1 “इंजेके जल्दि आयनव पोल्‍लोन नाक माळवालोरिह्‌क तोहचीम,” इनजोर देवुळि अव पोल्‍लोन येसु किर्स्तुह्‌क तोहच मता. येसु किर्स्तु तना देवतुलतुन लोहचि, अविस्किन नाक तोहतोग़. नना योहननन येसुना सेवकनन इंजेके अव पोल्‍लोन रासलाह आतन. 2 नना ऊळतव सबेटविन रासतन. नना रासतव पोल्‍लोङ देवुळताङ आंदुङ. इव पोल्‍लोङ येसु किर्स्तुना लोप्पा साक्सि ईस्ताङ. 3 इव पोल्‍लोङ करल आयनद कगो एवयलाह आता. अदिनेनाह्‌क इव पोल्‍लोन विस्वसिरा मुल केंजनाह जोरते अर्ववाल मन्कल देय्वातोग़! अहे अर्वनदिन केंजिसि, इगा रासतव पोल्‍लोङ वेहतप ताकवालोर मन्कलोर वने देय्वातोरु.

4 नना योहननन, आसिया पटटाङ एळुङ सहर्कना विस्वसिरा मुडेनाह्‌क इव पोल्‍लोङ रासलाह आतन: मुनेताह अमेसा मतदु, इंजेके वने मनदनदु, ओसो वने वायनद देवुळि, ओसो तना राजकुर्सता मुनेह मनदनव तानग्डाङ एळुङ जीवाङ; 5 ओसो देवुळतेनाह्‌क बर्वस लायकता साक्सि एवाल, हामुरताहि जीवा अरवालोरग्डाहि मुनेतोग़, अहे बूमतोर राजालोरिन ताकिह केवाल येसु किर्स्तु, वेरु मीक देय्वा ईयिर, सुकम ईयिर. येसु किर्स्तु माक जीवा कीतोग़ ओसो तना नेतुर पोहचि माक मावा पापमताहि विळ्सिह कीतोग़. 6 कीसि तना राजेमतोर कीतोग़ ओसो तना देवुळबाबाना बूमयालोर कीतोग़. अदिनेनाह्‌क मान ओसो लावु अमेसा-अमेसातुह्‌क ओनाय मनि! आमेन.

7 ऊळाट, येसु किर्स्तु मोयुलते वायलाह आतोग़; सबेटोर ओन ऊळनुर. ओन मोलाङ कोटिस हव्कतोर इंका ऊळनुर. दुनियाताङ सबे जातिनोर ओनेनाह्‌क अर्युल पासोर केयनुर. इंगो आमेन. 8 मुनेताह अमेसा मतदु, इंजेके वने मनदनदु, ओसो वने वायनद, बेरा डीसाता सामि देवुळि इद्रम इन्ह्‌ता: “सबेटविना मोदुल वने ननाये, सबेटविना कोड वने ननाये”*1:8 हिंदीते: “अल्फा और ओमिगा” इन्ह्‌ता.

9 नना योहननन, मीवा ऐंगेटोग़ विस्वसिनन. येसु किर्स्तुनेनाह्‌क माट ऐंगे तिपल आतल. माट ऐंगेन ओना राजेमतोर मन्कलोरल आतल. ओसो ऐंगेन तिपलते दीरा पोस मह्‌नल. नना देवुळता पोल्‍लो ओसो येसुना लोप्पा साक्सि वेहताह्‌कु, नाक सिक्सा ईयलाह सम्दुर नडुम मनदनद पतमुस†1:9 इद पतमुस तोग़ि इंजेटा टर्कि इनदनद देसेमता कचुल मनदनद सम्दुरतगा मन्ह्‌ता. इनदनद तोग़दगा तासिस मतोर.

10 अगा मनदह्‌पा, सामिना दिया ऐतारमते देवुळता जीवाता दळ्म नयगा अरता. अस्के नावा पेग़्केडेके अकुम नेकतप लेह्‌का जोरते वळ्ह्‌कनद केंजतन. 11 अद लेङ नाक इद्रम इता: “निमा ऊळनविन पुस्तकतगा रासिसि, इपिसुस सहर, सुमुरना सहर, पिरगमुन सहर, तुवातिरा सहर, सरदिस सहर, पिलदिलपिया सहर, ओसो लोदिकिया सहर, इव एळुङ सहर्कना विस्वसिरा मुडुह्‌क लोहचीम,” इनजोर इता. 12 इतस्के नाक इद्रम वेहवाल बोग़ इनजोर मिळ्न्दिस ऊळतन. अस्के बंगरताङ एळुङ चिमलि गुटाङ दिसताङ. 13 अविस्‍कना नडुमि माने-मन्कना नडुम पुटटोना✡1:13 दानिय्येल 7:13; मत्याल 8:20 लेह्‌का ओर्वोग़ मन्कल दिसतोग़;‡1:13 माने-मन्कना नडुम पुटटोग़ इतेके येसुये. ओना गेंदे काल्‍कनगा एवनाह नेल बोयिस मता. अर्युलतगा बंगरता नूदे अर्हतद दुपट दोहच मतोग़. 14 ओनाङ केल्‍कु कोंगाबूलाना लेह्‌कान पाड्रि मताङ;§1:14 हिंदीते श्वेत ऊन वरन पाले के से ओनाङ कोंडाङ रगरग आतव किस तळ्मिना लेह्‌का मताङ. 15 ओनाङ नला काल्‍कु कोल्मतगा वाटटद इतुळता लेह्‌कान मिळ्स्किंदुङ. ओना लेङ गोदोग़ उसतप लेह्‌का जोरते नेकिंदु. 16 ओग़ तना तिनळ कयदे एळुङ उकाङ पोस मतोग़. ओना तोडटग्डाहि रेंड बाजेङ वाय्व मनदनद, ओळतद तल्वर कसेग़ पेसिस मता. ओना मोकमि नेक निता पोळ्दलेह्‌का दींचिंदु. 17 नना ओन ऊळिसि मेग़्यतप लेह्‌कान ओनाङ काल्‍कनगा अरतन. अरतस्के ओग़ नावा पोग़ोन तना तिनळ कय तासिस इद्रम इतोग़: “रेयमा! ननाय सुरुतोनन, ननाय मारेंगातोनन; 18 ओसो जीवात मनवानन. नना डोलिस मतन, मति ऊळा! इंजेके अमेसा-अमेसातुह्‌क जीवात मह्‌नन. हानादीपताङ तालम कय्कु नयगाने मन्ह्‌ताङ, ताना अग़दुन तेग़यिसि, हातोरिन तेग़्किह कीयनद अदिकर नयगान मन्ह्‌ता. 19 अदिनेनाह्‌क बेव पोल्‍लोङ निमा ऊळिह्‌निन, बेव आसोर मन्ह्‌ताङ ओसो बेव पया आयनव मन्ह्‌ताङ, अविस्किन इंका रासा. 20 नावा तिनळ कयदे एळुङ उकानु ओसो बंगरताङ एळुङ चिमलि गुटान ऊळतिन. अविस्कनगा उंद पोल्‍लो मकतद मन्ह्‌ता. अद इद्रमि: एळुङ उकाङ इतेक एळुङ सहर्कना विस्वसिरा मुडुन ऊळसोर मनदनव देवतुल्कु आंदुङ. एळुङ चिमलि गुटाङ इतेके एळुङ सहर्कना विस्वसिरा मुल आंदुर.