9
1 Zbz rpibz Jiszs badr kx, “A' da angidrtx lc napibo bamu. Kzdung nimu sa nalubeng mzli kc Gct na-aelwapx-ngrde zmatq ngrde mz nzvectr-krmle leplz mz nzmnclz-krbzlr bade mz nzngini-krde King rdr.” *Kxnzetung mz Nzryrngrkxtr, nzrpilr kx natq lc ngidatipe mz kzdq mzli lcng tq: mz mzli r nztekqtr-lzbqkr nrkrdrtq Jiszs, mz mzli r nztulz-krmle mz nzbzngr, o mz mzli r nzvzo-krm Mqngrkxtr mz nibr nzvzdzkr Jiszs Heven. Murde mz mzli lcng tq, Jiszs vectrple leplz bade mz nzlxngiti-krdr nide.
Nrkrdrtq Jiszs Tekqtr-lzbq
Matiu 17:1-13; Luk 9:28-36
2-3 Mz nibr zbq kcng esz'mz, Jiszs vzmile Pita, Jemes x Jon, x sc tzvzdzpeng mz kzdq newz kxetu mz nzmnc-krdr esz'-krdr. Mzli lcpwz, ncblo lcng nztqng nzobqbzng nrkrdrtq Jiszs tekqtr-lzbqpe mz zluli x lrpz scde prkitxpxpe x aglqpz'pe, myaszpxle lrpz kxprki mz nrlc tulvzo. 4 Zbz nzmclr Mosis nidr mz Elaeja, profet kcng bqnc, nzycmne-krdr badr Jiszs. 5-6 Mz nibrde sc tqrpipebz Pita mz Jiszs kx, “Kxakrlz, mrlztx angidr nzmnc-krgu mrka. Mwx nawztibzkr du matelq natq, nangi nyzm dq, nangi nyz dq Mosis x nangi nyz dq Elaeja.” A' krlc tqycmne-ngrbz Pita lc, murde nidr badr kztedeng nzmwxlr-zlwzng x trkrlzleu da kx napile. 7 Zbz kzdq dcbz akqlvztxde nidr mz zmyo ngrde. X natq Gct vzpxm mz dcbz kc, rpibzle badr kx, “Krlc mrlxnge Kxnzmrlzti. Lalztqbzmu bade.” 8 Mz nibr natq lc, nzobq-mopwzng, Jiszs kc tqtutxpepwz mrkc esz'-krde. †Natq Gct lc aelwapx-ngrde kx Jiszs x nzalvztr-krde myaszpxle ncblo kxnzetu lcng li, kxmule-esz' Elaeja nide profet kxmyapxbz x Mosis yrle Lou Kxtr. X aelwapx-kz-ngrde kx Jiszs nide Gct, x trngiu ncblo kxmatq txpwz.
9 Mzli kc tzvzneobe-ngrmlr mz newz kc, rpibz Jiszs badr kx bzkq nzpinedr nike nzmclr nakrlz-zpwxbzle nztulz-kr-mop Mrlx Leplz mz nzbz-krde. 10 Yc-lrpi mz nabzdr esz'-krdr, a' vz zvz nzveati-etr-krdrle kx nikeng tqpnz drtwr Jiszs mz nztulz-kr-mople mz nzbzngr. ‡Rblxbz badr nztwz-krdr drtwr kx Kxnzmcpx ne Gct nabz.
11 Zbz sc tzrpipebzlr mz Jiszs kx, “?Nike kxnzalvztrng mz Lou sc Mosis tzrpi-ngrdr kx profet Elaeja nayzluo-kaip mrka mz nrlc x Kxnzmcpx kc tqvz-atem?” ✡Malakai 4:5 12 Jiszs ayzlu-ngrbzle natqdr kx, “Kxnzalvztrng nztubq-angidrng mz nzrpi-krdr kx Elaeja navz-kaip mz nzoliqti-krde da amrlx. A' trnzaopxpwzu badr kx Nzryrngrkxtr rpi-kzle kx Mrlx Leplz na-aetqbz drtqde x naobqszo nide x na-atrkati nide. 13 A' napibo bamu kx ncblo kc tqngi Elaeja vzpem. A' leplz nzatrkati-kzlr nide, da kc tzwai nzatrkati-krdr Elaeja kc bqnc, mz nzvz-nqblqngr Nzryrngrkxtr.” §Trnzaopxpwzu mz lr Jiu kx Nzryrngrkxtr rpile kx Kxnzmcpx na-aetqbz drtqde x naobqszo nide, na-atrkati nide, x nanibq nide. [Sam 22:1-18; 69:8, 11, 20-21; 118:22a; Asaea 53:1-12.] Murde nzlxngitilr natq Gct kx rpile kx Kxnzmcpx nangi king kc etu na-aovxiole enqmi rdrng amrlx x na-aclve-alole leplz amrlx. A' trnzlxngitilru natq kzbleng. Jon Kxawrkxtr ngi ncblo kc tqngi Elaeja, mz nzale-krde nzwzngr kcpwz, mz nzrngisc-krde zmatq kcpwz, x mz nzmnc-krde kz lzke. X da kc tqwai Kwin Jesebel rpile nanibqle Elaeja, Kwin Herodizs kxrngi-batr-kzpz nzrnibqngr Jon. Mz nzmu-krde lc, nzmnckr Elaeja ngi rkx ngr da kx naprtzbz mz Jon. [1 King 19:1-18; 21:23-24; Malakai 4:5-6; Matiu 17:11-13]
