13
Sasue dhu lèke
1 Ladhe sèmi jaꞌa bisa padhai lii pake lii aaꞌi-aaꞌi, nèti dhèu rai-haha do, lii nèti ana pajuu Lamatua nèti sorga, te ngaa dènge boe sasue ciki sa ètu dꞌara jaꞌa, kolo-karisi na ngaa? Lii padhai jaꞌa sèra mola mèu lao, sama sèmi babha dhu lii cère-cère, do nuka sèmi dere dhu lii dhèru-dhèru di. 2 Ladhe sèmi jaꞌa dènge karunya ho lole peka lii moa Lamatua mi dhèu unu Na, aa dhu keꞌa aaꞌi rahasia, dènge keꞌa aaꞌi jꞌara-jꞌara dhu dhèu dꞌèlu-mèu se reꞌa, aa ladhe lalèka jaꞌa èra mi Lamatua toke jaꞌa bisa pahari eele ledhe nèti era na, te ngaa jaꞌa dènge boe sasue ciki sa, na, gaguna na ngaa? Rui-jꞌajꞌèra jaꞌa guna boe mi ngaa èci sa.✡Mateos 17:20, 21:21, Markus 11:23 3 Ladhe jaꞌa pahie eele aaꞌi mèdha-panyau jaꞌa, ho sèna ka kabꞌua ra pangaꞌa dhèu unu aadꞌo, do, soro ngiꞌu jaꞌa sèna ka jꞌajꞌi mi korban,*Abhu sasuri lii Yunani, cahagꞌe dhu suri tabha, peka na, “soro ngiꞌu jaꞌa jꞌajꞌi mi korban tunu”. te ngaa ladhe jaꞌa dènge boe sasue ciki sa, gaguna na ngaa? Jaꞌa dènge boe jꞌara dhu tao jaꞌa ngedꞌe. Te sèra sa parcuma! Guna boe ngaa-ngaa.
4 Te sasue èèna, dꞌara taleo.
Sasue èèna, lii mako.
Sasue èèna, dꞌara kura boe.
Sasue èèna, padedha boe iisi.
Sasue èèna, pamone-pabhèni boe.
5 Sasue èèna, lii sakaa boe.
Sasue èèna, neo boe pasegi ngiꞌu unu na.
Sasue èèna, nasa malai boe.
Sasue èèna, tèka boe dꞌara.
6 Sasue èèna, karejꞌe dènge ngaa dhu lèke,
aa dꞌèi boe bia ca bèka.
7 Sasue èèna, taha taruu ètu dꞌara madha jꞌara aaꞌi-aaꞌi.
Sasue èèna, parcaya taruu.
Sasue èèna, sanao-maena taruu.
Sasue èèna, maꞌète boe.
8 Sasue dènge boe too-lane.
Te, ngaa dhu dhèu rèti lii padhai Lamatua peka le, nèbhu-nèbhu parluu heka. Aa dhu dhèu padhai pake lii rupa-rupa, bèli-camèdꞌa parluu heka kahèi. Aa ladhe ngaa dhu dhèu dꞌèlu-mèu sèra reꞌa, nèbhu-nèbhu guna heka kahèi. 9 Limuri ne dhu teꞌa dhoka ciki ooꞌe di. Aa ladhe èdhi jꞌajꞌi dhèu tèti lii padhai Lamatua, èdhi peka dhoka jꞌara dhu dhae tesa mèka. 10 Te ngaa ropa dꞌai ka lodꞌo na, aaꞌi-aaꞌi sèra tesa dheꞌi-dheꞌi. Lodꞌo èèna jꞌara-jꞌara dhu tesa mèka, guna heka mi ngaa èci sa.
11 Conto sèmi: lodꞌo jaꞌa ana iiki era, jaꞌa padhai lii sama sèmi ana iiki. Ngangee jaꞌa sama sèmi mia dhu ana iiki pangee. Te ngaa limuri ne, jaꞌa dhèu eeꞌa le. Nèti èèna ka, tatao jaꞌa sèmi heka ana iiki.
12 Conto leo: limuri ne, èdhi tèdhi rango-rango era, dhae mèu iia mèka, nuka sèmi èdhi ladhe asa dꞌara tèru dhu ahu. Te ngaa nèbhu-nèbhu pe aaꞌi-aaꞌi se mèu aadha-aadha, nuka sèmi èdhi ladhe padètu iiki-iiki ètu madha èdhi. Neꞌe ne, jaꞌa keꞌa dhoka ciki di. Te ngaa nèbhu-nèbhu bisa keꞌa aaꞌi, nuka sèmi Ama Lamatua ladhe madhore dꞌai adhe-usu jaꞌa.
13 De limuri ne, abhu tèlu jꞌara dhu èdhi hudꞌi tao, dhu taha taruu. Nuka:
èdhi hudꞌi parcaya taruu Lamatua;
èdhi sanao-maena taruu, na, pe Lamatua ator aaꞌi-aaꞌi jꞌajꞌi beꞌa;
aa èdhi hudꞌi pasue taruu.
Nèti tèlu jꞌara se, dhu dedha risi ka, sasue. Lula sasue ka dhu hua risi nèti aaꞌi-aaꞌi.
✡13:2 Mateos 17:20, 21:21, Markus 11:23
*13:3 Abhu sasuri lii Yunani, cahagꞌe dhu suri tabha, peka na, “soro ngiꞌu jaꞌa jꞌajꞌi mi korban tunu”.