7
Se Shiggaion*Shiggaion se muna ange gi taahili. Dono hagadoonunga e dee iloo danuaa. a David ne daahili ange ai gi Tagi Maolunga i dagodo o Cush, dahi hagadiilinga o Benjamin.
1 Tagi Maolunga dogu Maadua, go koe dogu buibui;
hagamouli ina ma de hagaola ina loo au i gilaadeu alodahi e dolohia mai au,
2 gilaadeu kana oha dogu hagasaalunga bei hegau a de laiono,
ma de hangahanga dogu angaanga,
gai gu deai se dangada e hagaola ina mai au.
3 Tagi Maolunga dogu Maadua, noo au gu hai de mee nei,
noo luoogu lima gu hagahaisala donu huu au;
4 noo au gu hai ange de baubau gi tangada e noho baba laa madali au,
aabe au gu gaiaa mee a dogu hagadaumee i teai hiidinga,
5 gai dogu hagadaumee gi dolohia gi daea e ia au;
ia gi dagadagahia au gi lo te gelegele,
ma de hai au gi dagodo i lodo gelegele.
Selah
6 Tagi Maolunga, hidi age i doo bole;
hidi age hai baasi ange gi ogu hagadaumee.
Alahage balea mai au; koe gi hagasula ina de hagamodu muna heohi.
7 Denga hagabuulingaa dangada gi hagabuni mai gi oo daha;
go koe dagina gilaadeu mai i de mommee maolunga.
8 Tagi Maolunga, hagamodu ina muna o denga huaadangada.
Tagi Maolunga, hagamodu ina ogu muna
gi bei dagodo o dogu heohi, ma teai ogu haisala.
9 De Maadua heohi, go de ia e iloo dagodo lodo ma maanadu a dangada,
haia gi dee ssula hegau a tangada baubau,
gai hagassula ina hegau a tangada heohi.*Rev 2.23
10 De Maadua go dagu mee hungihungi,
ia e hagaola gilaadeu e heohi olaadeu lodo.
11 De Maadua se ia hagamodu muna heohi,
gai se Maadua e bole i hiidinga o de gau baubau i laangi alodahi.
12 Noo tangada e dee dahuli ono lodo, gai de Maadua e hakaa naa dana gadilaasa,
ia e dada naa dana mee hholu ga hagadabena.
13 Ia gu hagadabena ono goloa hebagi hagamaakau;
ia e hagadabena ono dao kaa.
14 Tilo, tangada baubau e hagahale de baubau,
gai ia e hai hegau i de vaivai dagodo ma de hhadu muna.
15 Tangada e gelia dahi geelinga,
e doo ange donu huu gi lo tana geelinga.
16 Ana hegau baubau gi aahe ange donu huu gi de ia,
dono alasala gi ahe ange donu huu gi de ia.
17 Au e hagaahe ange de abodonu gi Tagi Maolunga i hiidinga dono heohi,
ma de daahili e tuhi de ingoo o Tagi Maolunga, de Ia Maolunga Mmao laa.