De Beebaa go
Obadiah
Hanu dagodo o de beebaa nei
Taane ne siia de beebaa nei go Obadiah. E dee lagolago adaadeu mee e iloo i dagodo o Obadiah. E dee iloo danuaa hogi de masavaa ne sisi ai de beebaa bodobodo nei, agu made go dua de hagadee kii ina o Jerusalem i 586 b.c., go de masavaa a Edom, de hagadaumee o Judah, ne malangilangi ai i de hagadee kii ina o Jerusalem. Gilaadeu ne gaiaa hogi goloa o Jerusalem, i de masavaa o Judah ne duasala ai, aama de bale ange de huaahenua ne vaivai haia laa Judah. Obadiah ne tala pelaabisi de hagaduasala, aama de hagadee kii ina o Edom i muli mai, madali denga huaahenua ne hai baasi ange laa gi Israel.
Dahi gubu hagamogomogo: “De laangi o Tagi Maolunga gu dae mai donu gi honga o denga huaahenua alodahi. Gai au mee ne hai, e hai adu naa donu hogi gi de goe; au hegau baubau e aahe adu naa donu gi de goe” (1.15).
Denga vaevaaenga
De hagaduasala o Edom (1-14)
De laangi o Tagi Maolunga(15-21)
1
1 De midi hagaago ange a Obadiah.*Isa 34.5-17; 63.1-6; Jer 49.7-22; Ezk 25.12-14; 35.1-15; Amos 1.11-12; Mal 1.2-5
De hagaduasala o Edom
E hagadaba de Ia Aamua go Iahweh i dagodo o Edom —
gimaadeu gu langona dahi muna mai i daho Tagi Maolunga;
dahi dangada hagailoo gu hai gi hano gi denga huaahenua, gi hai ange,
“Hiihidi age, gidaadeu ga hulo e hebagi ange gi de ia!” —
2 “Tilo, au e hai naa goe gi maolalo i magavaa o denga huaahenua,
koe e kona naa doo hagangadi mee ina.
3 Doo lodo maolunga gu hagasenga goe;
koe e noho i lo te baba,*De Beebaa Hebrew e hai ange, Sela, go de madaaolo o Edom, e bei go de baba.
ma de hai doo hale i denga mommee maolunga;
koe e hagadaba i oo lodo,
‘Goai e maua i de gave iho au gi honga de gelegele?’
4 Gai e dee galemu naa donu doo lele ga maolunga bei de igele,
ma de hai doo hoohanga i magavaa o denga heduu,
gai au e tili iho naa donu goe gi lalo,
go Tagi Maolunga e hagadaba.
5 Noo de gau gaiaa gu loomai,
noo de gau daa dangada gu loomai i de boo —
gai se hai ngadaa laumalie e duu i de goe! —
e aha, gilaadeu e dee gaiaa naa donu huu alaadeu mee e llodo ai?
Noo de gau hagihagi grape gu loomai,
e aha, gilaadeu e dee dugu naa hanu momo grape?
6 Aagai Esau e gaiaadia naa donu ono goloa ga odi,
ono goloa hagamogomogo e gaavee naa hogi!
7 Dangada alodahi e balea adu gi goodou i de hebagi
e hai naa goodou gi hulo gee i doodou henua;
gai dangada gu hagaheloongoi adu e daahanga ma de hagadee kii goodou;
dangada e gaina oodou gai e dugu naa ssele e dada ai goodou,
aagai goodou e dee iloo naa donu.
8 De laangi laa, go Tagi Maolunga e hagadaba,
gai au e daa naa gi maakau denga daane heiangi o Edom,
ma gilaadeu e tonu ange i denga mounga o Esau.
9 Teman, oo daane dau i de hebagi e kona naa donu de maatagu,
gai daane alodahi i honga mounga o Esau
e odi naa i de daa ga maakau.
10 Go hiidinga dau vaivai hai doo daina go Jacob,
koe e dogaa naa donu,
koe e oha ga maoha ga hano ai.
11 I de laangi oou tee anga ange ai e bale ange doo daina,
i de masavaa a de gau henua gee ne kave ai ono goloa,
gai de gau henua gee ne ulu i ono haitoga
ma de dada denga laagau e kave ai Jerusalem,
gai koe ne hagabuni ange gi gilaadeu.
12 Gai e dee heohi dau hagangadi mee doo daina
i de masavaa oona ne duasala ai,
aabe go doo malangilangi i dangada o Judah
i de masavaa olaadeu ne oohaa ina ai,
aama doo basa hagamaolunga
i de laangi olaadeu ne hai ngadaa ai.
13 Gai e dee heohi donu doo ulu i haitoga o ogu dangada
i de masavaa olaadeu ne hai ngadaa ai,
be go doo malangilangi i delaadeu hai ngadaa
i de masavaa olaadeu ne duasala ai,
ma de hai gi de mahi olaadeu goloa
i de masavaa olaadeu ne duasala ai.
14 Koe e dee tali i hesilihaginga o denga haiava
e daa ai gi maakau dangada e saavini e hulo gee,
aabe e booboo dangada ne ola
e gaavange gi olaadeu hagadaumee
i de laangi olaadeu ne hai ngadaa ai.
15 De laangi o Tagi Maolunga gu dae mai donu
gi honga o denga huaahenua alodahi.
Gai au mee ne hai, e hai adu naa donu hogi gi de goe;
au hegau baubau e aahe adu naa donu gi de goe.
16 Goodou ne unu de ubu†de ubu nei go de ubu o de bole aabe go de hagaduasala a de Maadua. i honga dogu mounga dabu,
gai denga huaahenua alodahi e unu ai naa hogi ga hano ai;
gilaadeu e duudagi naa donu huu de unu ai,
gai e hai naa ga dagodo be gilaadeu tee haanau donu.
17 Aagai dangada e ola naa i honga de mounga go Zion,
gai de mounga laa e dabu naa;
gai dangada o Jacob e kave naa delaadeu henua ga henua ai.
18 Dangada o Jacob e bei naa dahi ahi,
dangada o Joseph e bei naa de ula o dahi ahi;
gai dangada o Esau e bei naa denga gainga,
gai gilaadeu e dudu naa gilaadeu ga odi.
Gai e deai naa donu dangada e ola i dangada o Esau,”
go Tagi Maolunga e hagadaba.
19 Dangada o Negev e nnoho naa i denga mounga o Esau,
gai dangada i mommee iai duuduu paa i lalo e kave naa de henua o de gau Philistia.
Gilaadeu e kave naa denga veelenga o Ephraim ma Samaria,
gai Benjamin e kave naa Gilead ga henua ai.
20 De hagabuulingaa dangada o Israel e kave naa de henua o de gau Canaan,
ga hano ai ga dae gi Zarephath;
gai dangada o Jerusalem ne gaavee laa gi Sepharad
e henua naa i denga aduhale o de Negev.
21 De gau hagaola e loage naa gi de mounga go Zion
ga dagi ai i denga mounga o Esau.
Gai de nohoanga hodooligi e hai naa ga niio Tagi Maolunga.