1 Tagi Maolunga, gu aha gu hagammao gee ai naa goe?

Gu aha gu mmuni ai naa goe i denga masavaa hai ngadaa?

2 Tangada lodo maolunga e doolohi tangada hagaau aloha;

haia gi aahe ange alaadeu hegau baubau gi gilaadeu.

3 Tangada baubau e tala hagasoenga mee i ono lodo,

ia e tuhi tangada nnoo gai e hagangadi mee Tagi Maolunga.

4 Tangada baubau e dee ssala de Maadua i dono lodo hagamaolunga;

gai de Maadua e dee maleva donu i lodo ana maanadu alodahi.

5 Ia e hagadagadaga age i masavaa alodahi;

au hagamodu e maolunga mmao, ia e dee gidee donu,

ia e hagangadi mee ono hagadaumee alodahi.

6 Ia e hagadaba i ono lodo, “Au e dee baguu naa donu;

gai au e dee duu ange naa donu gi de hai ngadaa, i denga atangada alodahi.”

7 Dono ngudu e honu i muna baubau, ma de hadu muna, aama muna hagamaatagu;

gai lalo dono alelo iai de vaivai dagodo ma de baubau.*Rom 3.14

8 Ia e mmuni i gaogao denga aduhale vaaligiligi ma e tali ai;

ma de noho e daa gi maakau dangada tigi haisala.

Ia e mmuni ma e dagitilo ai ana dangada e daa.

9 Ia e mmuni ma de tali bei de laiono i lodo mee muimui;

ia e hagadabena e poo tangada hagaaloha,

ma de poo tangada hagaaloha i dana dae.

10 Ana dangada e poo gu lagolagohia, gilaadeu gu baakuu;

gilaadeu e dee pau ange i ono mahi.

11 Ia e hagadaba, “De Maadua gu ngalo mee nei;

ia gu haoli luoono mada gi dee gidee ai e ia.”

12 Tagi Maolunga, hidi age;

de Maadua, hagaabo ina doo lima;

aude ngalo gilaadeu e hagaduasala ina laa.

13 Gu aha tangada baubau gu hagangadi mee ai de Maadua i ana muna?

Gai gu aha gu hagadaba ai ia i ono lodo,

“Ia e dee hagaduasala naa donu au i agu mee gu hai”?

14 Aagai koe, de Maadua, e gidee de hai ngadaa ma de lili o tangada;

koe gi suuia ange mee nei i doo lima.

Go koe de tali hagalodolodo a tangada hagaaloha,

go koe e balea ange denga gauligi gu deai olaadeu damana.

15 Haadia de lima o tangada baubau e haia laa de baubau;

gai suuia ange ana hegau baubau ga dae ai gi de odi ange.

16 Tagi Maolunga e hodooligi ga hano ai e dee ngado mai;

denga huaahenua e maakau naa ga dee maaleva i dono henua.

17 Gai koe, Tagi Maolunga, ne hagallongo lodo o olaadeu e vaivai haia;

koe e hagammahi ange olaadeu lodo, ma de hagallongo delaadeu tangi,

18 Go koe e hagamodu ina dagodo o denga gauligi e deai olaadeu damana

ma de gau e vaivai haia,

gai gi dee hagamadagu ina ai e tangada baubau gilaadeu.