Godigo dwagi yai po buku Godigo Nogi Ugwaba Sabo Tęąbi Po Wabo Buku Dabe 105

105

God dali aga we bidi augwaligo te po wali

1 Dago Genuai Bidi dali usu da weyu,

tama agai genuai nogi elalubo po

hania pusao.

Dago tigidali tǫde we bidi dali

agai genuai sę yali po pusao.

2 Dago tęąbi po agabolo weyu,

tama aga nogi ugwaba sao.

Tama agai dwagi dwagi yai sę yali hania pusao.

3 Da Genuai Bidi aga hani,

tama dago aga dali dwagi yai homu yao.

Genuai Bidi wali pabo we bidi,

augwaligo homu dwagi yai mu yao.

4 Da Genuai Bidi agai tau somainogo pinao.

Tama da sesemane sogo aga dali pąde bidainogo.

5-6 Dage Abrahamgo wąį dabe,

aga Genuai Bidigo sę bidi,

dage Jekop agai wąį dabe nosali pedelai,

te bidi Godigo dąį muani bidi,

dagego homugo agai polobadu gasagi yai bomo yai

genuai sę yali koneyu,

tama agai te dwai sę ebo bidi dabe

augwali dene mabo,

te kolesaga dagego homugo koneao.

7 Genuai Bidi aga dago God dao.

Agai bomo yai po te tigidali tǫde

we bidibolo mabo po dao.

8 Agai dąų olama muani,

te po sesemane sogo elaluaibao.

Tama agai po me elaluama, nosali pedalobo bidi hanigo

te po odaibao.

9 Polobadu agai Abraham dali

te po augwali si dąų wai, tama

agai te dąų wali po Aisak po wai. *

10 Genuai Bidigo Israel hani dali po dąų wai,

tama te dąų wali po sesemane sogo

me elaluyu, bidada paibao.

Agai te dąų wali po Jekopgo hani dali

dąų wali, te po siligobeo.

11 Agai Jekop dali te po wai,

“Nage eno te Kenan tǫ mawaibao,” wai,

“tama te tǫ naga tǫ, te naga hani dali.” *

12 Godigo we bidi augwali dwasianu hani,

tama augwali gasa bulu we bidi te tǫde bidibo tiwai.

13 Augwali bugagia duabe, augwali dodolama biliyu,

gasa bulude bilama, gasa buluba peyu yai.

Augwali dwasianu sogo tuni bidi me deligo tǫde bidai,

tama augwaligo te tǫ tagalama,

gasa tuni bidi mego tǫba bidigi pai.

14 Tialima, Genuai Bidigo augwali gasa bidi dabego

augwali me dolomainogo ebeo.

Tama agai tuni bidi meba dali wado po weyu,

augwali dali dwai sę me igio wai.

15 Agai te po wali, “Eno te we bidi augwali dąį muai,

augwaligo eno sę emainogo.

Dagego dwai sę augwali dali me elamo dao,” wai.

“Tama dagego eno po pusubo bidi

augwali dologio. Mu menio,” wai. *

16 Genuai Bidigo augwaligo tǫde nasi emainao wai,

tama augwaligo nai tigidali agai sela sąwai.*

17 Tialima, agai Josep

aga polasa pomainogo tagala palai.

Tama aga te Isip bulude bidigi pai.

Augwaligo Josep te olo mu sę ebo bidi

abelebo tiwai yai. *

18 Augwaligo te sen aga sągąde dąų olama kęai,

tama aga sągą dene yai.

Tama augwaligo te genuai ain aga dogonide dąų wai.

19 Tama te tiwai me bidaluai, tama agai pusali po

te mu pedalobo suainogo yai.

Genuai Bidigo po augwalibolo ola mayu,

te Josepgo po mu dao wai. *

20 Tialima, Isip tuni bidi agai bidi me deli tagala palai,

Josep kalabuside bidali tagalama,

buluba asomainogo tiwai.

Awe, te gasa tuni bidi hani tonalubo bidi

agai Josep kalabus yali silama, tagalai. *

21 Tama tuni bidi agai Josep agai

gavman tobolu bidi bidao wai.

