6
E vakaa naa de gau duadonu i Zion
1 E vakaa naa gilaadeu e nnoho duadonu i Zion,
ma gilaadeu e nnoho paba i honga de mounga go Samaria,
goodou denga daane dau o de huaahenua
e maolunga i denga huaahenua,
go gilaadeu o de gau Israel e hulo aagena!
2 Goodou hulo diiloo i Calneh,
gai loadu gi de mommee maolunga go Hamath;
ma de loiho gi Gath o de gau Philistia.
E aha, gilaadeu e kii ange laa i luu nohoanga hodooligi nei?
Olaadeu ungaamee e nnui ange laa i oodou ungaamee?
3 Goodou gu hagangalo de laangi hai ngadaa laa,
gai gu hai gi moolau mai de hagaduasala laa.
4 E vakaa naa gilaadeu e daakodo i honga denga moenga ivory,
ma de nnoho i honga olaadeu seaa danuaa,
ga gai ai kano o denga ssiibi gauligi mai i de hagabuulingaa ssiibi,
aama kano o dama a denga kaau i lo te buibui manu.
5 Koe e tale naa denga harp bei David
ma de daahili madali denga mee hagadangidangi.
6 Koe e unu denga uvaini i lodo boolo hoohonu,
ma de hulu i lolo danuaa,
aagai koe e dee daemaha naa donu i de maoha o Joseph.
7 Deenei ai, go goodou naa hugadoo
e gaavee gi denga henua gee;
gai oodou daonga e daakodo ai laa ga gaimee e tuu naa.
De lodo maolunga o Israel
8 De Ia Aamua go Iahweh gu hagatoo donu i dono ingoo, go Tagi Maolunga, de Maadua o denga hagabuulinga hebagi e hagadaba:
“Au e kino i de hagamaolunga o Jacob,
ma ono mommee buibui makaga;
gai au e dugu ange naa de aduhale
ma mee alodahi iai gi olaadeu hagadaumee.”
9 Noo e dinoangahulu daane e doe i dahi hale, gai gilaadeu alodahi e odi naa i de maakau. 10 Gai de masavaa naa huu o tangada e gaavee laa de angaanga o tangada magau e duungia, e humai ai e aaua mai denga ivi i lo te hale, gai ia e ssili ange naa gi dahi dangada i lo te hale laa, “E hanu ange naa dangada madali goe?” Gai ia gi hai ange, “Deai;” gai tangada laa gi hai ange hogi, “Aude hagalongaa! Gidaau e dee dagu de ingoo o Tagi Maolunga.”
11 Gai tilo, Tagi Maolunga gu tala hagasoe,
gai ia e oha donu de hale laumalie laa gi too dagidahi,
gai de hale damaa mee e ssii dagaligiligi.
12 E aha, denga hoosa e saavini laa i honga hadu?
E aha, tangada e hagabalabala laa kilaa i denga kaau daane?
Aagai goodou gu hai de hagamodu heohi gi se mee hagammau
gai e hai denga hegau heohi gi ni mee mmala —
13 goodou e malangilangi laa i de hagadee kii ina o Lo Debar,*Lo Debar i muna Hebrew e bei e deai donu.
ma de hagataba, “E aha, e dee go omaadeu mahi
amaadeu ne hagadee kii ai Karnaim?”
14 “De gau Israel, tilo, au e hai naa gi humai
dahi huaahenua gi hebagi adu gi goodou,
go Tagi Maolunga, de Maadua o denga hagabuulinga hebagi e hagadaba;
gai gilaadeu e hagaduasala naa goodou mai i Lebo Hamath
ga hano ai gi de geelonga o Arabah.”