7
Denga itebuubuu, de ahi, aama de uga haide
1 Aanei mee a de Ia Aamua go Iahweh ne hagaago mai gi de au: tilo, ia e hagadabena naa de hagabuulingaa itebuubuu i dua de duuduu helii a de hodooligi, gai denga helii gu daamada de matili age ange i de lua hanonga. 2 Gai de masavaa huu alaadeu ne gai ai ga odi denga helii i honga de henua, gai au ga hai ange, “De Ia Aamua go Iahweh, aude haihaia, degi mai gi omaadeu haisala! Dee hee de hai o Jacob e maua ai gi ola? Gai ia e damaa mee!”
3 Gai Tagi Maolunga ne sui dana hagatau, gai ia ga hagadaba, “De mee nei e dee hagassula donu.”
4 Deenei de mee a de Ia Aamua go Iahweh ne hagaago mai gi de au: tilo, de Ia Aamua go Iahweh ne hagadabena de ahi e hagaduasala ai ono dangada, gai ne hai ga deai vai i de mommee gelo ma de dudu de henua. 5 Gai au ga hai ange, “De Ia Aamua go Iahweh, aude haihaia, diinei ina de ahi! Dee hee de hai o Jacob e maua ai gi ola? Gai ia e damaa mee donu huu!”
6 Gai Tagi Maolunga gu sui ange hogi dana hagatau. “De mee nei e dee hagasula hogi,” go de Ia Aamua go Iahweh e hagadaba.
7 Deenei dana mee ne hagaago mai gi de au: au ne gidee de Ia Aamua laa e duu i gaogao dahi buibui ne hagaduu laa gi heohi i de uga haide, gai ia e daohi de uga iai dahi soodo*de uga iai dahi soodo: de uga nei e nnoa ange hanu soodo be ni hadu gi de bido. i dono lima. 8 Gai Tagi Maolunga ne ssili mai gi de au, “Amos, se aha aau e gidee laa?”
Gai au ne hai ange, “Au e gidee dahi uga haide iai dahi soodo.”
Gai de Ia Aamua ne hai mai gi de au, “Tilo, au e hai naa de uga haide iai dahi soodo, e haide ai dagodo o ogu dangada, go de gau Israel; au gu dee hagaola donu gilaadeu.
9 Denga mommee daumaha o Isaac e oha naa ga ngadi daakodo,
mommee dabu o Israel e oha naa ga maoha,
gai au e hebagi ange naa gi de huaabodu o Jeroboam i dagu gadilaasa.”
Amos ma Amaziah
10 Gai Amaziah tangada haimeedabu o Bethel ne aalu gi Jeroboam de hodooligi o Israel, ga hai ange, “Amos gu noho e hai baasi adu gi de goe i honga de henua go Israel. Gai de henua gu dee llodo i ana muna alodahi e tala. 11 Gai aanei muna a Amos e tala,
‘Jeroboam e daa naa ga magau i de gadilaasa,
gai de gau Israel e gaavee gee donu i delaadeu henua
ga kave gi hanu henua gee.’ ”
12 Gai Amaziah ne hai ange gi Amos, “Taane e daalaa mee e loomai, savini hannoo gi de henua o Judah, ga gaimee ai, ma de basa pelaabisi ai i kilaa; 13 aagai koe aude ahe ange gi basa pelaabisi i Bethel, go hiidinga se hale dabu niio de hodooligi, gai go de temple o de nohoanga hodooligi.”
14 Gai Amos ga hai ange gi Amaziah, “Au e dee se pelaabisi aabe se dama ni dahi pelaabisi, aagai au se dangada hagaloosi manu, gai se dangada hogi e diiloo ange hua o denga sycamore, 15 gai Tagi Maolunga ne kave gee au gi dee diiloo ange denga ssiibi, gai Tagi Maolunga ne hai mai gi de au, ‘Hannoo basa pelaabisi ange gi de gau Israel.’ 16 Deenei ai, koe gi hagalaangona muna a Tagi Maolunga. Koe ne hai mai,
‘Aude basa pelaabisi gi hai baasi ange ai gi Israel,
aude agoago gi hai baasi ange ai gi de huaabodu o Isaac.’
17 Deenei ai, e hagadaba Tagi Maolunga:
‘Doo bodu e hai naa ga se hine hai be se manu i lo te aduhale,
gai au dama alodahi e daa naa ga maakau i de gadilaasa.
Doo henua e haide naa i de uga haide ga vaevae,
gai koe e magau naa i de henua o de gau henua gee,†henua o de gau henua gee, aabe se henua hakino gee.
Gai Israel e gaavee naa donu gi dahi henua gee,
ma de hano gee mai i dono henua donu.’ ”