Tama Josep aga te Isip gavman polalubo bidi bidai.*

22 Agai te tuni bidigo sę ebo ofisa

bidi dabe augwali agai tonalubo sę yai,

tama agai bomogo te tuni bidi

homu kolesaga ola mabo bidi

dabe agai augwali ola mawai.

23 Nosali Jekop te Isip buluba bidigi pai.*

24 Tama nosali Genuai Bidigo aga we bidi tau selama,

augwaligo wai dabe hauwa ame nai.

Tama agai augwaligo bomogo

boi bidi dabego bomo aiyaba elalumainogo yai.

25 Agai te Isip bidi dabego agai

we bidi dali boi bidi emainogo yai,

tama augwaligo tibo sę agai sę bidi dali yai. *

26 Nosali Genuai Bidigo Moses,

agai sę bidi dąį munama bidai,

te Aron me agai sę bidi muani,

tama augwali si Isip te buluba tagala palai.*

27 Augwali sigo Godigo bomo yai sę yai,

tama augwali sigo gasagi yai

bomo yai sę Isip bulude yai.

28 Tama Godigo augwaligo tǫ

be hulia siyu, mesega sai,

tialima, Isip bidi dabego agai po sela sąwai.*

29 Agai augwaligo ąį tigidali kaneme emainogo begelai,

tama tigidali te ąįde bidali

sųgų tigidali ela silai. *

30 Tama gedeli dabe hauwa pedelama,

augwaligo tǫ pągąna sai,

tama genuai tuni bidigo be tomode

me pągąna sai. *

31 Godigo po olama, tama bolia me,

dina me, hauwa pedelama,

tigidali tǫ, me bulu dabe tigidali mu

pągąna sai. *

32 Agai te tulubage mu augwaligo tǫba tagala palobeo.

Agai te tulubage te talua ge tiwai yai, te tǫba tulaluai,

tama te be sele hauwa ula yai.

33 Agai augwaligo te bono ni du wain me,

ni kaya me, dolai,

tama tigidali ni dabe mu dola silai. *

34 Agai po obadi, te kuli mano dabe pedelai,

te hauwa mu pedelai, dago nedebo usu egobeo wai.

35 Te kuli mano dabe augwaligo

tigidali nai yabe tula silai,

tama augwaligo te bulali nai yabe me

tigidali mu silai. *

36 Tama Godigo Isip hanigo

gomunai ogwa wai dabe tigidali ela muai. *

37 Nosali agai Israel bidi hani augwali

Isip bulu tagalama, augwali odasa pai.

Augwaligo silva, me gol, te me sela pai.

Tigidali Israel we bidi bugagia bidai, me deli dolobeo.

38 Isip hani augwali Israel hani dali wi yai.

Tama Isip hani augwaligo suali,

Israel bidi hani augwali paibaso,

tama augwali dwagi yai homu yai. *

39 Godigo pǫ hauwa ugwadu munama,

aga hani bidi haluai.

Tama hulide agai genuai sia ula munama,

augwali te ulade bidai. *

40 Augwaligo agabolo nai po hanaluai,

tama agai ba dabe augwalibolo mawai,

tama te ba augwali sela tuai.

Agai dagalude giguai nai bret augwali mawai,

tama augwali te nai tulama,

haliga mu pągąwai. *

41 Agai ąį masigide pedela wai.

Tama genuai ąį te masigide pedelama,

tama te ąį masigi kemi wa pai digi te ąį pai,

te genuai ąį bulude asobo tiwai yai.*

42 Agai homugo te polobadu

aga sę bidi Abraham dali dąų wali bomo yai po

homude me konealuai.

43 Tama tiyu, agai we bidi augwali agai

te Isip buludu odasa pai.

Tama augwaligo tęąbi ela peyu,

dwagi yai homu dali pai.

Te we bidi augwali aga digi dąį muyu

sa muai, augwaligo i weyu,

dwagi yai homu elama, augwali pai.

44 Gasa we bidi augwaligo tǫ agai

augwalibolo te tǫ mayu,

tama augwaligo te tǫde elaluali

gi dabe me sai. *

45 Agai tama tiwai, te Israel hani

augwaligo agai tigidali bomo yai

po wali pomainogo tiwai.

Tama Genuai Bidi agai nogi ugwaba sao.