17
Ama Lamatua padꞌelo dadedha Lamatua Yesus
(Markus 9:2-13, Lukas 9:28-36)
1 Èle èna lodꞌo, ka Yesus paroa Petrus, Yakobis dènge ari na Yohanis, sèna ka lasi asa ledhe dhu dedha èci, ho pea mesa ra ètu nèi. 2 Dꞌai nèi, ra ladhe na, rupa Yesus leko-leo. Rèhu Na kahaꞌa nuka sèmi madha lodꞌo, aa mèdha-papake Na jꞌajꞌi pudhi kaleꞌe. 3 Kacaꞌa la, rèngu ladhe rèdhi Yesus dhu padhai lii dènge Musa dènge Elia. 4 Hèia Petrus bingu, ka na padhai lii leli, aku nèngu na, “Ama! Jiꞌi karejꞌe titu kèna ètu era neꞌe ne! De beꞌa risi jiꞌi patitu paleo tèlu bua. Cue hia Ama, cue hia Musa, aa cue hari hia Elia.”
5 Lodꞌo Petrus padhai lii sèmi èèna era, cagꞌagꞌa laa, raꞌi-liru puru mai sarimu nare rèngu. Hèia rèngu malaa-maloha tadèngi lii èci dhu kalua nèti dꞌara raꞌi-liru ne, peka na, “Nanene! Yesus ne, Ana pasue Jaꞌa. Nèngu neꞌe ka dhu pakarejꞌe taruu dꞌara Jaꞌa. Nanene Ne paie-iie!”✡2 Petrus 1:17-18, Lii Lolo dhu Uru Tèka 22:2, Lii Sodꞌa Koa-Kio 2:7, Yesaya 42:1, Mateos 3:17, 12:18, Markus 1:11, Lukas 3:22, Lole Hari Jꞌara-jꞌara Mamuri 18:15
6 Ropa tadèngi lii ne, hèia ana madhutu Na madhaꞌu titu kèna, ka ra bèbha sagèbꞌa ètu rai. 7 Te ngaa Yesus mai gai si, ka Na peka na, “Mi kèdꞌi ka, baku madhaꞌu!” 8 Ka ana madhutu se boti kètu ra, te ngaa ra ladhe rèdhi heka dhèu èci sa ètu era èèna, dhoka Yesus di.
9 Èle ka, ra puru nèti ledhe ne. Hèia Yesus kai si, aku Nèngu na, “Ngaa dhu heka ladhe mèdhi deo na, mage peka dènge dhèu èci sa kahèi! Te Jaꞌa Dhèu Rai-haha Tareꞌa-reꞌa ne, hudꞌi madhe uuru ku. Èle èèna, ladhe Jaꞌa mamuri hari, heka miu lole dènge dhèu kèna.”
10 Hèia ra karèi Ne, aku rèngu na, “Ama ne mema Kristus, te ngaa Elia ètu mia? Te mese agama se ajꞌa, peka na, Elia hudꞌi mai uuru ku, èle èèna, heka Kristus mai kèna. Te ngaa madhutu Ama, tasamia?”✡Meliaki 4:5
11 Ka Yesus dhaa, aku Nèngu na, “Mema lèke. Elia hudꞌi mai uuru ku, ho bhoke jꞌara hia Kristus. 12 Nanene paie! Elia mai le, te ngaa dhèu tadhe boe ne. Rèngu pajꞌèra ne, madhutu dadꞌèi ra. Sèmi èèna kahèi, bèli-camèdꞌa rèngu pajꞌèra Jaꞌa, Dhèu Rai-haha Tareꞌa-reꞌa ne.”✡Mateos 11:14
13 Ropa ra tadèngi rare, ana madhutu Na heka reꞌa, na, Elia dhu Yesus peka ne, nuka Yohanis tuka sarani.
Lamatua Yesus paꞌèle ana èci dhu nidhu tao
(Markus 9:14-29, Lukas 9:37-43)
14 Èle ka, ropa rèngu lèpa, paraga dènge dhèu ae dhu mate le. Hèia ama ca dhèu mai patitu kètu urutuu, ka na manèngi Yesus, 15 na peka, “Ama! Sue ku ana jaꞌa la! Te nèngu dhu hujꞌu kahibꞌi, aa na jꞌèra titu kèna. Ladhe èi papèdꞌa ne cèu, na bèbhe sa dꞌara èi, do dꞌara ai. Ama sue ku la! 16 Ana ne, jaꞌa kèti le asa ana-ana madhutu Ama ku, te ngaa ra tao rare boe ne.”
