Hill Madia तोहचीतव पोल्‍लोङ 7

देवुळि तना मन्कलोरिन सीना तासिस एग़िह कीस्ता

1 पया नालुङ देवतुल्क अताङ, अन्जि बूमताङ नालुङ मूलानगा निचि, बूमतग्डाङ नालुङ बाजेना वळ्‍दुन रोमिह कीतदिन ऊळतन. अदिह्‌क बूमतगा, सम्दुरतगा, मरानगा मुर्तिय वळ्य कग़्सवा मता.✡ 2 अव नालुङ आस देवतुल्किह्‌क, बूमतगा ओसो सम्दुरतगा, पीळा लोहतलाह अदिकर ईतद मता. पया ओसो उंद देवतुलि, पोळ्‍द पेसनद बाजेताहि पेसिस वायनद ऊळतन. (अदु मन्कलोराङ तला-कपरानगा तासलाह) जीवात मनदनद देवुळता सीनातुन पोस मता.✡ पोसि अव नालुङ आस देवतुल्किन, जोरते इद्रम इता: 3 “रोमाटु! मावा देवुळतुन माळवालोराङ तला-कपरानगा, माट बेचानाह सीना तासोम,✡ अचानाह बूमतगा, सम्दुरतगा, मरानगा पीळा लोहमाट,” इता.✡ 4 अस्के सीना दोर्कतोर लोकुरा लेकातुन नना केंजतन: इस्रयेल लोकुराङ सबे कूळिनाहि, उंद लाक, रेंड वीसाङ, नालुङ अजर्क (1,44,000) मन्कलोरिह्‌क सीना दोर्कता.✡ 5-8 ओर इस्रयेलतोरा बारा कूळिनोर मतोर: यहुदा मुय्तोना कूळि, रूबेन मुय्तोना कूळि, गाद मुय्तोना कूळि, आसेर मुय्तोना कूळि, नप्‍तालि मुय्तोना कूळि, मनसे मुय्तोना कूळि, सिमियोन मुय्तोना कूळि, लेवि मुय्तोना कूळि, इसाकर मुय्तोना कूळि, जाबलुन मुय्तोना कूळि, योसेप मुय्तोना कूळि, बिन्यमिन मुय्तोना कूळि. उंद-उंद कूळतोरग्डाहि बारा अजर्क (12,000) मन्कलोरिह्‌क, इतेके सबेटोर कलियिसि, उंद लाक, रेंड वीसाङ, नालुङ अजर्क (1,44,000) मन्कलोरिह्‌क, देवुळता सीना दोर्कता.

सबे जातिना मुलु देवुळतुन मोळ्किह्‌तोर

9 इव पोल्‍लोङ आतापया, नना ऊळतन: सबे जातिनोर, सबे कूळिनोर, सबे देसेह्‌कनोर, दुस्राङ-दुस्राङ बासाङ वळ्ह्‌कवालोर मन्कलोरा मुलु, राजकुर्सता मुनेह, गोरेपिलाता मुनेह निच मतोर.✡ बोग़े लेक पग़वाह मुल मतोर. मुडा मन्कलोर पांड्रि गेंदेङ उहचि मतोर.✡ ओसो गजर मराताङ कोमाङ पोस मतोर.✡ 10 पोसि गिर्दाते इद्रम केयतोर:

“राजकुर्सतगा उदतद मावा देवुळतिन, ओसो गोरेपिलातिन,

मियग्डाहे मावा पिसमुळ वास्ता!”✡

इनजोर केयतोर. 11 केयिह्‌पा, राजकुर्सता, पेदल्कना ओसो नालुङ दिंचिना✡ सर्ने, सबे देवतुल्कु निच मताङ. पया अव राजकुर्सता मुनेह दंडुम अर्सि, देवुळतुन मोळ्कताङ;✡ ओसो इद्रम इताङ:

12 “आमेन! मावा देवुळिये सबेट्क बेरा,

डीसा तानाये, बुदि तानाये,

तान जोहर कीकल, तान मान ईकल,

अदिकर तानाये, लाव तानाये, आमेन!”✡

इनजोर इताङ.

13 इतस्के पया, अचोटेने पेदल्कनाहि ओर्वोग़ नाक ताल्ह्‌कतोग़, “वेर पांड्रि गेंदेङ उहतोर मन्कलोर बोर आंदुर, बेग्डाह वातोर, पुतिना?” इतोग़. 14 इतस्के, “नना पुनोन बाबा, निमान वेहा” इतन. इतस्के ओग़ इतोग़, “वेर मन्कलोर पकाय गोसा आतोर;✡ मति आक्रि एवनाह आपिस वातोर. गोरेपिलाता नेतुरता मेटे,✡ वेर सिर्तम आसि,✡ डागिललेवोर आतोर.✡

15 अदिनेनाह्‌क वेर इंजेके देवुळता राजकुर्सता मुनेह निच मन्ह्‌तोर.

ताना मंदिरतगा मन्जि, नग़्का पिळ्‍विळ पियल-पोळ्‍द तान माळिह्‌तोर.✡

राजकुर्सतगा उदतदु, वेरा नडुम जागा आसि, वेरिन राका कीयग़ा.✡

16-17 राजकुर्सतगा मनदनद गोरेपिला, वेरिन अग़ तोहतग़ा;

ओसो देवुळता पिसमुळ ईयनद एताङ कनिर्कनगा ओसीयग़ा;✡

अदिनेनाह्‌क इंजेके वेरिह्‌क कग़्व वसो आयग़ा,

एग़ उनडा वसो आयग़ा, एद दल्गो आयग़ा, कांका पोयो आयग़ा.✡

देवुळि तनाय वेराङ सबे तिपल्किन जेक कीसि,

वेराङ सबे कंड्रिन उम्चिसीयग़ा,”✡

इनजोर इतोग़.

✡7:1 7:1 8:7; 9:4

✡7:2 7:2 9:4

✡7:3 7:3 पुटमुळि 4:15; यहेजकेल 9:4,6; तोहचीतव पोल्‍लोङ 13:16; 14:1,9; 20:4; 22:4

✡7:3 7:3 6:6

✡7:4 7:4 14:1,3-4

✡7:9 7:9 5:9-10; 22:3

✡7:9 7:9 3:4-5; 6:11

✡7:9 7:9 लैव्यव्यवस्था 23:40

✡7:10 7:10 देवुळताङ पाटाङ 3:8; तोहचीतव पोल्‍लोङ 12:10; 19:1

✡7:11 7:11 4:6

✡7:11 7:11 4:10

✡7:12 7:12 5:12

✡7:14 7:14 दानिय्येल 12:1; मत्याल 24:21; मार्कल 13:19

✡7:14 7:14 इब्रितोर 9:14; 1 योहन 1:7

✡7:14 7:14 12:11; 22:14

✡7:14 7:13-14 3:4-5

✡7:15 7:15 4:8; 13:6; 22:3

✡7:15 7:15 लैव्यव्यवस्था 26:11; यहेजकेल 37:27; योहन 1:14; तोहचीतव पोल्‍लोङ 21:3

✡7:16-17 7:16-17 देवुळताङ पाटाङ 23:1-3; मत्याल 2:5-6; योहन 4:14; 10:11; तोहचीतव पोल्‍लोङ 14:3-4; 21:6; 22:1,17

✡7:16-17 7:16-17 देवुळताङ पाटाङ 121:5-6; यशायाह 49:10

✡7:16-17 7:16-17 यशायाह 25:8; तोहचीतव पोल्‍लोङ 21:4