5
Tangi ma de hagahi dangada gi dahuli
1 De gau Israel, hagalaangona muna o dagu daahili o de magau e tala ai oodou dagodo:
2 “Israel e bei de bua moe gu magau laa,
gai e dee ahe ange naa donu e mouli age;
gai gu dilia i honga dono henua donu,
gu deai e hagahidi age ia.”
3 E hagadaba de Ia Aamua go Iahweh:
“E hulo naa e mano daane mai i de aduhale,
gai e lau naa donu huu daane e doe ai,
gai e lau naa daane e hulo mai i de aduhale,
gai e dinoangahulu naa donu huu e doe ai.”
4 Gai aanei muna a Tagi Maolunga ange gi dangada o Israel:
“Goodou saalaa mai au gi mouli ai goodou;
5 goodou gi dee ssala au i Bethel,
gai gi dee hulo gi Gilgal,
aabe gi seesee gi hulo gi Beersheba.
Go hiidinga de gau Gilgal e gaavee gee naa gi dahi henua gee,
gai Bethel e hai naa ga se ngadi mommee.”
6 Goodou saalaa Tagi Maolunga gi mouli ai goodou,
ia kana humai ga hano laa magavaa aamuli o Joseph
bei dagodo o de ahi;
gai ia ga dudu ga gilaadeu alodahi,
gai e deai naa donu se dangada e diinei ina de ahi laa.
7 Goodou dangada e suuia de hagamodu heohi gi bei de mee mmala
ma de dagadagahi gi honga de gelegele de mee heohi —
8 (de ia ne haia de hagabuulingaa heduu go de Pleiades ma de Orion
ma de sui de gohu gi se maalama i taiao,
ma de hagagohu de laangi gi bei de boo,
ia e basa ange naa gi denga lausedi
ma de hai gi pala iho gi honga de henua —
dono ingoo go Iahweh;*Job 9.9; 38.31
9 gai e moolau naa donu dana oha denga mommee buibui makaga
ma de oha de aduhale buibui ga maoha,)
10 goodou e kino i tangada hagaseegina dangada i de haitoga,
ma de kino i tangada e daalaa de muna abodonu.
11 Goodou e vaivai hai de gau hagaau aloha
ma de hai ia gi hagao ina taagisese o alaadeu grain.
Gai goodou e hagatuu denga hale hadu danuaa
aagai goodou e dee nnoho ai naa donu;
goodou e doo naa denga veelengaa grape lau kohu,
aagai goodou e dee unu naa donu uvaini e hai ai.
12 Au e iloo taelodo o oodou hegau baubau,
ma de lagolago oodou haisala.
Goodou e hagaduasala gilaadeu e heohi
gai e kave mee ngadi gaavange hagasenga,
goodou e dee hagamodu muna o de gau hagaau aloha i de heohi,
i de haitoga o de aduhale.
13 Deelaa ai, tangada heiangi gi dee muu i de masavaa laa,
go hiidinga de masavaa baubau.
14 Goodou saalaa tanuaa, e dee go de baubau,
gi mouli ai goodou.
Gai Tagi Maolunga, de Maadua o denga hagabuulinga hebagi e noho madali goodou,
bei doodou hai gu tala ai naa.
15 Goodou kino i de baubau, gai llodo i tanuaa,
hai hegau i de hagamodu heohi i de haitoga o de aduhale.
Kana adu Tagi Maolunga, de Maadua o denga hagabuulinga hebagi,
e abodonu ange naa gi dangada o Joseph e doe.
16 Deenei ai, e hagadaba Tagi Maolunga, de Maadua o denga hagabuulinga hebagi, de Ia Aamua:
“Dangada e tangi see naa i mommee alodahi e hagabuni ai laa dangada,
ma honga denga haiava alodahi, ga hagataba,
‘Gu vakaa loo gidaadeu! Gu vakaa loo gidaadeu!’
Gilaadeu e hagahi naa de gau hai veelenga gi tangi,
ma gilaadeu e iloo de hai e tangi ai.
17 Dangada e tangi see naa i lodo veelengaa grape alodahi,
go hiidinga au e dae adu naa gi oodou magavaa,”
go Tagi Maolunga e hagadaba.
De laangi o Tagi Maolunga
18 E vakaa naa goodou e llodo laa
gi dae mai de laangi o Tagi Maolunga!
Gu aha gu llodo ai goodou gi dae mai de laangi o Tagi Maolunga?
De laangi laa se laangi gohu, e deai donu se maalama iai.
19 Gai e bei naa dagodo o tangada e savini laa e hano gee i de laiono,
gai ia gu hedae ange gi dahi bea;
ia e ulu naa i dono hale ga hannagi ange gi de baasi de hale,
gai dahi labodo ga kadi ia.
20 E aha, de laangi o Tagi Maolunga
e dee gohu naa, gai e dee maalama —
gai e gohu boo dangodango, e deai se angaanga maalama iai?
21 “Au e kino, au e dee lodo i oodou daonga;
au e dee malangilangi i doodou hagabuni e daumaha.*Isa 1.11-14
22 Gai ga gaamai naa donu e goodou denga sigidaumaha dudu
ma sigidaumaha o grain,
gai au e dee malangilangi ai donu.
Gai ga gaamai naa donu e goodou denga sigidaumaha hagadanuaa magavaa
i oodou manu gu haangai gi pedi,
gai au e dee anga ange naa donu gi mee nei.
23 Au e dee lodo e hagallongo de leo o oodou daahili!
Au e dee hagallongo naa hogi
doodou hagadangidangi i denga harp.
24 Aagai doodou hai hegau i de hagamodu heohi
gi bei dagodo de sali o saalingaa vai,
gai doodou hai hegau i de heohi
gi bei ssaalingaa vai e dee maua laa gi masa!
25 De gau Israel, goodou ne gaamai laa donu gi de au
oodou sigidaumaha dudu, ma sigidaumaha o grain
i denga ngadau e madahaa i lodo henua?*Acts 7.42-43
26 Goodou ne saabai de mommee e dugu ai oodou diinonga,
go doodou hodooligi go Sikkuth, ma Kiyyun,
go doodou diinonga maolunga ne hai.
27 Deenei ai, au e hai naa goodou gi hulo
gi dahi henua e mmao gee mai i Damascus,”
go Tagi Maolunga e hagadaba,
dono ingoo laa go de Maadua o denga hagabuulinga hebagi.