwasianu naga elalubaso da, teda te e pogo te augwali tau selama, te gasagi yai bidi me pedalu, tama agai te koneani wiegi yai kolesaga te gesi bidi dabeba mayu, tama augwaliba te bilibo wiegi yai kolesaga ola mawaibao. Tama te bukugo te kolesaga koneai bidi dabe tau selama, tama augwaligo kolesaga geninama mu selama, tama agai te gasagi yai bidi dabe te wiegi yai sunumi ola mayu, te augwa wali pomainu ebo dao. E bukude elalubo pogo te da tau sobaso, te po digi po begelama wali po, me te po piksa ola mabo po, me te wiegi yai po me te kolesaga koneai bidi dabego geme dualama wabo po page te dago koneaibao.
Te God Genuai Bidide wi eyu, aga dologode bidibo bidi, agai te dwagi yai homu kolesaga page konebo gagalai dao. Me ma, te wiegi yai homu kolesaga elalusiąbo bidi dabe augwaligo te kolesaga konebo skul olama, te wiegi yai kolesaga sabo te hagela homu mu ebo dao. * Jop 28:28; Tib 111:10; Pro 9:10
Te gesi ogwa bidi dabe mobo mayu ola mabo po
Ogwa o, nago te naga ayago mobo mabo po odolama, tama nago idago po me sela sągio. Te augwaligo pogo nage te wiegi yai bidi pedalumainu ilaibao, te nago tobolude te wiegi yai sawi yai au tiwai elama, tama nago magede te sawi yai beli elalubo tiwai yaibao.
10 Ogwa o, te dwai bidi dabe, ma te nai wi sabo bidigo te nagebolo te homu bega sabo po weyu, te dwai kolesaga meba inao po obaso da, teda nago te augwaligo po wali me pigio. 11 Te tobage bidigo te tama po waibao, “Ae, tega, nage da dali aselama, tama da pelama, te bidi meba ela mugi pinao. Da pelama, te sunumi sesegeba geme duala sigi pelama, tama niwai bidi me asobaso, tama dago augwali ela muaibao. Te augwaligo magi dwai sę me isiąbadi digi, te dago homu weigo te naga wali pelama, tama te augwali ela muaibao. 12 Te dago te polo tama mu pedalu, te augwali ela muaibao, te isibo te bidi dabeba polo tama pedelama, tama augwali te isali bidi dabego pesageba pabo tiwai ebo dao. 13 Tama dago te bidi dabego doado bage hauwa selama, tama da deli deligo te dena be pągąnaibao. 14 Nage daba kisasa sagaselama, tama nago me te doado bage hauwa sagameo,” augwaligo te po wabo dao.
15 Ogwa, te dwai bidi dabego te tobage po nageba obaso da, teda nago te augwaligo me odolama, te augwali wali me pelamuo. 16 Te tobage bidi dabego te dwai sę ebo wei mu elama, tama te bidi ela mubao. Augwa te tiwai sę sesemane polo idu, tama augwa toma me nogobeo. 17-18 Te tobage dwai kolesaga ebo bidi dabe augwa te dwai dene mu saibao. Te augwa digi augwa ma tola somainu yabo wa mubo tiwai gilama ebao. Te ba dabe augwa te wiegi yai homu kolesaga elalubao. Te ba me deligo te bidigo wa muani suali da, teda aga tede me habela sogobeo. Tiali goli, te dwai bidi dabe te tiwai egobeo. Augwaligo te dwai kolesaga ebo bomo mu yaibao, tama tiyu, te augwa digi augwa dolobo dao. 19 Te hwįbo bidi dabego, ma te nai wi sabo bidi dabego te kolesaga wali pabo dao, tama tiyu, augwa digi dolaibao. Te augwa wi sali nai dabego te augwali dolobo ąǫ ebo dao.
Te wiegi yai homu kolesaga wali pisąbo we bidi dabe te genuai sęgęgo gegaibao
20 Te wiegi yai doloba pai homu kolesaga te tiwai, te we me deli te sunumi tunu mage dabeba doligi pelama, me te maketba pelama, tama te we bidi dabeba po olama, i wabo tiwai ebo dao. 21 Tama me aga te bidi sisinibo pesage te taunba pabo genuai obo bagulali sunumi pąde doligi pelama me, tama te tigidali pesage te we bidi hauwa bidalubo madi doligi pelama, tama agai te tiwai i wabo, * Pro 8:1-3 22 “Dage te homu kolesaga meni yani hani, dage te tiwai sesemane bidabo homu eba, agawe? Dage te wabo pabo bidi dabe tiwai ebao. Dagego te wiegi yai kolesaga sabo homu wei me isiąma, tama dagego tede posobo po wabo dao. Mena sogo dagego te kolesaga ebo tagalaibawe? 23 Eno dagebolo po bomonama weyu, dagego te dwai kolesaga ebo tagalao po obao. Dagego eno po wali pigi sogo da, teda eno dage ola mayu, tama dageba wiegi yai homu ebo kolesaga magi dao. 24 Eno dage i wali, te enaba asomainu yali, tiali goli dagego hagela yai. 25 Dagego eno wiegi yai po tudiba munama, tama eno dage dodolainu ebo sogo te dagego hagoma ebo dao. 26 Dagego tama tialigo da, teda te eno me eno te dagego ebo kolesaga tobage tiwai yaibao. Tama te genuai sęgęgo dage gegebo sogo, tama dage dolobaso, teda ena gisugu genuai gilama mu weyu, tama dageba dwai posobo po waibao. 27 Te dwai sogo te dageba te bomai wali aselama, te pedalubo tiwai eyu, tama te sęgę me dene tego dage doliyu, te wę gegi page pobegebo tiwai bomai waligo ebo tiwai gilama yaibao.”
28 “Te tama tebo sogo te eno dage tau somainu te dagego ena i waibao, tiali goli eno po wei me ponegobeo. Tama dagego ena gegebo sę ebadi, tiali goli te dagego ena me susiąwai. 29 Dagego te wiegi yai homu kolesaga sabo homu te wei me isiąma, tama dagego te Genuai Bidi dologode bidabo homu me ebeo. 30 Dagego te eno wiegi yai po sela sąnama, tama te eno dage dodolainu ebaso, te dagego ena tudiba muai dao. 31 Tama tialigo da, megi da, te dagego duga yali dwai kolesagago walali du dabe tuao. Awe, dagego haniani dwai sę yabo homu kolesaga yai dao. Megi da, dagego te kolesagago du dabe tulama, tabi pągąwaibao. 32 Magi baso meni. Te wiegi yai homu kolesaga meni yani we bidi dabe augwaligo te ena tudiba munama, tama augwa te kolesagago digi te augwa ela munama, augwa isaibao. Te bidi dabego homugo augwaligo te tigidali nai koneani homu yali, augwali te wabo pabo bidi dabe tiwai ebao. Augwa te homu kolesagade te augwa digi augwa dolobo dao. 33 Tiali goli, te eno poba olo bugagia mubo we bidi da, te augwali bugagia bidaibao. Tama augwa te sęgę me wi me isąwaibao, magi baso meni, augwa koneani, te dwai nai augwaliba me pedalugobe da homu ebo dao,” te wiegi yai homu kolesaga da, te tobage po wabo we me deli tiwai dao.

*1:1: 1 Kin 4:32

*1:7: Jop 28:28; Tib 111:10; Pro 9:10

*1:21: Pro 8:1-3