2 “Au e hagatoo donu i de mouli o de Maadua,

go de ia hagamodu ina ogu muna i de heohi,

go de Ia Mmahi Mmao laa, go de ia ne haia gi daemaha ogu lodo:

3 taulooloa o dogu mouli,

gai de manava o de Maadua i lodo luoogu bongaa usu,

4 gai au e dee tala donu dahi muna baubau,

gai dogu alelo e dee hadu muna naa donu.

5 Au e dee haihai naa donu ga hagadaba bolo goodou e heohi;

au e dee hagadaba naa donu bolo au e dee heohi, ga dae ai gi dogu magau.

6 Au e daohi naa donu huu dogu hai hegau i de heohi;

ogu lodo e gilimalali i taulooloa dogu mouli.

7 Ogu hagadaumee gi bei dagodo o tangada baubau,

gai gilaadeu e hai baasi mai gi bei dagodo o tangada e haia de baubau.

8 Gai e dahi naa donu tali a tangada baubau

i de masavaa a de Maadua e hagalilo ai ia,

ma de kave dono mouli?

9 De Maadua e hagallongo dana dangi,

i de masavaa oona e duu ange ai gi de hai ngadaa?

10 Ia e malangilangi naa i de Ia Mmahi Mmao laa?

Ia e hagahi naa de Maadua i masavaa alodahi?

11 Au e agoago adu goodou i dagodo de mahi o de Maadua;

au e dee hagammuni dagodo o de Ia Mmahi Mmao laa.

12 Tilo, goodou gu gidee donu mee nei;

gai gu aha gu lagolago ai naa oodou ngadi muna e tala?

13 Deenei tuuhanga a de Maadua e gaavange gi tangada baubau,

ma de boolonga o tangada alasala e kave mai i daho de Ia Mmahi Mmao laa:

14 ga soa naa donu ana dama, gai gilaadeu e maakau naa i de gadilaasa,

gai dono hagadiilinga e dee boobosu naa i alaadeu gai.

15 Ana dama e doe e maakau naa i de mee hagamaakau,

gai olaadeu bodu e dee tangi i delaadeu maakau.

16 Gai ga lagolago naa donu ana selevaa bei denga gelegele,

gai ono malo bei de lagolago o denga gelegele pigi,

17 gai ana mee gu hagabudu laa go tangada heohi e gahu ai,

gai tangada tigi haisala e duuhaa ana selevaa.

18 Gai de hale aana e hagaduu e maoha ngaohie naa bei de hale o de neveneve,

ma de baasi hale a tangada dagitilo e hagaduu laa.

19 Ia e hano ga seni i dono lava, gai ia e dee ahe ange donu e hagabudu;

gai ga alahage naa huu ia, gai gu deai donu ono goloa lagolago.

20 Denga mee hagamaatagu e tuu ange naa gi de ia bei de dae mai o tolona,

gai ssio e ili naa ia ga kave gee i de boo.

21 De madangi mai i dua e ili naa ia ga kave gee, gai ia gu dee maleva;

de madangi gu kave gee ia i dono mommee.

22 De madangi e dau naa i de ia, gai e dee abodonu ange donu,

gai ia e savini naa ga hano gee i de madangi mmahi.

23 De madangi e baabaa naa luoono lima ga doo mee i de ia,

ma de hagavogivogi hagammae manava ga dugi ia gi hano gee i dono mommee.