4
Israel tee aahe mai gi de Maadua
1 Hagalaangona muna nei, goodou denga kaau haahine o Bashan,
i honga de mounga o Samaria,
goodou denga haahine e vaivai haia de gau hagaau aloha,
ma de hagahai ngadaa gilaadeu e duasala;
goodou e hai ange gi oodou bodu,
“Gaamai ange hanu mee e unu!”
2 De Ia Aamua go Iahweh gu hagatoo donu i dono ingoo dabu:
“Tilo, e tae mai naa donu denga laangi
alaadeu e hagalaulau ai goodou alodahi i maadau ga kave ai,
gai goodou ange laa e hagalaulau naa hogi i maadau.
3 Goodou e ssao naa ga hulo i lodo mommee maoha i de buibui o de aduhale,
gai goodou alodahi e hagasoe naa ga hulo;
goodou e maga naa gi de baasi ange gi Harmon,
go Tagi Maolunga e hagadaba.
4 Goodou hulo gi Bethel ma gi haisala ai;
gai hulo gi Gilgal ga duudagi ai doodou haisala.
Gaamai oodou sigidaumaha i daiao alodahi,
ma oodou sigidaumaha o tahi diba i diba e madaangahulu
e gaamai laa i denga dolu ngadau*dolu ngadau, aabe dolu laangi. alodahi.
5 Haia ssigidaumaha e hagaahe ange de abodonu i pelaoaa hagahua,
ma de tala tuhi oodou sigidaumaha ngadi gaavange —
gai goodou ga tuhi ai goodou, de gau Israel,
go hiidinga deenei doodou mee e llodo e hai,
go de Ia Aamua go Iahweh e hagadaba.
6 Au ne hai gi deai gai i lodo oodou aduhale alodahi,
ma de hai gi deai gai i oodou mommee alodahi,
aagai goodou tee aahe mai gi de au,
go Tagi Maolunga e hagadaba.
7 Au ne hai hogi gi dee pala de langi
i e dolu malama i mua de masavaa o de hagihagi.
Au ne hai gi pala de langi i dahi aduhale,
aagai ne hai gi dee pala de langi i de aduhale ange laa.
Au ne hai gi pala iho de langi gi honga dahi veelenga,
aagai ne hai gi dee pala de langi i de veelenga ange laa.
8 Gai dangada e hagadaga naa i denga aduhale e ssala ai hanu vai unu,
gai gilaadeu tee boobosu i de unu ai;
aagai goodou tee aahe mai gi de au,
go Tagi Maolunga e hagadaba.
9 Gu lagolago hanonga aagu ne oha ai
oodou veelenga ma oodou veelengaa grape,
ma de hai gi mmagi oodou manu ma de dongidongi.
Gai denga itebuubuu ne gai
oodou fig ma oodou olive
aagai goodou tee aahe mai gi de au,
go Tagi Maolunga e hagadaba.
10 Au ne hai gi loomai denga mee hagamaakau gi goodou
bei dagu hai ne hai ai laa Egypt.
Au ne daa ga maakau oodou dama daane i de gadilaasa;
gai oodou hoosa ne gaavee gee.
Au ne hai goodou gi dungua de pilo o oodou mommee nnoho gaainga;
aagai goodou tee aahe mai gi de au,
go Tagi Maolunga e hagadaba.
11 Au ne hagadee kii hanu goodou,
bei dagu hai ne oha ai laa Sodom ma Gomorrah.
Goodou ne bei dagodo o de laagau ne aau mai laa i lo te ahi ula;
aagai goodou tee aahe mai gi de au,*Gen 19.24
go Tagi Maolunga e hagadaba.
12 Deenei ai, Israel, deenei dagu mee e hai adu gi goe;
gai go hiidinga au gu baba ange e hai adu de mee nei gi goodou,
deenei ai, Israel, hagadaabena oo mee e hedae ange gi doo Maadua!”
13 Tilo, de ia ne haia denga mounga,
ma de hai de madangi,
ma de hagaago ange ana maanadu gi tangada,
gai go de ia e haia de laangi gi gohu,
ma de seesee i honga mommee maolunga o henua i lalo —
dono ingoo go Iahweh, de Maadua o denga hagabuulinga hebagi.