2
1 E hagadaba Tagi Maolunga:
“Tolu hanonga o Moab e haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga gilaadeu ne dudu ga ni lehu
ivi o de hodooligi o Edom.*Isa 15.1—16.14; 25.10-12; Jer 48.1-47; Ezk 25.8-11; Zep 2.8-11
2 Deenei ai, au e gaamai naa de ahi gi duungia Moab,
gai e dudu naa donu gi deai mommee buibui makaga o Kerioth.
Dangada i Moab e maakau naa i de masavaa o de hebagi,
ma de masavaa o dangada e hevaalogi ai aama de ili ai o de hanga manu.
3 Au e daa naa gi magau dono dagi,
ma dagi alodahi o de henua madali ia,”
go Tagi Maolunga e hagadaba.
De hagaduasala o Judah
4 E hagadaba Tagi Maolunga:
“Tolu hanonga o Judah e haisala ai, ga dae ai loo gi de haa hanonga,
gai au e dee tuu naa donu dono hagaduasala.
Go hiidinga gilaadeu gu tili hainga a Tagi Maolunga,
ma tee daohi ana mee gu hagasauaa,
aagai gilaadeu ne hagasengalia i denga diinonga hadu muna,
go diinonga a olaadeu dubuna ne daumaha ange laa aagena.
5 Au e gaamai naa de ahi e dudu ai Judah
gai e dudu naa donu gi deai mommee buibui makaga o Jerusalem.”
De hagaduasala o Israel
6 E hagadaba Tagi Maolunga:
“Tolu hanonga o Israel e haisala ai, ga dae ai loo gi de haa hanonga,
gai au e dee tuu naa donu dono hagaduasala;
go hiidinga gilaadeu ne hagahesuihagi
gilaadeu e heohi i denga selevaa,
ma de gaavange de gau hagaau aloha e hagao ai olaadeu mee vae.
7 Gilaadeu ne dagadagahi biho o de gau hagaau aloha,
gi lo te gelegele,
gai tee hagamodu muna o dangada e duasala i de heohi.
Dahi daane ma dono damana e dagodo haisala ma dahi hahine daudahi,
gai gilaadeu ga hagangadi mee ai dogu ingoo dabu.
8 Gilaadeu ne hhola alaadeu malo ne kave
e hagadonu ai de hagao muli a dangada,
ga daakodo ai i gaogao mommee o ssigidaumaha.
Gilaadeu e unu uvaini a dangada ne hagao ai alaadeu muli,
i lo te hale o delaadeu maadua.
9 Aagai au ne daa ga maakau de gau Amor i olaadeu mada i mua,
e dee galemu donu gilaadeu e lloa bei denga cedar,
gai e mmahi bei denga oak.
Au ne oha hua i honga olaadeu laa
ma olaadeu aga i lo te gelegele.*Deut 3.8-11
10 Au ne hagassao mai goodou i de henua go Egypt,
ga dagi mai goodou laa lodo henua i e madahaa ngadau,
gai au ga gaavadu ai gi goodou de henua o de gau Amor.
11 Au ne hai hogi hanu oodou dama daane gi ni pelaabisi,
gai hanu ni Nazirite i magavaa oodou dama daane.
De gau Israel, e aha, e dee se muna abodonu deenei?
go Tagi Maolunga e hagadaba.
12 Aagai goodou ne hai denga Nazirite gi unumia uvaini,
ma de tala ange gi denga pelaabisi,
ga hai ange, ‘Goodou aude pasa pelaabisi.’
13 Tilo, au e baalasi naa goe gi baa gi lalo,
bei de hada gu daemaha laa i denga noodangaa grain.
14 Taane gemo e dee maua naa donu gi ola,
taane mmahi e dee maua naa donu i de hagammahi ia,
taane hebagi dau e dee maua naa hogi i de hagaola dono mouli.
15 Taane e dilia mee hholu e dee maua naa donu i de duu gi makaga,
gai taane hebagi e dee maua naa hogi i de hagamoolau e hano,
taane e gage i honga de hoosa e dee maua hogi i de hagaola dono mouli.
16 Gai taane lo taane i magavaa o denga daane mmahi
e savini naa ga hano ma de gilisau i de laangi laa,”
go Tagi Maolunga e hagadaba.