11
Yesus si maso Yerusalem, ka dhèu ae koa-kio Ne sèmi dhèu kapai èci
(Mateos 21:1-11, Lukas 19:28-40, Yohanis 12:12-19)
1 Ropa ra dètu dènge kota Yerusalem, ka ra dhuli uuru dua rae, ngara na Betfage dènge Betania, ètu sebhe ledhe Saitun.*Ra pangare ledhe na, ‘Saitun’, lula ètu èèna abhu ajꞌu saitun ae dhu ra pacèli hua ne, ho rare èi mènyi. Ledhe Saitun èèna, ele boe kajꞌèu nèngu ca kilometer nèti kota Yerusalem. Ètu èèna, Yesus si mate ciki ooꞌe di. Ka Na pua ana madhutu Na dhèu dua lasi uuru. 2 Na pua si, peka na, “Miu dua mi lami uuru asa dꞌara rae nèi. Ropa miu maso lami, miu mèdhi ana badha keledꞌei ciꞌu, dhu ra èki ètu èèna, dhu dhèu dhae manyaꞌe mèka. Lami ho lècu eele dhari aꞌèki na, ho ère mèti mai asa neꞌe. 3 Te ngaa ladhe dhèu karèi miu, ‘Nga tao ka miu ère mèti ana keledꞌei ne?’ Mi peka dènge si, ‘Lamatua jiꞌi neo pake ne. Ladhe pake nare, na, Na hia hari mai.’ ”
4 Èle èèna ka, ana madhutu Na dhèu dua sèra lasi, ka rèdhi ana keledꞌei ciꞌu dhu èki tèke ètu madha èmu cue ètu sebhe jꞌara. Ra lècu eele dhari èki na, ka ra ère rèti mai. 5 Ka dhèu-dhèu dhu titu ètu èèna, peka na, “We! Nga tao ka miu pakako mèti keledꞌei dhèu?”
6 Ka ra dhaa, peka na, “Lamatua jiꞌi neo pake ne. Ho ladhe Na pake nare, na, jiꞌi ngèti hari mai.” Ka dhèu sèra soro tèke si lasi pakako rèti ana keledꞌei èèna. 7 Hèia ra rèti ana keledꞌei èèna asa Yesus. Ka ra hèle sigꞌi-kalolo rèngu mi dedha keledꞌei, ka Yesus manyaꞌe.
8 Ropa oe maso dꞌara kota, ka dhèu ae rare sigꞌi-kalolo, ka ra hèle mi dedha jꞌara oka-hoo. Dhèu cahagꞌe lasi para rèu palam†Sasuri Markus dhu uuru tèka, peka na, ‘dadana-dadana’. Te ngaa nèti sasuri Yohanis 12:13, èdhi teꞌa, na, rèu palam. Palam neꞌe, oe sèmi nyiu sa, do aadꞌo na hènyi. ètu sebhe jꞌara, ho ra tao mi talora jꞌara oka-hoo. Tatao sèmi èèna na, sama sèmi tadha èci dhu peka na, rèngu pakabꞌua Yesus. 9 Dhèu cahagꞌe kako uru ètu madha Yesus; aa cahagꞌe kako limuri. Ka ra paꞌoo, peka na,
“Hosana! Mai ti koa-kio kolongara Ama Lamatua!‡Lii rèngu peka na ‘Hosana’, sasoa na, sèmi neꞌe ka, ‘mera-milu dènge karejꞌe-karae’. Lii neꞌe, biasa ra pake ho koa-kio Ama Lamatua.
Lamatua hia berkat mi dhèu dhu mai pake kolongara Na,
lula Ama Lamatua hia Ne mai!✡Lii Sodꞌa Koa-Kio 118:26
10 Hosana! Mai ti koa-kio kolongara Ama Lamatua!
Lula Lamatua neo pakèdꞌi hari paredha dhèu aae Daud!
Hosana! Mai ti koa-kio kolongara Ama Lamatua!
Lula Lamatua madhèdi nèdꞌu paredha ètu era dedha risi eele!”
11 Ropa ra dꞌai dꞌara kota, ka Yesus si maso asa madha Èmu Kapua Manèngi-Mangajꞌi. Ka Yesus ladhe palème era Èmu èèna. Te ngaa, lula lodꞌo nihia ae le, ka ra lèpa hari asa rae Betania.
