2
De tili a Israel Tagi Maolunga
1 Gai Tagi Maolunga ne hagaago mai ana muna, ga hai mai: 2 “Hannoo daalaa ange gi langona e dangada o Jerusalem, hai ange: ‘E hagadaba Tagi Maolunga,
Au e manadua dau hagadubu au i doo masavaa e dama daane ai,
ma doo aloha i de au bei de hine gu dai hai bodu,
ma doo daudali mai i de au i de vao,
go de mommee e deai mee ssomo ai.
3 Israel ne hagadabu ange gi Tagi Maolunga,
gai go hua aana ne hagihagi i taamada.
Dangada alodahi ne oohaa ina ia gu haisala;
gai de hai ngadaa ne duu ange gi gilaadeu, ’ ”
go Tagi Maolunga e hagadaba.
4 Dangada o Jacob, ma aamuli alodahi o Israel. Goodou hagalaangona muna a Tagi Maolunga. 5 E hagadaba Tagi Maolunga:
“Se baubau aha a oodou dubuna ne gidee laa i ogu daha,
gai gilaadeu ga hagammao gee ai laa i de au?
Gilaadeu ne daudali ange i denga diinonga dee haigamaiana,
ga deai ai olaadeu haigamaiana.
6 Gilaadeu tee hagataba hogi, ‘I hee iai Tagi Maolunga
go de ia ne hagassao ina mai gimaadeu i Egypt,
ga dagi mai gimaadeu i de vao,
ma lo te henua e deai mee e ssomo ai gai iai denga geelonga,
se henua e deai vai iai ma de gohu boo dangodango,
se henua e deai dangada e seesee ai gai e deai dangada e nnoho ai?’
7 Au ne gaamai goodou gi dahi henua iai hua lagolago,
gai goodou ga gai ono hua aama mee danuaa iai.
Aagai goodou ne loomai ga hai gi hakino gee dogu henua,
aama de hai gi dee gilimalali de huaahenua o dogu boolonga.
8 De gau haimeedabu tee ssili,
‘I hee iai Tagi Maolunga?’
De gau hai hainga tee iloo e gilaadeu au;
gai de gau hagaloosi ssiibi*de gau hagaloosi ssiibi e bei go denga dagi. gu haisala mai gi de au.
Denga pelaabisi gu pasa pelaabisi i de ingoo o Baal,
ma de daudali i denga diinonga deai haigamaiana.
9 Deenei ai, au e hagabuu adu naa ssala gi goodou,
go Tagi Maolunga e hagadaba.
Au e hagabuu ange naa ssala gi dama a oodou dama.
10 Goodou hulo diiloo mommee i tagudai o Cyprus,†Cyprus: de Beebaa Hebrew e hai ange Kittim.
gai haia hanu gi hulo gi Kedar gi diiloo ai gi danuaa,
be gu hanu mee bee nei gu hai.
11 Gu dahi laa huaahenua ne suuia olaadeu diinonga?
(Olaadeu diinonga e dee ni diinonga abodonu.)
Aagai ogu dangada gu hagahesuihagi de mahamaha o delaadeu Maadua
i denga diinonga e deai olaadeu haigamaiana.
12 De langi, koe gi lele oo mouli i de mee nei,
gai gi madagu ma de bolebole mmao,
go Tagi Maolunga e hagadaba.
13 Ogu dangada gu hai e lua baubau:
gilaadeu gu tili au,
ssaalingaa vai o de mouli,
gai gilaadeu ne hoda mommee e hagasahu ai vai,
go mommee e dee maua gi daakodo ai vai.
14 E aha, Israel se dangada hai hegau, aabe ne haanau mai se dangada hai hegau?
Gai gu aha gu gaavee ai laa ia bei goloa e maua i de hebagi?
15 Denga laiono e hagangolo ange gi de ia,
gilaadeu gu kona donu de hagangolo.
Gilaadeu gu hai dono henua gi se mommee e ngadi dagodo;
ono aduhale gu maoha, gai gu deai dangada e nnoho ai.
16 Gai denga daane o Memphis ma Tahpanhes
ne dahi‡ne dahi, aabe ne hhoa. hogi doo biho.
17 Gai e dee go koe ne hidi mai ai de hai adu mee nei gi goe,
i dau tili Tagi Maolunga doo Maadua,
i de masavaa aana ne dagi mai ai goe i lo te haiava?
18 Aagai gu aha gu hano ai goe gi Egypt
e unu ai vai o de Nile?§Nile: de Beebaa Hebrew e hai ange bolo go Shihor.
Gai gu aha gu hano ai goe gi Assyria,
e unu ai vai o Euphrates?
19 Au hegau baubau e hagaduasala naa goe,
gai doo huli gee i de au e hagabaubau donu huu goe.
Hagasaelea age gi gidee iho ai e goe de baubau
ma de kona de hai ngadaa adu gi de goe,
i dau tili Tagi Maolunga doo Maadua,
ma dau dee hagadubu au,
go de Ia Aamua, Tagi o denga hagabuulinga hebagi e hagadaba.
