Denga Psalm
Hanu dagodo o de beebaa nei
Agu made de masavaa ne sisi ai denga Psalm go magavaa o de masavaa o Moses, i daha de ngadau e 1440 b.c. ma de masavaa ne gaavee ai dangada gi Babylon, i daha de ngadau e 586 b.c. Gai se beebaa e sisi ai daahili ma dalodalo i lo te Beebaa Dabu. Gai ni dangada geegee ne siia denga daahili ma dalodalo nei i dahi masavaa looloa, gai de gau Israel ne daohi ga hai hegau ai, i de masavaa olaadeu e daumaha ai. Muli mai gai mee nei gu hagapuni ange gi muna i lo te Beebaa Dabu.
E lagolago hagadaagangaa daahili nei: hanu ni daahili e tuhi ai ma de daumaha ange ai gi de Maadua; hanu ni dangidangi i de bale, ma de buibui, aama de hagaola; hanu ni dangidangi ange gi de tala haisala; hanu ni daahili e hagaahe ange ai de abodonu i denga hagamanuuia a de Maadua, gai hanu ni dalodalo gi hagaduasala ina denga hagadaumee. Hanu dalodalo nei nii dahi dangada daudahi, gai hanu nii de huaahenua; hanu e hagaago mai dagodo lodo o dahi dangada, hanu e basa i mee o dangada alodahi o de Maadua e duasala ai.
Iesu ne hai hegau hogi i denga muna i lodo Psalms, gai denga daane ne siia de Beebaa Hoou ne langa hogi hanu muna mai i de beebaa nei. Psalms se beebaa hagamogomogo e daumaha ai dangada i denga Nohoanga dabu, mai i taamada ga dae mai ai gi iainei.
Dahi gubu hagamogomogo: “Mee alodahi e mouli gi duuhia Tagi Maolunga. Duuhia Tagi Maolunga!” (150.6)
Denga vaevaaenga
Denga Psalm e 150 e vvae i e lima hagabuulinga, aabe ni beebaa, aanei denga vaevaaenga:
Psalms 1—41
Psalms 42—72
Psalms 73—89
Psalms 99—106
Psalms 107—150
Tahi beebaa
1
(Psalm 1—41)
1 E manuuia tangada
e dee daudali i hagasaele a de gau baubau,
be ago ange i dahulinga a de gau haisala,
aabe e hagabuni ange gi de gau doo mee.
2 Aagai ia e malangilangi i hainga a Tagi Maolunga,
ma de maanadu ana hainga i de laangi ma de boo.
3 Tangada bee nei e bei de manu somo e doo laa i gaogao denga saalingaa vai;
ono hua e hhaa mai i dono masavaa donu,
gai ono lau e dee mmae donu.
Hegau alodahi aana e hai e ssula danuaa.*Jer 17.8
4 Gai de gau baubau e dee aanei olaadeu dagodo;
gilaadeu e bei dagodo o gili grain e ilihia laa i de madangi.
5 Deelaa ai, de gau baubau e dee ola naa donu i de masavaa hagamodu muna;
gilaadeu e dee hagabuni madali gilaadeu e heohi.
6 Gai Tagi Maolunga e dagitilo haiava o olaadeu e heohi,
aagai haiava o de gau baubau e duu ange donu gi de magau.