Lamatua Yesus pua ajꞌu èci ho baku hua
(Mateos 21:18-19)
12 Asa bèli madꞌae aae èèna, ka rèngu kalua nèti Betania lasi asa Yerusalem. Dꞌai talora jꞌara ka Yesus manganga. 13 Ka Na ladhe nèdhi ana aajꞌu èci ètu sebhe jꞌara. Hua ajꞌu na, dhu dhèu raꞌa.§Lii Idhonesia peka na, ‘ajꞌu ara’, nèti lii Yunani dhu peka na, sukei. Te ngaa Alkitab peka ajꞌu èci ètu nèi, dhu dhèu raꞌa hua na. Ètu Idhonesia bèka dhimu, dhèu raꞌa boe hua ajꞌu ‘ara’. De ajꞌu ara ètu Alkitab leko-leo dènge ajꞌu ara ètu neꞌe. Yesus laꞌe padètu ho neo neꞌa ajꞌu na, hua do aadꞌo. Na ladhe ajꞌu èèna hua boe cue sa. Te mema dꞌai mèka hèru hua. Rèu heka mare kèna. 14 Ka Yesus peka mi ajꞌu èèna, “Lula èu hia boe Jaꞌa hua, mulai ti deo neꞌe, èu bisa heka hia hua èu asa dhèu leo!”
Ana madhutu Yesus sèra tadèngi Na padhai lii dènge nasa sèmi èèna.
Lamatua Yesus maso asa Èmu Kapua Manèngi-Mangajꞌi, ka Na paꞌele iie era pahia-pahèli
(Mateos 21:12-17, Lukas 19:45-48, Yohanis 2:13-22)
15 Yesus si kako taruu asa Yerusalem, dꞌai nèi ka Yesus maso asa Èmu Kapua Manèngi-Mangajꞌi. Ètu madha Èmu èèna, dhèu tao pasa ho ra pahia koro jꞌaha dhu biasa dhèu pake tao korban ho ra sabajꞌa. Ropa Yesus nèdhi sèmi èèna, ka Na lalèta si asa liꞌu. Na tule eele mei dhu ra pake ho pasilu doi sèra, aa Na tule paguri eele bagu dhu ra pake pahia manu-bhui sa. 16 Ka Yesus kai si aaꞌi-aaꞌi ra, sèna ka ra rèti ia ka mèdha rèngu re dꞌara madha Èmu èèna. 17 Ka Na ajꞌa si, peka na, “Miu meꞌa le lii dhu dhèu nèti lii padhai Ama Lamatua suri tèke le, peka na: ‘Jaꞌa tao èmu neꞌe, sèna ka suku aaꞌi-aaꞌi mai sabajꞌa ètu neꞌe.’ Te ngaa miu tao Èmu ne jꞌajꞌi era pakaboko dhèu parapo.”✡Yesaya 56:7, Yermia 7:11
18 Ropa kètu agama Yahudi dènge mese agama sèra reꞌa rare tatao Yesus sèmi èèna, ka ra nasa dènge Ne. Ka ra tenge jꞌara ho neo pamadhe Ne. Te ngaa ra madhaꞌu, lula dhèu ae dhu dꞌèi lii holo-nori Yesus.
19 Dꞌara lodꞌo cèna sa, Yesus si kalua hari nèti kota Yerusalem lèpa lasi jꞌunu asa rae Betania.
Ladhe miu parcaya dènge dꞌara kateme, Ama Lamatua dhaa lii manèngi miu
(Mateos 21:20-22)
20-21 Bèli madꞌae èèna, Yesus si lasi hari asa Yerusalem. Dꞌai talora jꞌara, ka ra rèdhi ajꞌu dhu Yesus padhai lii medꞌa na. Ka ana madhutu Yesus sèra malaa, lula rèngu rèdhi ajꞌu èèna mango le dꞌai amo. Hèia Petrus sanèdꞌe lii padhai lii Yesus medꞌa na. Ka na peka na, “Ama! Ladhe ku! Ajꞌu dhu Ama dhoo medꞌa na, madhe le!”
