9
Ange gi tagi o taahili; e hua i de leo o Muth Labben.*Muth Labbeni muna Hebrew e bei go de magau o tama daane. Se Psalm nii David
1 Tagi Maolunga, au e tuhi goe i ogu lodo alodahi,
ma de tala dagodo o au hegau hagalele mouli.
2 Au e malangilangi ma de tuhi goe;
de Ia Maolunga Mmao laa, au e daahili tuhi doo ingoo.
3 Ogu hagadaumee gu saavini ma gu hulo;
gilaadeu gu baakuu ma gu maakau i mada luoo mada.
4 Gai koe gu hagamodu bolo niiogu tonu;
koe gu noho i honga doo nohoanga e hagamodu ai muna i de heohi.
5 Koe gu hagasee denga huaahenua, ma de daa gi maakau de gau baubau;
koe gu hai gi dee manadua e dangada olaadeu ingoo ga hano ai e dee ngado mai.
6 De hagadaumee gu hai gi lilo ga hano ai;
koe gu oha olaadeu aduhale,
gai dangada gu dee manadua gilaadeu.
7 Aagai Tagi Maolunga e dagi ga hano ai;
ia ne hagaduu dono nohoanga e hagamodu ai muna.
8 Ia e hagamodu naa muna o henua i lalo i de heohi,
ma de hagamodu muna i tee hilihili dangada.
9 Tagi Maolunga se mommee buibui makaga niiolaadeu e duasala,
gai se mommee buibui makaga i de masavaa hai ngadaa.
10 Gilaadeu e iloo doo ingoo e hagadonusia goe;
Tagi Maolunga, koe tee tili donu gilaadeu e saalaa goe.
11 Daahili duuhia Tagi Maolunga, e noho laa i dono nohoanga i Zion!
Daalaa ange gi denga huaadangada dagodo o ana hegau!
12 Go hiidinga de ia e suuia ange de baubau e manadua;
ia e dee ngalo donu de tangi o dangada gu vaivai haia.
13 Tagi Maolunga, galo mai diiloo de hagaduasala a ogu hagadaumee au!
Abodonu mai gi de au ma gi hagaola ina mai au i de mommee o de magau,
14 gai au ga tala tuhi ai goe i denga haitoga o tamaa hine o Zion,
ma de malangilangi i kilaa i dau hagaola mai au.
15 Denga huaahenua gu too ange gi lo te geelinga alaadeu ne geli;
olaadeu vae gu llave i de galauna alaadeu ne dugu hagammuni.
16 Tagi Maolunga gu hagaago mai ono dagodo,
i dana hagamodu muna i de heohi;
de gau baubau gu boogia mai i alaadeu hegau baubau. Higgaion.†Higgaion e bei go de noho ga hagasaele aabe e maanadu.
Selah
17 Tangada baubau e ahe ange gi de mommee o de gau maakau,
madali denga huaahenua ne ngalo laa de Maadua.
18 Aagai ⌊de Maadua⌋ e dee ngalo donu gilaadeu e duasala i masavaa alodahi;
gai de tali hagalodolodo a de gau hagaau aloha e dee lilo donu ga hano ai.
19 Tagi Maolunga, hidi age, aude dugua ange gi kii dangada;
gai hagamodu ina muna o denga huaahenua i oo mada i mua!
20 Tagi Maolunga, hagamaatagu ina gilaadeu!
Haia gi iloo e denga huaahenua bolo gilaadeu ni dangada donu huu!
Selah