42
De basa ange o Job gi muna a Tagi Maolunga
1 Gai a Job ne basa ange ga hai ange gi Tagi Maolunga,
2 “Au e iloo bolo koe e maua i de hai mee alodahi,
gai au hagatau alodahi e dee maua donu i de buibui gi dee hai.
3 Koe ne ssili mai, ‘Goai e buibuia nei agu hagasaele,
gai e deai donu sono mee e iloo?’ *Job 38.2
Ni muna abodonu, au ne basa i mee oogu e dee donu ange aagena,
gai ni mee maolunga niiagu e dee iloo.
4 Koe gu hagadaba, ‘Noho mage hagalaangona, gai au ga basa adu;
au e ssili adu agu muna gi de goe, gai koe ga basa mai.’ *Job 38.3
5 Au gu langona oo dagodo,
gai iainei au gu gidee goe;
6 deenei ai, au gu kino i ogu dagodo,
gai au gu dahuli ogu lodo ma gu noho i lodo lehu.”
Muna hagaodi
7 Dua huu de tala ange a Tagi Maolunga muna nei gi a Job, gai ia ga hai ange gi Eliphaz taane Teman, “Au gu kona mmao dogu lili i de goe ma luoo soa ange laa, go hiidinga tee heohi doodou hai ne tala ai ogu dagodo, bei de hai a dogu dangada hai hegau go Job ne tala ai laa. 8 Deenei ai, goodou gaavee e hidu kaau daane ma e hidu ssiibi daane, mage hulo ai gi daho dogu dangada hai hegau go Job, gai ia ga hai ai dahi sigidaumaha dudu e tala ai oodou haisala. Gai dogu dangada hai hegau go Job ga dalodalo i oodou hiidinga. Gai au e hagallongo naa dana dalodalo, gi dee hagaduasala ina ai e au goodou gi bei dagodo o oodou baubau, go hiidinga tee heohi doodou hai ne tala ai ogu dagodo, bei de hai a dogu dangada hai hegau go Job ne tala ai laa.” 9 Gai Eliphaz taane Teman, ma Bildad taane Shuah aama Zophar taane Naamah ne hagassula muna a Tagi Maolunga ne tala ange gi gilaadeu; gai Tagi Maolunga ne hagallongo talodalo a Job.
De hagaahe ange a Tagi Maolunga de lava o Job
10 Gai dua huu de dalodalo o Job i ono soa, gai Tagi Maolunga ga ahe ange ga hai gu kii ange dono lava.*Job 1.1-3 11 Gai ono daina daane ma ono daina haahine alodahi, aama dangada alodahi nogo iloo laa ia i mua ga loomai ga daonga madali ia i dono hale. Gai gilaadeu ga hagaaneane ono lodo ma de aaloha i de ia, i hiidinga o denga hai ngadaa alodahi a Tagi Maolunga ne hai ange laa gi de ia. Gai dahi ma dahi ne gaavange gi a Job hanu sseene ma dahi buulei goolo.
12 Gai Tagi Maolunga ne hagamanuuia a Job gi kii ange dono lava i denga laangi hagaodi o dono mouli, i laangi i taamada. Taelodo o ana ssiibi se 14,000, gai se onomano ana gamelo, e luamano ana kaau e noonoa dagilua i denga laagau hagahai hegau, gai e mano ana donkey. 13 Gai e dogohidu ana dama daane ma e dogodolu ana damaa hine. 14 Ia ne hagaingoo ange tamaa hine madua go Jemimah, gai togolua go Keziah, gai togodolu go Keren-Happuk. 15 Gai e deai ange donu haahine i honga de henua e mahamaha bei denga damaa hine a Job. Gai delaadeu damana ne bolo hogi gilaadeu madali olaadeu daina daane.
16 Dua mee nei gai a Job ne mouli i e 140 ange ngadau; ia ne gidee ana dama ma ono mogobuna, ga dae ai loo gi de haa atangada.
17 Gai a Job gu madumadua ma de daulooloa dono mouli, i de masavaa oona ne magau ai.