3
De gau tala hagadonu gi hagabaubau ina Israel
1 De gau Israel, goodou hagalaangona muna a Tagi Maolunga e hai baasi adu ai gi goodou, ma e hai baasi ange ai gi denga huaabodu alodahi aagu ne hagassao mai i de henua go Egypt:
2 “Go goodou donu huu i denga huaabodu
o henua i lalo alodahi aagu gu iloo;
deenei ai, au e hagaduasala naa goodou
i hiidinga oodou baubau alodahi.”
3 E aha, e maua e dogolua dangada i de hagabuni e seesee ai,
noo gilaau e dee hagaheloongoi?
4 E aha, e maua de laiono gi goo i lodo henua,
noo tigi ai sana manu ne mau?
E aha, e maua e de laiono i de haganngolo i lodo mee muimui,
i de masavaa tigi ai ana mee ne mau?
5 E aha, e maua gi doo ange dahi manu lele gi lo te sele i honga de gelegele,
noo tigi ai se mainu i lo te sele?
E aha, e maua gi lele age ssele i honga de gelegele,
noo tigi ai se manu ne lave ange aagena?
6 E aha, dangada e dee maatagu laa
i de masavaa e ili ai de hanga manu i lo te aduhale?
E aha, e maua gi dae mai de hai ngadaa gi dahi aduhale,
noo e dee dugua ange e Tagi Maolunga?
7 Ni muna abodonu, de Ia Aamua go Iahweh
e dee hai donu dahi mee daudahi
noo ia e tigi hagaago ange dana hagatau
gi ono dangada hai hegau go denga pelaabisi.
8 De laiono gu haganngolo —
gai goai naa e dee madagu?
De Ia Aamua go Iahweh gu basa —
gai goai naa e maua i tee basa pelaabisi?
9 Hagailoo ina ange gi denga mommee buibui makaga o Ashdod,
ma ange gi mommee buibui makaga i de henua go Egypt,
hai ange, “Goodou hagabuni mai gi honga mounga o Samaria;
diiloo ai de hellumi laumalie i kilaa,
ma de hagaduasala gu hai i magavaa o ono dangada.”
10 “Gilaadeu e dee iloo de hai de mee heohi,
go Tagi Maolunga e hagadaba.
Gilaadeu e hagabudu mee alaadeu e gaiaa ma de vaivai hai ai dangada
i lodo olaadeu mommee buibui makaga.”
11 Deenei ai, e hagadaba de Ia Aamua go Iahweh:
“Dahi hagadaumee e duuli naa luu baasi de henua ga oha oodou buibui,
ma de gaiaa mee i lodo oodou mommee buibui makaga.”
12 E hagadaba Tagi Maolunga:
“De gau Israel e nnoho laa Samaria ma Damascus
i honga olaadeu moenga ma olaadeu sea,
e hagaola naa bei dagodo o ssiibi,
a tangada hagaloosi e dada mai laa ivi o luoono vae,
aabe go dahi ono dalinga i lo te ngudu o de laiono.
13 Goodou hagalaangona ma de tala mee nei
e hai baasi ange gi de aamuli o Jacob,
go de Ia Aamua go Iahweh, de Maadua o denga hagabuulinga hebagi e hagadaba.
14 De laangi aagu au e hagaduasala ai Israel i hiidinga ono haisala,
gai au e oha naa denga mommee o ssigidaumaha o Bethel;
gai hanga i honga de mommee o ssigidaumaha
e duuduu naa ga tili gi honga de gelegele.*2 Ki 23.15
15 Au e oha iho naa denga hale ange gi de masavaa hagamagalili
madali denga hale ange gi de masavaa mahanahana;
gai denga hale e hagalaagii i ivory e oha naa,
gai denga hale danuaa e odi naa hogi i de maoha,”
go Tagi Maolunga e hagadaba.