20 Madagidagi loo gai koe ne hhadi de laagau hagahai hegau i honga doo eu
ma de duuduu oo mee noonoa;
aagai koe ne hagadaba, ‘Au e dee daumaha adu donu gi de goe!’
Gai koe ne dahulinga baubau
i honga mommee maolunga alodahi
ma lalo o denga manu ssomo alodahi
bei dagodo o de hine hai be se manu.
21 Au ne doo goe gi se grapevine danuaa,
se golee mai i de manu danuaa.
Gai gu aha goe gu hai baasi mai gi de au
ma gu sui ma gu se grapevine lodo henua?
22 Gai ga gaugau naa donu goe i denga lye
ma de soobe i soobe lagolago,
gai oo baubau goi daakodo donu i ogu mada i mua,
go de Ia Aamua go Iahweh e hagadaba.
23 Gai dee hee dau hai e hagadaba ai naa, ‘Au e dee hakino gee donu;
au tigi daudali ange donu i Baal’?
Galo ange diiloo au mee e hai i lo te geelonga,
gai hagasaelea dagodo o au hegau.
Koe e gemo i de savini saele
bei dagodo o dahi gamelo hahine,
24 koe se donkey aada e abo ange gi de vao,
ma de hagadungu lo te moana i de masavaa oona gu lodo ai i dahi donkey daane —
goai e maua i de daohi ia i dono iho ange?
Gai denga donkey daane e moolau donu delaadeu ssala ga gidee ia,
i de masavaa olaadeu e llodo ai i de ia.
25 Aude savini saele ga dae ai gi teai oo mee vae,
gai doo hakii gu mmasa gee.
Aagai koe e hagadaba, ‘E deai donu haigamaiana!
Au e vaasuu i denga diinonga o denga henua gee,
au e daudali ange naa donu i gilaadeu.’
26 De gau Israel e dookaa naa donu,
bei tangada gaiaa e dogaa laa i dono boogia mai —
go gilaadeu ma olaadeu hodooligi, ma olaadeu dagi,
ma olaadeu dangada haimeedabu aama olaadeu pelaabisi.
27 Gilaadeu e hai ange gi de manu somo, ‘Go koe dogu damana,’
ma de hai ange gi dahi hadu, ‘Go koe ne hanaua au.’
Gilaadeu gu huuhuli mai olaadeu dua gi de au,
e dee huuhuli mai olaadeu mada;
gai de masavaa huu olaadeu e hai ngadaa ai,
gai gilaadeu ga hagataba,
‘Hidi age hagaola ina gimaadeu!’
28 Gai i hee iai denga diinonga aau ne hai laa moou?
Haia gilaadeu gi hiihidi age noo gilaadeu e maua i de hagaola goe
i de masavaa oou e hai ngadaa ai!
Judah, oo diinonga gu lagolago donu
bei oo aduhale.
29 Gu aha goodou gu hagabaubau ai naa au?
Goodou alodahi gu hagahaisala au,
go Tagi Maolunga e hagadaba.
30 Teai donu haigamaiana dagu haele oodou dama,
gilaadeu tee aanga mai gi agu muna hagaheohi.
Oodou gadilaasa ne daa ga maakau oodou pelaabisi
bei dagodo o dahi laiono hiigai.
31 Goodou de atangada nei, hagalaangona muna a Tagi Maolunga:
E aha, au gu bei laa dagodo o de vao i daho Israel,
aabe ne bei dahi henua gohu boo dangodango?
Gai gu aha ogu dangada gu hagataba ai laa,
‘Gimaadeu gu ilaage i de hulo be go hee omaadeu e llodo e hulo aagena,
gimaadeu e dee aahe ange e loomai gi de goe’?
32 E aha, e maua e de gauligi hahine gi ngalo ono mee hagalaagii,
aabe go de hine gu dai hai bodu i de ngalo ono malo?
Aagai ogu dangada gu ngalo au
i hanu laangi lagolago.
33 Koe e kona de heiangi i de ssala oo bodu!
Denga haahine baubau hugadoo gu agoago i au dahulinga baubau.
34 Oo malo e baalau ai dodo o de gau hagaau aloha tigi haisala;
gai koe tee gidee delaadeu ulu e gaiaa mee i doo hale.
Aagai e dee galemu donu de hai mee,
35 gai koe e hagadaba, ‘Au tigi haisala donu;
ia e dee lili donu i de au.’
Tilo, au e hagaduasala naa goe
i hiidinga koe e hagadaba, ‘Au tigi haisala donu.’
36 Gu aha gu ngadi aheahe saele ai naa goe,
ma tee modu de sui oo haiava?
Egypt e hagadogaa naa goe
bei de hai a Assyria ne hai ai laa goe.
37 Gai koe e hano gee naa hogi i de mommee nei
gai luoo lima e haoli luoo mada,
go hiidinga Tagi Maolunga gu tili gilaadeu aau e hagadonu;
gilaadeu e dee maua naa donu i de hai goe gi hagadagadaga age.