Nzryrngrkxtr Kc Ate Rut x Sam Mak 16

Jiszs Tulz-mop Mz Nzbzngr

Matiu 28:1-10; Luk 24:1-12; Jon 20:1-10

1 Mz nibr Sabat mzli kc mz nina, Mxri kc Makdala, Mxri lxede Jemes, x Salome nzvzng sc tzxpepeng da kx na-aelu-ngrdr namz ngr Jiszs. *

2 Zbz mz nourla kc topwz mz Sade, olvz kcng nztqng sc tzvzpeng mz butqbr kc. 3 Mzli kc tzvz-ngrdr mz lrpzki, sc tzpi-etrpelr kx, “?Neke naokatrle nigu mz nzalqlipxngr rplz kc? Murde etu zlwz x mrlepu.”

4 A' kx nzkrlzbzlr butqbr kc, nzmcpelr rplz kc nzalqlipxpe. 5 Nzdwatrpzng mz butqbr kc, nzpwrkilvc-ngrdr kzdq enjrl kx apule obla, x kq lrpz kxprki wxbu mz nrlarde kxrtc ngr gq kc.

6 A' rpibzle kx, “Bzkq mwxlramu. Krlzpebo kx rtangrtiamu Jiszs kc Naszret tztqlvztr mz kros. Mc-zpwxamu mrkc tzayrbq-ngrdr namz ngrde. Tryrbqpeu mrka, murde tulzpe mou. 7 A' yzluamu x pibzmu mz ncblo nedeng badr Pita kx, ‘Jiszs sa tqrtwayzpe kai Gzlili, x navz-kzpzmu mz nzrmcti-lzbq-krmu badr elr, da kc tqwai nzpi-pnz-krbzlele bamu.’ ” ✡

8 Olvz kcng nzvzpxmqng mz butqbr kc, nzrnrcti-lzbqng mz zmwxlr x sc tzngrlrpeng. Mzli lcde trpnzngr doa kx nzpine badr le, nike nzmctr mz butqbr kc. †

Kzdq Me Yrkrkipx Nrpakxmrlz Lc ‡

Jiszs Adcpx-lzbqbz Mz Mxri Kc Makdala

Matiu 28:9-10; Jon 20:11-18

9 Mz nibr nztulz-krm Jiszs mz nourla mz Sade, adcpx-lzbqbz mz Mxri kc Makdala, kc tqmaszlrpx-ngrbz Jiszs bade drka' rlimz. ✡ 10 Vz x sc tqpipebzle mz ncblo nedeng kcng drtwrdr tzvzbeng x tzyrning. 11 Kx nzxlrbzlr nzrpi-krbzle kx Jiszs lupe mou x mcle nide, trnzlxngitipwzlru natqde. §

Jiszs Adcpx-lzbqbz Mz Leplz Nedeng Nzling

Luk 24:13-35

12 Mz nibrde, mz zbq kcpwz, Jiszs adcpx-lzbq-kzpz mz leplz nedeng nzling kx nzrkalzmqng Jerusalem. Mzli kc tqadcpx-lzbq-ngrbz Jiszs badr, nzobq-krde blepxngr x trnzglxlru nide mzli kc kai. 13 A' kx nzglxlr kc nide, sc tzyzlupe-moung Jerusalem, x tzrlwape-ngrbzlr mz kztedrng amrlx, a' trnzlxngiti-kzlru natqdr.

Jiszs Adcpx-lzbqbz Mz Ncblo Nedeng

Matiu 28:16-20; Luk 24:36-49; Jon 20:19-23; Aposol 1:2-3, 6-8

14 Mz nibrde Jiszs adcpx-lzbq-kzpz mz ncblo kcng nzpnu-esz'-nrade-esz' (11) mz nzmu-krdr. X ycmnetxbz badr, murde trnzbr-kru drtwrdr, x nzmqngikr nardr, x trnzlxngiti-krdru leplz kcng tzmclr nide mz nibr nztulz-krmle mz nzbz-krde.

