131
Se daahili nii David ange gi de loage ⌊e hulo gi Jerusalem⌋
1 Tagi Maolunga, au e dee lodo maolunga,
gai luoogu mada e dee llodo gi lunga;
au e dee hagasaele de hai hanu hegau nnui,
aabe ni mee e dee maua e au i de hai.
2 Aagai au gu dee manavasaa ma de baba ogu lodo;
bei de gaagaa e unuunu laa i de gaanuunu o dono dinana,
dogu hagasaalunga gu bei de gaagaa gu bosu.
3 Israel, koe gi tali hagalodolodo ange gi Tagi Maolunga,
mai iainei ga hano ai e dee ngado mai.