8
De gede iai huamanu lleu
1 Gai deenei de mee a de Ia Aamua go Iahweh ne hagaago mai gi de au: tilo, au ne gidee dahi gede iai hanu huamanu lleu. 2 Gai ia ne ssili mai, “Amos, se aha aau e gidee laa?”
Gai au ne hai ange, “Se gede iai huamanu lleu.”
Gai Tagi Maolunga ne hai mai gi de au, “De hagaodi o ogu dangada go de gau Israel gu dae mai donu. Au gu dee hagaola donu gilaadeu. 3 Denga daahili i lo te temple*temple, aabe go de hale o de hodooligi. e hai naa gi se dangi see i de laangi laa, go de Ia Aamua go Iahweh e hagadaba. Gai e soa naa donu de gau maakau e daakodo saele. Gai gu dee hagalongaa!”
4 Noho mai hagalaangona, goodou e vaivai haia dangada e duasala,
ma de daia gi maakau de gau hagaau aloha i de henua,
5 ma de hagataba,
“Go aahee naa e lava ai taonga o de duu de maasina i dai,
gai gimaadeu ga hulo e hagao gi daha amaadeu grain?
Gai go aahee naa e ui ai Sabbath,
gai gimaadeu ga hulo e hagao gi daha amaadeu wheat?
Gimaadeu e hai naa gi kii mai ange de hagabaaunga o de ephah†de ephahgo de hagabaaunga o denga mee mmasa.
gai ga ue age de hagaoanga,
ma de hagasenga dangada i demaadeu hai e hagahidi mee.
6 Gimaadeu e hagao naa de gau hagaau aloha i selevaa
gai e hagao gilaadeu e duasala i e lua mee vae,
aama de hagao hogi gi daha gili o denga grain.”
7 Tagi Maolunga a Jacob e tala tuhi laa gu hagatoo donu:
“Ni muna abodonu, au e dee ngalo naa donu alaadeu hegau ne hai.
8 E aha, e dee ngalungalue naa de henua i hiidinga hegau nei,
gai dangada alodahi i honga de henua e tangi naa?
De henua alodahi e de hagahonu age naa bei de Nile,
gai e hagahonu age naa ga lava ga ahe
bei dagodo o de Nile i Egypt.”
9 Gai e hagadaba de Ia Aamua go Iahweh,
“De laangi laa gai au e hai naa
gi danu de laa i lo te madohi lua o de laangi,
gai de henua e hagagohu i de masavaa goi ao ai de mee.
10 Au e sui naa oodou laangi daonga gi ni laangi niiodou e tangi ai,
gai oodou daahili alodahi e sui gi ni daahili hagahinangalosaa.
Au e hai naa goodou gi kahu i malo daladala,
ma de dahi gi malali oodou biho.
Au e hai naa goodou gi tangi bei tangada
e dangi laa i hiidinga de magau o dana dama dagidahi,
gai de hagaodi o de laangi laa gi bei dahi laangi mmala.
11 Tilo, e tae mai naa laangi,
go de Ia Aamua go Iahweh e hagadaba,
aagu e hai ai gi humai de onge gi honga de henua,
gai e dee go de onge i teai gai, aabe go teai vai,
aagai go de onge i muna a Tagi Maolunga.
12 Gai dangada e hagadaga saele naa i magavaa luu dai nnui laa,
ma de hulo gi ngaiho ma dua;
gilaadeu e saavini saele naa ga ssala muna a Tagi Maolunga,
gai gilaadeu e dee gidee.
13 De laangi laa gai denga damaa hine mahamaha
ma dama daane e ssili naa olaadeu mada i delaadeu hieunu.
14 Gilaadeu e hagatoo donu i tiinonga hagadookaa‡tiinonga hagadookaa nei go Ashima. o Samaria,
be go de hagataba, ‘Dan, au e hagatoo donu i de mouli o doo diinonga,’
aabe go de hagataba, ‘Au e hagatoo donu i de mouli o tiinonga o Beersheba;’
gilaadeu e maakau naa donu,
gai e dee aahe ange e hiihidi age.”