1 Tangada lodo senga e hagadaba i ono lodo,

“E deai donu se Maadua.”

Gilaadeu alodahi e hakino gee, alaadeu hegau e hai e baubau;

e deai donu se dangada e haia tanuaa.

2 Tagi Maolunga e galo iho i de langi ma e tilo dangada,

e tilo be hanu gilaadeu e heiangi, aabe hanu gilaadeu e saalaa de Maadua.

3 Gilaadeu alodahi gu daahuli gee,

gilaadeu alodahi gu hakino gee;

gu deai donu se dangada e haia tanuaa,

gu deai donu se dangada daudahi.*Rom 3.10-12

4 E aha, dangada e haia de baubau tigi heiangi nei donu —

gilaadeu e vaivai hai ogu dangada bei de gai a dangada pelaoaa,

ma gilaadeu e dee dalodalo ange gi Tagi Maolunga?

5 Aagai gilaadeu e maatagu mmao,

go hiidinga Tagi Maolunga e madali gilaadeu e heohi.

6 Goodou e haia de baubau, e hakadanga

i hagatau a de gau hagaau aloha,

aagai go Tagi Maolunga delaadeu mommee buibui.

7 Mee naa gi humai de hagaola o Israel i Zion!

De masavaa a Tagi Maolunga e hagaahe ange ai de manuuia o ono dangada,

gai Jacob gi malangilangi, Israel gi lodo danuaa!