15 Zbz sc tqrpipebz Jiszs badr kx, “Vzpxamu mz nrlc tulvzo x lebzmu Nrpakxmrlz mz leplz amrlx. 16 X krkcng nzrlxngiting x nzwrkxtrng sa na-arlapx Gct nidr. A' krkcng trnzrlxngitiung trtxpnzngr nzrlapx-krdr. 17 Kxnzlxngitilr ninge sa nartwzng zmatq mz nzale-krdr rkx lcde seng: mz drtqnge sa narmaszlrpx-ngrng drka', x naycmneng mz natq lr mrkzbleng mz zmatq ngr Mqngrkxtr. 18 X kxmule-esz' nzrmaleng ningidoe kxrmakx x nzrmnqng lue kxrlq, a' trtxpnzngr nznibq-krdr nidr. X mzli kc tzmaletr-ngrbzlr drtq kxnzyagoxng, zyagox ngrdr nayrkrpxbz x namrlz-moung.” *

Jiszs Yzlulz Mou Heven

Luk 24:50-53; Aposol 1:9-11

19 Mz nibr nzycmne-krbz Kxetu Jiszs badr, sc tqavzdzpe Gct Heven. X wxbutxom me matq mz nrlar Gct kxrtc. ✡ 20 Zbz ncblo nedeng sc tzvzpxpeng mz nrlc tulvzo mz nzrlepxngr Nrpakxmrlz. X Jiszs okatr-zvzle nidr mz nzale-krdr da kxnzkctipxng mz nzaelwapxngr kx nzalvztr-krdr da zpwx. Eu. Delape.

*16:1 Mz nzvz-nqblq-krde Lou scdr lr Jiu trpnzngr doa kx naxpe da x narglqne da mz Sabat. Sade yzutr mz milzpq ngr Sabat mz nabznepi kc tqesz'mz. Olvz kcng nztqng nzxpeng da lc mzli lcde. Mz nzbzkr Jiszs kc, trpnzngr nidr kx aoti drtwrde kx sa nalu mou, da kc tqwai nzpi-pnz-krbzlele. Mc Mak 8:31, 9:31, 10:34 x 14:28.

✡16:7 Mak 14:28

†16:8 16:7 Mwx Enjrl lc tqpibzle drtq Pita lc, murde nabzde talvzo-ngrde nzpokia-krde kx trkrlzleu Jiszs. X mz nzxlr-krde drtqde apqtrpzle drtwrde, x krlzle kx Jiszs sc tqmrlztibe drtwrde nide. 16:8 Nrpakxmrlz kx yr Mak yrkrpx mz ngalrde kc rtqmz mz nzryrngr li kx nzyr pnz kai. A' kzdung kz nzryrngr kx nzyrlqtrpzlr ngalrde 8b mz nzrpi-krde kx, 8b “Zbz olvz kcng nzyapwxtibzlr kxpipznepwz mz Pita badr kztedeng da kcng tqpibz obla kc. X mz nibrde Jiszs sc tqatwzlrpxpe-ngrde ncblo nedeng mz nzle-krbzlr Nrpa lc tqtr x tqyctx alo mz leplz. Krlc nrpa ngr nzarlapxkr Gct leplz mz nzayrplapx-alongr mz alwx ngrdrng. Delape.”

‡16:8 Nzryrngr kxkqlu nzycng mz ngalrdr 9-20. X mz drtwr kxnzetung mz makxtr takitrde nzaolvzngr ngalrdr lcng mz nzngini-krdr natq Gct, kxmule-esz' mz drtwr kzdung leplz tryru Mak.

✡16:9 Luk 8:2

§16:11 Rblx nzrlxngitingr nide murde lr Jiu mz nzaotikr drtwrdr nzycmnekr olvz ngi da kxmane. X mz drtwrdr leplz nzlu-moungr mz nzbzngr nzwrde naesz', mz Mzli Kxmatq kc na-ayzlu-ngrbz Gct da mz leplz.

*16:18 Jiszs tr-rkapwzu natq ngr nzrmale-krdr ningidoe kxrmakx x nzrmnqngr lue kxrlq. A' ycmnetr-ngrde nzatrkatingr kxnzrlxngiting mz nzrtulrtr-ngrbz badr da kxtrka kx na-alelr, nangqdr o namnqlr. X ycmnetr kz mzli kx trnzkrlzlru da kx nzalelr. Mc Aposol 28:3-6. Mwx ningidoe drtwr ngrde Setzn. Mc kz Sam 91:13.

✡16:19 Sam 110:1; Mak 12:36