17 Ropa Na tadèngi sèmi èèna, hèia Yesus jèke ana madhutu Na sèra, aku Nèngu na, “Heh! Miu se seli-kolane! Jaꞌa ajꞌa le miu pahari-pahari, te ngaa miu meꞌa mèu boe. Aa miu parcaya boe Jaꞌa dènge dꞌara kateme. Jaꞌa hudꞌi mate hari ku miu, dꞌai pèri lodꞌo? Mèti ana èèna mai!”
18 Hèia, rèti ana ne, ka Yesus babège eele nidhu nèti ana neꞌe. Ka nidhu rai tèke eele ne, hèia ana ne èle dènge ka.
19 Èle èèna ka, ropa Yesus mesa Na dènge ana madhutu sèra, ka ra karèi Ne, peka na, “Ama! Nga tao ka jiꞌi bisa boe babège ngare nidhu deo na?”
20 Ka Yesus dhaa, na, “Miu babège mere boe, lula miu parcaya boe dènge dꞌara kateme. Sanèdꞌe! Ladhe miu parcaya Jaꞌa tareꞌa-reꞌa, masi ka ciki ooꞌe èèna ka sama sèmi lamusi ana iiki-iiki èci,*Lamatua Yesus pakasame parcaya dhèu dènge lamusi dhu ana iiki-iiki èci. Ètu ayat neꞌe, kapai lamusi dhu panting, te ngaa jenis lamusi panting boe. Alkitab lii Idhonesia ètu neꞌe, peka na, ‘biji sesawi’, te ngaa abhu masala ae dènge tafsiran èèna. miu bisa paredha ledhe èci, peka na, ‘Hee ledhe, hari sa nèi, lamu!’ Tatu na hari kahèi. De miu bisa tao ngaa èèna ka, sadꞌi parcaya dènge dꞌara kateme.✡Mateos 21:21, Markus 11:23, 1 Korintus 13:2 21 [Te ngaa sanèdꞌe! Nidhu sèmi seꞌe se, mema bhelu titu kèna. Ladhe miu sabajꞌa boe aa puasa boe, ho manèngi mi Ama Lamatua, na, miu babège mere boe nidhu sèmi sèra.”]†Sasuri lii Yunani dhu beꞌa risi aa dhu uru tèka, suri boe ayat 21 ne.
Lamatua Yesus peka dua hari kèna, lula-nèti mamadhe Na
(Markus 9:30-32, Lukas 9:43-45)
22 Ca lodꞌo, Yesus dènge ana madhutu Na dhu pakaboko ètu propensi Galilea. Na peka dènge rèngu, na, “Nèbhu heka, te ra neo pahie Jaꞌa asa dhèu leo rai kara. 23 Hèia ra pamadhe Jaꞌa, Dhèu Rai-haha Tareꞌa-reꞌa ne. Mema tareꞌa Jaꞌa madhe, te ngaa asa camèdꞌa Jaꞌa mamuri hari.”
Ropa ana madhutu Na sèra tadèngi lii deo na, hèia dꞌara ra susa titu kèna.
Lamatua Yesus peka-padhai lula-nèti bꞌae bea èmu sabajꞌa
24 Lodꞌo Yesus dènge ana madhutu Na lasi asa rae Kapernaum, hèia dhèu roro bea mai paraga dènge Petrus, ka ra karèi ne, na, “Mese miu bꞌae bea Èmu Kapua Manèngi-Mangajꞌi do, aadꞌo?”✡Kalua nèti Masir 30:13, 38:26
25 Hèia Petrus dhaa, “Na bꞌae!”
Ropa Petrus lepa, ka Yesus karèi dènge ka, aku Nèngu na, “Simon, èu pangee ku la! Dhèu aae-dhèu aae ètu rai-haha ne abhu bea nèti cee? Nèti ana matana ra, do, nèti dhèu leo?”
