1 मोळ्कतापया अद तोला सीटटगा मेततव एळुङ वटेनाहि, उंद मेततद वटेतुन गोरे पिला तेंडनद ऊळतन. अद तेंडिह्‌पा नालुङ जन्वर्कनग्डाहि उंद जन्वर “वय” इनजोर इता. ताना लेङ गुळ्न्जतप लेह्‌का मता. 2 इतस्के नना ऊळतन: उंद पांड्रि कोडा मता. ताना पोग़ोन ओर्वोग़ उदिस मतोग़. ओग़ कानविल पोस मतोग़. देवुळि ओन्क राजटोपि ईता. ओग़ तना कोटुलतोरिन मुनेन आरे कीस मतोग़, इंजेके ओसो वने आरे कीयलाहि पोग़ोन देवुळता जागाताहि बूमतेके पेसतोग़.

3 पया मेततद दुस्रा वटेतुन गोरे पिला तेंडटा. अस्के दुस्रा जन्वर, “वय” इनजोर इता. 4 इतस्के रेंगाल कोडा पेसतद नना ऊळतन. ताना पोग़ोन ओर्वोग़ उदिस मतोग़. ओग़ वने बूमतेके पेससोर मतोग़. पूरा बूमतोरिन ओर्विह्‌क-ओर्वोग़ हव्कनाह, ओर्विह्‌क-ओर्वोग़ जग्‍ळम आनाह कीयलाहि देवुळि ओन्क अदिकर ईता. ओन्क उंद बेरा तल्वर कसेग़ वने ईता.

5 पया मेततद मुचा मल्काता वटेतुन गोरे पिला तेंडटा. अस्के ओसो उंद जन्वर, “वय” इनजोर इता. इतस्के कारियल कोडातुन नना ऊळतन. ताना पोग़ोन उदिस मतोग़ किलोकाटा पोस मतोग़. 6 अचोटेने नालुङ जन्वर्कना नडुमताहि उंद लेङ इद्रम इनदनद केंजतन: “उंद दियाता कूलते उंद किलो गोह पिंड दोर्किह्‌ता, अचोके कोताने मूंड किलोङ पांड्रि गोह्‌कना पिंड दोर्किह्‌ता; मति नेय ओसो अंगुर जोमातुन बूळे केमा,” इनजोर अद इता.*6:6तिंडि दोर्को आस्ता, दहा पटिङ एक्वा दारा कीस वमिह्‌तोग़ इनजोर इद वचन वेहतलाह आता.

7 पया मेततद नालुङ मल्काता वटेतुन गोरे पिला तेंडटा. अस्के ओसो उंद जन्वर, “वय” इनजोर इनदनद केंजतन. 8 अस्के मालियल कोडातुन नना ऊळतन. ताना पोग़ोन ओर्वोग़ उदिस मतोग़. ओना पेदिरि हामुर इनजोर मता. ओसो ओना पयाह-पयाह हानादीप मता. इद बूमता नालुङ चेकानग्डाहि, उंद चेकाता मुडुन, लळयते, दुस्कळते, बेमरते, गेळा जन्वर्कने हव्कलाहि, देवुळि ओरिह्‌क अदिकर ईता.

9 ताना पया मेततद एयुङ मल्काता वटेतुन गोरे पिला तेंडटा. अस्के मुने बूमतगा मनदह्‌पा देवुळता पोल्‍लो वेहताह्‌कु, येसुना साक्सि ईताह्‌कु कोटुलतोर हव्किस मतोर. ओराङ आनस्किन दूपम बोळ्सनद जागाता इळ्न नना ऊळतन. 10 अव आनस्क देवुळतुन इद्रम केयताङ: “ए पवित्र मनवानिन, सेतेमतोग़ सामि! बूमतगा माक हव्कतोरिन बेचानाह नेयम केवालेवा, सिक्सा एवालेवा केपसोर मनदकिन?” इनजोर केयताङ. 11 अस्के अव उंद-उंदतुह्‌क पांड्रि गेंदे दोर्कता. पया देवुळि अविस्किन इता, “मीवा ऐंगेटोर विस्वसिर बूमतगा सेवा कीस्तोर. ओरिन वने मीक हव्कतप लेह्‌कान हव्कना मन्ह्‌ता. बेच्वुर डोलना इनजोर नना विचर कीस तासतन, अच्वुर डोलनाह, मीट वने गळ्क केपिस मन्ह्‌टु,” इनजोर इता.

12 पया मेततद आरुङ मल्काता वटेतुन गोरे पिला तेंडटा. अस्के बूम पकाय गल्जतदिन नना ऊळतन. ओसो कारियल गोंगळिता लेह्‌कान पोळ्दु कारियल आता. नेला बार नेतुर लेह्‌का गंज्ता. 13 दूंद वायह्‌पा तोया पंडिङ इळ्न रालना लेह्‌का उकाङ पोग़ोटाहि बूमतगा रालताङ. 14 केततुन उळ्ह्‌तप लेह्‌कान पोग़ोटा बूमि मायता. सबे मेटाङ ओसो सम्दुर नडुम मनदनव तोग़िङ तमाङ जागानाहि जर्गताङ. 15 जर्गतस्के, बूमतोर राजालोर, मुक्यालोर, साय्बलोर, मता मन्कलोर, लावतोर मन्कलोर, ओर्युलतोर, ओर्युल आयवोर, सबेटोर बोर-बोर पांजानगा, बोर-बोर मेटानाङ बंडानगा वितिस मकतोर. 16-17 मकिसि अव मेटानु, कोको-बंडानु इद्रम इतोर, “राजकुर्सितगा उदतदिना ओसो गोरे पिलाता ओङ आसि सबेटोरिन नेयम कीयनद दिया एवता! बोग़े पिस पग़वोग़. अदिनेनाह्‌क मावा पोग़ोन अर्म्हटु, राजकुर्सितगा उदतदिना कयदाहि ओसो गोरे पिलाता ओङताहि माक पिसिह कीम्ह्‌टु,” इनजोर इतोर.