9
De oha o Israel
1 Au ne gidee de Ia Aamua e duu i gaogao de mommee o ssigidaumaha, gai ia ne hagadaba,
“Hagailiilihia de ulu o denga duludulu
gi ngalungalue ai de hale alodahi,
ma de maoha iho gi honga biho o dangada alodahi.
Gai dangada e doe gai au e daa naa gi maakau i de gadilaasa;
e deai donu se gilaadeu e maua i de savini e hano;
e deai donu se gilaadeu e hagaola.
2 Gai ga geli naa donu gilaadeu
ga dae gi de mommee o de gau maakau,
gai au e dada age naa donu gilaadeu i kilaa;
gai ga kage naa donu gilaadeu ga hulo gi de langi,
gai au e dada iho naa hogi gilaadeu gi lalo.
3 Gai ga mmuni naa donu gilaadeu i de ulu o Carmel,
gai au e ssala naa donu gilaadeu ga booboo mai;
gai ga mmuni naa donu gilaadeu i tagelo o de moana,
gai au e hai ange naa gi de labodo
gi gadigadi gilaadeu.
4 Gai ga noonoodia naa donu gilaadeu ga gaavee
gi henua o olaadeu hagadaumee,
gai au e hai naa de gadilaasa
gi daia gilaadeu gi maakau i kilaa.
Au e dagitilo naa e hai ange de baubau gi gilaadeu
e dee hai ange tanuaa.”
5 De Ia Aamua go Tagi o denga hagabuulinga hebagi
e poo ange gi henua i lalo gai gu vaivai,
gai dangada alodahi e nnoho i kilaa e tangi naa;
de henua e hagahonu age naa bei de Nile,
gai e hano iho naa hogi bei de Nile i Egypt —
6 ia ne hagatuu ono aabi i lo te langi,
ma de hai dahi moana i honga henua i lalo;
ia ne hagahi denga vai o tai
ga llingi ange gi honga de henua —
dono ingoo go Iahweh.
7 “De gau Israel, goodou e dee bei laa
dagodo o de gau Ethiopia i ogu daha?
go Tagi Maolunga e hagadaba.
E dee go au ne hagassao ina mai Israel i de henua go Egypt,
ma de gau Philistia mai i Caphtor,*Caphtor e bei go Crete.
aama de gau Syria mai i Kir?
8 Tilo, de Ia Aamua go Iahweh e dagitilo donu
de nohoanga hodooligi e haisalasala laa.
Au e oha naa ga aau gee mai i honga henua i lalo;
aagai au e dee daa naa gi odi i de maakau dangada o Jacob,
go Tagi Maolunga e hagadaba.
9 Gai tilo, au e tala hagasoe de muna,
ga nonu ange naa dangada o Israel gi daho denga huaahenua,
bei de hai e nonu ai laa denga grain,
gai e deai naa donu se damaa hadu daudahi
e doo gi honga de gelegele.
10 De gau haisala alodahi i magavaa o ogu dangada
e daa naa ga maakau i de gadilaasa,
aanei gilaadeu e hagataba laa,
‘E deai naa donu se hai ngadaa e humai gi gidaadeu.’
De hagaahe age ange o Israel
11 “De laangi laa gai au e hagaahe age naa
de hale malo o David gu maoha laa,
ma de hai ange naa mommee gu masaavava laa,
ma de hagaahe age mommee gu maoha,
aama de hagaduu age ange gi bei ono dagodo madagidagi.*Acts 15.16-18
12 Gai gilaadeu e kave naa mommee e doe i Edom
aama huaahenua alodahi e hagaingoo i dogu ingoo,
go Tagi Maolunga e hagadaba,
go de ia e hagasula ina de mee nei.
13 Tilo, e tae mai naa denga laangi,
go Tagi Maolunga e hagadaba,
a tangada hagabalabala e daea adu ai tangada hagihagi,
gai tangada e dagadagahia denga grape
e daea adu ai de masavaa e doo ai.
Honga mounga e ssali ai naa denga uvaini hoou,
gai e malingilingi mai naa hogi i honga duuduu alodahi.
14 Au e hagaahe ange naa de manuuia o ogu dangada go de gau Israel.
Gai gilaadeu e aahe ange naa ga hagatuu age
denga aduhale gu maoha laa ga nnoho ai.
Gilaadeu e doo naa denga veelengaa grape ga unu uvaini e hai ai,
gilaadeu e doo naa alaadeu veelenga ga gai hua iai.
15 Gai au e hai naa gilaadeu gi nnoho i honga delaadeu henua,
gilaadeu e dee aahe ange donu e gaavee gee
i de henua aagu gu gaavange gi gilaadeu,”
go Tagi Maolunga doo Maadua e hagadaba.