1 De Maadua, koe gi dee noho donu huu gi dee muu;

de Maadua, aude noho donu huu, aabe gi noho gi dee muu.

2 Galo ange diiloo, oo hagadaumee gu hiihidi age e hebagi;

gai gilaadeu e kino i de goe gu daangage age olaadeu biho.

3 Gilaadeu gu hai hanu hagatau e hai baasi ange ai gi oo dangada;

gilaadeu gu hagasaele de hai baasi ange ai gi oo dangada hagamogomogo.

4 Gilaadeu e hagataba, “Loomai, gidaadeu ga daa gi odi de huaahenua laa;

gai gi dee manadua ai de ingoo o Israel.”

5 Gilaadeu gu buni e hai dahi hagatau;

gilaadeu gu hai dahi hagaheloongoi hai baasi adu ai gi de goe:

6 de gau Edom ma dangada o Ishmael,

ma de gau Moab, aama dangada o Hagar,

7 ma de gau Gebal, ma de gau Ammon, ma de gau Amalek,

ma de gau Philistia aama dangada o Tyre;

8 de gau Assyria gu dau ange hogi gi gilaadeu;

gai go gilaadeu e balea ange de aamuli o Lot.

9 Haia gilaadeu gi bei dagodo o de gau Midian,

ma Sisera aama Jabin i gaogao ssaalingaa vai go Kishon,*Jdg 4.6-22; 7.1-23

10 go dangada ne maakau i Endor,

olaadeu angaanga gu bei denga duudae pobo i honga de gelegele.

11 Haia olaadeu dangada aamua gi bei dagodo o Oreb ma Zeeb,

gai olaadeu dagi gu bei dagodo o Zebah ma Zalmunna,*Jdg 7.25; 8.12

12 gilaadeu ne hagataba, “Gidaadeu ga kave de henua o de Maadua e henua ai.”

13 Dogu Maadua, ilihia saele gilaadeu bei denga helii,

ma denga gili grain e gaavee gee laa i de madangi.

14 Haia gilaadeu gi bei de mommee e ula laa i lodo henua,

gai gi bei de ahi e haulasia denga mounga,

15 gai koe gi ilihia gilaadeu i de madangi ssau

gai gi hagamaatagu ina gilaadeu i de madangi mmahi!

16 Haia gi dookaa gilaadeu,

gai gilaadeu ga ssala ai goe, Tagi Maolunga.

17 Gai gilaadeu gi dookaa ma de maatagu ga hano ai;

gai gilaadeu gi maakau i delaadeu dookaa.

18 Gai gilaadeu gi iloo koe, go de ia e hagaingoo ange laa go Iahweh,

gai go koe donu huu de Ia Maolunga Mmao i henua i lalo alodahi.