3
Paul ma Apollos toro lutu koukolu vania God
1 Ighau rana taluutuni, tana bona tu kabukolughau i Corinth, tu mua tangomana na taraiamiu te vagha tu taraira arahei na Tarunga Tabu te hulira. Tu taraighau vamua te vagha tu taraira rana vure ni maramana tara taonighi na hulidira. Tana bona vaghana keri, tau vaghara na lei gari ta nimiu na taluutuni ta Christ. 2 Tu taraighau vamua nia na lei tarai tara malumu, na pukuna tau vaghara na lei meomeo tara tangomana vamua ge kara susura. Tu mua taraighau nia na lei totobo te manadira arahei tara loghoa na taluutuni te laga, na pukuna te mua manamiu tana bona vaghana keri. Ma tau mua tangomana itaeni ge kau ghilalai na lei ghanaghana tara vahola, Rana Hebrew 5:12-13 3 na pukuna tau taonighi so na lei nilabu ni tinoni tana maramana. Tu ghilala eni te utuni na pukuna ighau tau sopa ghaghana heghemiu mau hughuhughu ighobumiu heghemiu. Tana bona tau nea te vagha keri, tau taonighi na lei nilabu ni vure tara mua taluutuni. 4 Tana bona balu itamiu tara bosa, “Ighai tai taonia Paul,” pana balu itamiu tara bosa, “Ighai tai taonia Apollos,” tau tatea tau vaghara rana voo.
5 ?Ivei tea, tau mua ghilala ahei Apollos, ma hei inau, Paul? Iroghai toro lutu vania vamua God, moro hangaghau ge kau taluutunia na Rongorongo Uto. Iroghai toro gonighi vamua nina lutu Lord te vaheghai. 6 Inau tu ladavaghinia na Rongorongo Uto te vagha siki sakai te subasuba, ma Apollos te taraighau ge patupatua nimiu na taluutuni, te vagha siki sakai te vulivuli. Hauvaa, God vamua te vaheghau na vola vaolu me totoloa nimiu na taluutuni. Gehegehedira 18:4-11, 24-28 7 Ahei te ladavaghinia ma hei te nia tarai, rogaira toro mua haba. God vamua te haba na pukuna te vahera na vola vaolu me totoloa didira na taluutuni. 8 Ahei te ladavaghi, ma hei te taratarai ke, rogaira toro lutu koukolu, moro loghoa sakai na ghanaghana. Ma God ke sopa vahera na taba te manana didira na lutu. 9 Iroghai toro lutu sakaisonikolu vania God. Te vagha ighau nina leghai God, pana valena, te mua nimami.
Rana vure taluutuni tara vaghara na vale
Ighau ghua te vagha na valena God. 10 Nia na sonihalavu God te vaheu, tu vuivunia nina lutu God itamiu. Na lutu keri, tu gonia te vagha na mane te ghilala utoa na kisu vale, me kisua tana pari ngutu. I murina tu gonia keri, balu vure keha tara mai mara tughuruvaghinia na vale. Mana lei tinoni tara kisua na vale tana pari ngutu keri, kara righiutoa mughua ivei tara nea na kisuana. 11 Na pukuna te mua uto ke vagha kara kisua na vale tana pari keha. Na pari ngutu tu vuivuni ni kisuana na vale ivuvungana ke, a Jesus Christ. 12 Tana bona tara tughuruvaghinia na vale tana pari keri, tara kisua nia na lei totobo uto te vagha na gold, pana silver pana lei vatu vitiviti. Hauvaa balu tara kisua nia na lei totobo tara soko buto, te vagha na ghai, pana buburu pana ato. 13 Tana bongi ni dete na lei tinoni udolu kara righia na vata ni lutu tara gonia. Nina dete God ke, te vagha na lake te ghania na vale. Na dete keri ke tatea ke vagha na lei totobo tara kisui tara uto pa ra dika. 14 Ke vagha nina lutu siki sakai te kisu vale tana pari ngutu keri ke mua vavu, ke holaa nina taba. 15 Hauvaa ke vagha nina lutu siki sakai ke vavu ke, gaia ke mua holaa na taba. God ke vavolaa, hauva ma gaia ke vagha na tinoni te nia ghogho na vale tana bona ke vavu.
16 Ghanaghana olia, ighau udolu, na holohoru, nina Valetabu God, ma nina Tarunga Tabu ilokamiu. 1 Corinthians 6:19; 2 Corinthians 6:16 17 Ahei ke mai me ke tabotabo ge ke dikalaa nina Valetabu God eni ke, God ke dikalaa gaia, na pukuna nina Valetabu God te tabu. Mi ghau na Valetabu keri.
18 Bei pegopegoghau heghemiu. Ke vagha siki sakai tamiu te ghanaghana ge gaia te manaha nia na ghanaghana ni tinoni ke, te uto vania vaa ge ke vagha na bule tana matadira rana vure, ge ke manaha ta nina lei ghanaghana God. 19 Tu bosaa te vagha keri na pukuna na hava na vure ni maramana eni tara ghanaghanaa na manaha ke, aeni na totobo bule ta nina ghanaghana God. Te vagha na Gegere Tabu te bosaa,
God ke kene sodora rana manaha nia didira na manaha heghedira. Job 5:13
20 Mana Gegere tabu te bosaa ghua,
Ma Lord God te ghilalaa na ghanaghanadira tara ghanaghana tara manaha ke, te totobo lee vamua vania na vola kasila. Buka Linge 94:11
21 Keri ge kau bei talunagho na pukuna tau taonia siki manetarai keha. Na hava te utuni ke, God te vaheghau na lei totobo udolu ge ke vautoghau. 22 God te vaheghau tolughai na manetarai, Apollos, ma Peter, mi nau, a Paul ge kai hangaghau. Na lei totobo ilokana na maramana eni, na vola mana mate, mana lei totobo tara kabu itaeni, mana lei totobo kara mai ikise, God te vaheghau na lei totobo raeni. 23 Mi ghau tau nina Christ, ma Christ te nina God.