2
पोलु मन्कलोरा बुदते बेसता कबुरतुन पोकुर केवोग़
1-2 मावोर विस्वसिरिर! नना मियगा देवुळता पोल्लोतुन पोकुर कीयलाहि वास मतन अस्के, नावा बुदतुन तोहतना लेह्कान बामनाह वेहवा मतन; मति येसु किर्स्तु ओसो हव्कनागुटाता ओना हामुरि, इवे पोल्लोन सीता कीय्ह्नन इनजोर जिद कीस मतन. 3 ओसो मुने मीवा सहरते वातस्के बेस पोकुर कीयलाह पग़वा मतन, इगा किर्स्तुना सेवा बेद्रम कीकन इनजि रेयते साङसोर मतन.* 2:3 बळयिर 18:9-10, 2 कुरिंततोर 10:10 ऊळाट. 4-5 मीवा विस्वस, मन्कलोरा बुदते आयो, मति देवुळता लावते निलि इनजोरे, नना मीक पोकुर कीयह्पा ओसो वळ्ह्किह्पा, मन्कलोरा लेह्काडा बुदताङ पोल्लोङ वेहच मीक लेसिह केवोन. मति देवुळि तना जीवाता लावते नना वेहतनव पोल्लोन निटम इनजोर तोहता.
देवुळता पोल्लोतुन ताना जीवाये तेळियिह कीस्ता
6 आं! विस्वसते मेग़्कतोरगा बुदताङ पोल्लोन वेहतह्नोमे! मति देवुळतुन पुनवोरा लेह्काडा बुदि आयो, दुनियातोर मुक्यालोरा लेह्काडा बुदि आयो, ओरा राजेम कोनि इंजेके मायलाह आता! 7 मति देवुळताये बुदता पोल्लोतुन वेहतह्नोम. आक्रिते माट ताना संगेन पिसना इनजि अद पोल्लोतुन देवुळि बूमतुन पुटिह केवस्केन विचर कीस तासिस मता. इचानाह पुन्पिह केवा मता, मुनेता कालमते तना पोटातगा तासिस मता. 8 अद ताना बुदता पोल्लोतुन इद दुनियाता मुक्यालोर पुनोर. पुन्ज मतेके बेरा डीसातोग़ सामिन हव्कनागुटातगा मोलाङ कोटिस हव्कोर आवेर. 9-10 मति माक बार अद पोल्लोतुन देवुळि तना जीवाते तोहचीता. देवुळता सास्त्रमतगा इद्रम रासतद मन्ह्ता:
“बोग़े बेस्केन ऊळवव,
बोग़े बेस्केन केंजवव,
बोना बुदते पुटवव, वेहता वावव पोल्लोन,
तन्क जीवा केवालोर मन्कलोरेनाह्क, देवुळि तयर कीस तासता.” ✡ 2:9-10 यशायाह 64:4; 65:17
इनजोर रासतद मन्ह्ता. देवुळता जीवा सबे पोल्लोन पर्ह्किह्ता. देवुळतग्डाङ पुनवव पोल्लोन इंका पर्ह्किह्ता.
11 बह इतेके मन्कना विचरताङ पोल्लोन सिरप ओना जीवाये पुन्ह्ता. अद्रमलेह्काने देवुळता जीवाये, ताना लोप्पाडाङ पोल्लोन पुन्ह्ता. 12 अद तना माक बेचोन देय्वा ईता इनजोर पुनदलाहि तना जीवातुन माक ईता. देवुळ माक ईतद जीवा इद दुनियातग्डा आयो. 13 इदे देय्वाता लोप्पा मन्कलोरा बुदि माक काग़्हो, मति देवुळता जीवा काग़्हता. तानाङ विचर्किन माट अद काग़्हतव पोल्लोने तेळियिह कीस वेहतह्नोम† 2:13 अद काग़्हतव पोल्लोने तेळियिह कीस वेहतह्नोम “अद काग़्हतव पोल्लोन माट पवित्र जीवा वेहतप ताकवालोरिन तेळियिह कीस वेहतह्नोम,” इद अर्तम वने आस्ता.. 14 मति बोग़ मन्कना बुदते ताकिह्तोग़, ओग़ ताना जीवाताङ पोल्लोन केंजोग़. ओग़ अव पोल्लोन बुदलेवव पोल्लोङ इन्ह्तोग़. बाराह्क इतेके, देवुळता जीवातेने अव पोल्लोन बेस-नेह्ना पर्ह्किस ऊळनदु. ओग़ अद्रम केवाह्कु अविस्किन पुनदा पग़वोग़. 15 मति बोग़-बोग़ देवुळता जीवाते ताकलाह आतोग़, ओग़ मन्कल सबे पोल्लोन पर्ह्किस ऊळिह्तोग़. मति ओग़ मन्कना बुदतुन बोग़े दुस्रोग़ मन्कल देवुळता जीवालेवा पुनदा पग़वोग़. 16 देवुळता सास्त्रमतगा रासतप लेह्कान, “सामिन काग़्हता पग़यनाह, तानाङ विचर्किन बोग़ पुनदा पग़यह्तोग़?” ✡ 2:16 यशायाह 40:13 मति बेद्रमता विचर किर्स्तुनगा मन्ह्ता, अद्रमता विचर मयगा मन्ह्ता.