26 Petrus dhaa, na, “Nèti dhèu leo!”
Ka Yesus tuhu lii padhai Na, peka na, “Ladhe sèmi èèna, ana dhèu aae di dhu bꞌae boe, si? 27 Sèmi èèna kahèi dènge bea Èmu Kapua Manèngi-Mangajꞌi. Te ngaa hudꞌi laa, sèna ka dhèu roro bea se baku nasa dènge èdhi. De beꞌa risi lamu madulu iꞌa asa dꞌara dano. Iꞌa dhu èu abhu uuru èèna, èu bhoke hèbꞌa na. Pe èu abhu doi iia cue. More, ho bꞌae bea èdhi dua ti. Te doi ne, dꞌai le bea èdhi dua ti.”‡Tèu mai-tèu mai, dhèu mone Yahudi sèra dhu umur 20 tèu sa dedha, hudꞌi bꞌae bea èci dhu soru-bara jꞌaga mèdha-panyau dènge èmu nèti Èmu Kapua Manèngi-Mangajꞌi (baca ètu sasuri Kalua nèti Masir 30:12-16). Tèu Lamatua Yesus mamuri, ra ige bea èèna dènge doididrakma. Didrakma cue, kabꞌua na, èci èèna ka dènge dua dinari. Ca dinari èèna, èci èèna ka dènge gaji ca dhèu tuka dꞌara ca lodꞌo. Ètu ayat neꞌe, Yesus peka mi Petrus, aku Nèngu na, pe nèngu abhu ca doi stater ètu dꞌara hèbꞌa iꞌa èèna. Ca doi stater kabꞌua na, nuka dua didrakma, do, èpa dinari — dꞌai bꞌae bea nèti Yesus dènge Petrus.
✡17:5 2 Petrus 1:17-18, Lii Lolo dhu Uru Tèka 22:2, Lii Sodꞌa Koa-Kio 2:7, Yesaya 42:1, Mateos 3:17, 12:18, Markus 1:11, Lukas 3:22, Lole Hari Jꞌara-jꞌara Mamuri 18:15
✡17:10 Meliaki 4:5
*17:20 Lamatua Yesus pakasame parcaya dhèu dènge lamusi dhu ana iiki-iiki èci. Ètu ayat neꞌe, kapai lamusi dhu panting, te ngaa jenis lamusi panting boe. Alkitab lii Idhonesia ètu neꞌe, peka na, ‘biji sesawi’, te ngaa abhu masala ae dènge tafsiran èèna.
✡17:20 Mateos 21:21, Markus 11:23, 1 Korintus 13:2
†17:21 Sasuri lii Yunani dhu beꞌa risi aa dhu uru tèka, suri boe ayat 21 ne.
✡17:24 Kalua nèti Masir 30:13, 38:26
‡17:27 Tèu mai-tèu mai, dhèu mone Yahudi sèra dhu umur 20 tèu sa dedha, hudꞌi bꞌae bea èci dhu soru-bara jꞌaga mèdha-panyau dènge èmu nèti Èmu Kapua Manèngi-Mangajꞌi (baca ètu sasuri Kalua nèti Masir 30:12-16). Tèu Lamatua Yesus mamuri, ra ige bea èèna dènge doididrakma. Didrakma cue, kabꞌua na, èci èèna ka dènge dua dinari. Ca dinari èèna, èci èèna ka dènge gaji ca dhèu tuka dꞌara ca lodꞌo. Ètu ayat neꞌe, Yesus peka mi Petrus, aku Nèngu na, pe nèngu abhu ca doi stater ètu dꞌara hèbꞌa iꞌa èèna. Ca doi stater kabꞌua na, nuka dua didrakma, do, èpa dinari — dꞌai bꞌae bea nèti Yesus dènge Petrus.