22 Yesus dhaa, peka na, “Tareꞌa, we! Sadꞌi miu parcaya Ama Lamatua sèmi èèna, na, jꞌajꞌi kahèi. 23 Ladhe miu parcaya dènge dꞌara kateme, miu bisa pua ledhe hia na pidha asa dꞌara dhasi. Pe Lamatua pidha eele ledhe èèna, sadꞌi miu baku parcaya dènge dꞌara cabèka. Miu parcaya mi Ama Lamatua, hudꞌi dènge dꞌara kateme ku.✡Mateos 17:20, 1 Korintus 13:2 24 Baku bhèlu! Sadꞌi miu parcaya dènge dꞌara kateme, ngaa dhu miu manèngi, tatu Ama Lamatua bisa hia miu. 25 Ladhe dhèu èci sabajꞌa, aa te ngaa na tèka dꞌara era dènge dhèu leo, nèngu hudꞌi laꞌe pabeꞌa uuru ku dènge dhèu èèna. Ladhe miu tao sèmi èèna, Ama miu ètu sorga heka saku eele sasala miu kèna. 26 [Ladhe abhu nèti miu dhu tèka dꞌara dènge dhèu, ho moꞌo boe hia abho, na, tatu Ama miu ètu sorga noꞌo boe pabhèlu eele sasala miu kahèi.”]*Sasuri lii Yunani dhu asli dhu uru tèka, suri boe ayat 26. ✡Mateos 6:14-15
Ra pakarèi hak Lamatua Yesus
(Mateos 21:23-27, Lukas 20:1-8)
27 Èle èèna ka, Yesus si lasi taruu. Ropa dꞌai Yerusalem, ka ra maso hari asa Èmu Kapua Manèngi-Mangajꞌi. Ropa maso asa madha Èmu èèna, kètu agama Yahudi, mese agama, dènge dhèu heka-dhèu heka Yahudi sèra mai, 28 ka ra karèi Yesus, peka na, “Cee ka dhu pua èu mai tao maruru ètu neꞌe medꞌa na? Cee ka hia èu hak!”
29 Te ngaa Yesus neꞌa, na, rèngu neo tenge jꞌara ho pamanahu Ne. Ka Na bꞌala si, peka na, “Jaꞌa neo karèi miu kahèi. Miu dhaa uuru ku Jaꞌa, heka Jaꞌa dhaa miu kèna. 30 Jaꞌa neo karèi miu sèmi neꞌe: miu aaꞌi-aaꞌi mi tadhe Yohanis, tuka sarani èèna, sina ma? Cee ka dhu pua nèngu laꞌe sarani dhèu? Lamatua do, dhèu rai-haha?”
31 Ra pajiko laꞌe-mai, ka ra padhue, peka na, “Eea! Nara èdhi le! Ladhe èdhi dhaa, peka na, ‘Ama Lamatua ka dhu pua Yohanis,’ na bꞌala hari, peka na, ‘Nga tao ka miu parcaya boe Yohanis!’ 32 Te ngaa èdhi bisa boe peka kahèi, na, ‘Dhèu rai-haha dhu pua ne.’ Te aadꞌo na, dhèu ae tao dènge èdhi. Lula dhèu ae parcaya, Yohanis èèna, dhèu nèti lii padhai Ama Lamatua.”
33 Ka ra dhaa, peka na, “Jiꞌi ngeꞌa boe!”
Ka Yesus dhaa hari si, peka na, “Ladhe sèmi èèna, Jaꞌa koꞌo boe peka kahèi, cee ka dhu pua Jaꞌa.”
*11:1 Ra pangare ledhe na, ‘Saitun’, lula ètu èèna abhu ajꞌu saitun ae dhu ra pacèli hua ne, ho rare èi mènyi. Ledhe Saitun èèna, ele boe kajꞌèu nèngu ca kilometer nèti kota Yerusalem.
†11:8 Sasuri Markus dhu uuru tèka, peka na, ‘dadana-dadana’. Te ngaa nèti sasuri Yohanis 12:13, èdhi teꞌa, na, rèu palam. Palam neꞌe, oe sèmi nyiu sa, do aadꞌo na hènyi.
‡11:9 Lii rèngu peka na ‘Hosana’, sasoa na, sèmi neꞌe ka, ‘mera-milu dènge karejꞌe-karae’. Lii neꞌe, biasa ra pake ho koa-kio Ama Lamatua.
✡11:9 Lii Sodꞌa Koa-Kio 118:26
§11:13 Lii Idhonesia peka na, ‘ajꞌu ara’, nèti lii Yunani dhu peka na, sukei. Te ngaa Alkitab peka ajꞌu èci ètu nèi, dhu dhèu raꞌa hua na. Ètu Idhonesia bèka dhimu, dhèu raꞌa boe hua ajꞌu ‘ara’. De ajꞌu ara ètu Alkitab leko-leo dènge ajꞌu ara ètu neꞌe.
✡11:17 Yesaya 56:7, Yermia 7:11
✡11:23 Mateos 17:20, 1 Korintus 13:2
*11:26 Sasuri lii Yunani dhu asli dhu uru tèka, suri boe ayat 26.