8
Ange gi tagi o taahili; gai e hua bei de leo o de Gittith.*Gittith se muna ange gi denga hai daahili. Se Psalm nii David
1 Tagi Maolunga, demaadeu Ia Aamua,
doo ingoo e maolunga mmao i henua i lalo alodahi!
Koe gu hai doo mahamaha gi maolunga ange i de langi i lunga.
2 Koe gu hai denga gauligi vaaligiligi ma denga gaagaa
gi daalaa dagodo oo mmahi,
i hiidinga o dangada e kino i de goe,
gi dee mmuu ai oo hagadaumee ma dangada e suuia ange de baubau.*Mat 21.16
3 De masavaa aagu e tilo ai de langi,
go hegau aau ne hai i luoo lima,
de maasina ma denga heduu aau gu dugu i olaadeu duulanga,
4 ⌊gai au ne ssili,⌋ “Se aha tangada, gai koe ga anga ange ai gi de ia?
Gai se aha tama a dangada, gai koe ga abodonu ange ai gi de ia?” *Job 7.17-18; Psa 144.3; Heb 2.6-8
5 Koe ne hai ia gi damaa maolalo mai ange i de gau de langi,
gai koe ne hagahau ia i de mahamaha ma de hagadubu.
6 Koe ne hai ia gi dagina mee alodahi aau ne hai,
ma de dugu mee alodahi i lalo luoono vae:*1 Co 15.27; Eph 1.22; Heb 2.8
7 go denga hagabuulingaa ssiibi ma kaau alodahi,
ma manu lodo henua;
8 ma denga manu llele i lo te moana i lunga,
ma denga mamu i lo te dai,
aama mee alodahi e mouli i lausedi.
9 Tagi Maolunga, demaadeu Ia Aamua,
doo ingoo e maolunga mmao i henua i lalo alodahi!