Rblxbz Mz Ncblo Neng Jiszs Nzrmaszlrpx-krdr Drka'
Matiu 17:14-21; Luk 9:37-43
14 Mzli kc Jiszs badr Pita, Jemes x Jon tzkrlzope-ngrmlr nou newz kc, sc tzrmctipelr zbo ngr leplz kxetu tzyrlwr-ngalelvzlr ncblo nedeng kcng tzmnclzbzng mrkc. X sc tztalwzti-lzbqng badr kxnzalvztrng mz Lou sc Mosis. 15 Mzli kc leplz kcng tzmcpe-ngrdr Jiszs, nzkctipxlr x sc tzngrlrpebzng bade x tzelalvzpelr nide. 16 Jiszs rveabz badr kx, “?Nike tqtalwzti-lzbq-ngrnamu?” 17 Kzdq ncblo rpibzle kx, “Kxakrlz, vzmimc mrlxnge mrka mz nzamrlz-krbzme nide, murde drka' kc tqmncpxm bade tr-rlr-ngrpwzleu bade nzycmne-krde. 18 X mzli kznikeng drka' lc dwasz-ngrde nide, sc tqprtilzpe nimz x tqrtctxope-ngrde mz drtc', vz vz nqbya ngr naode tqwxbutxtrpebz, madqlvztxde nqngide, x sc tqlulwxkz'pe. Rlxtibo mz ncblo nemqng nzmaszlrpx-krbzlrle, a' rblxtile nidr.” 19 Jiszs rpibzle kx, “?Nike nawai-mopwc' bamu? Nzmnc-krbo bamu mzli boipe! A' trkrlzkalamu nzrlxngitingr x narmu kc tqmqngibe. Vzmimamu doa la bange.” 20 Zbz sc tzvzmipebzlr bade. A' mzli kc drka' kc tqmcpe-ngrbzle Jiszs, sc tqprtilzpe nimz tqrnrcpe x sc tqrtcope-ngrde mz drtc'. Sc tqtaligxpe x nqbya ngr naode kc tqwxbutrpebz.
21 Jiszs veabz mz trte doa kc kx, “?Myx mzli kx dwa-ngrbz zyagox lc bade?” Rpibzle kx, “Abzo pnz mzli kc tqtopwzbe-ngrde. 22 Vz zvz nzngi-batr-krbz drka' lc nztalz-krde mz nyr x nztao-krde mz nabzde kxlr, murde rpile nanibqle nide. Nayc mz drtwrm nigr x okatrp nigr, nzmu kx tqkrlzq nzale-ngrbz da bade.” 23 Rpibz Jiszs bade kx, “?Nike tqrpi-ngrme kx nzmu krlzx? Trpnzngr da kx rblxbz mz doa kxnzlxngitilr Gct.” 24 A' trte doa kc ani txpwz nzrpi-krbzle kx, “Eu, lxngiti-angidrx. A' okatr-kzp ninge mz nzngrgokr nzrlxngiti-krnge.” 25 Mzli kc Jiszs tqmc-ngrde leplz kxnzkqlung tzngrlr-ngrmlr bade mz nzmc-krdr nike tqalele, sc tqpnanatipele drka' kc mz nzrpi-krbzle kx, “Drka' ngr nzangqngr nradrtq x nzanabukr leplz, rngidrlvz-ngrbo bam prszpx doa la x bzkq dwatr-mopwzme bade!” 26 Zbz drka' kc sc tqnepe, x sc tqrtcope-ngrde doa kc mz drtc'. Zbz sc tqprszpxpele nide. Doa kc sc tqyrbqtxpe mrkc mz drtc' trycngrlrpeu x apupele kxbzpe. Kxnzmc leplz kxnzkqlung le, sc tzrpipelr kx, “Doa la bzpe.” 27 A' mz nzkrlzkr Jiszs kx doa kc mrlztx-angidrpe, rtrngztiobzle mqde x sc tqokatrpele nztulz-mou-krmle.
28 Zbz mzli kc Jiszs badr ncblo nedeng tzmncpxpe-ngrmlr mz kzdq ma, nzveabzng bade kx, “?Nike tqrblxti-ngrde nigr nzrmaszlrpxngr drka' kc?” 29 Rpibz Jiszs kx, “A' drka' kxmule la nzmaszlrpxpwz mz nzkrka'ngr vzmi nzaxtxngr dakxnzng.” *Mz kzdung nzryrngr kcng pnz trnzyrou natq lcng ‘vzmi nzaxtxngr dakxnzng.’ Nakrlzku kx kzdung drka' nzxplr-krdr nzmyaszpxlr kzdung kz drka'. Mzli kc drka' trprszpx-ngrdeu ncblo mz drtq Jiszs, nakrka'ku nakrlz-zpwxbzle mzli kx prszpx-ngrdele. X kzdung mzli nakrka'ku navzmi nzaxtx-ngrbz dakxnzng.
Nzwrde Krali Kx Ycmnetrngr Jiszs Nzbz-krde
Matiu 17:22-23; Luk 9:43-45
30 Jiszs badr ncblo nedeng nzrlaszlr nrlarnrlc kc tqycngr mztea Sisaria Filipae x sc tzvzkitrpelr Gzlili Provins. Jiszs trsutiu drtwrde nzkrlztikr leplz me mnc-ngrde. 31 Murde rpile namnc-txpwzng esz'-krdr badr ncblo nedeng mz nzalvztr-krde nidr. Pibzle badr kx, “Ninge Mrlx Leplz sa na-aprcbz mz zmatq ngr kxnzmwati drtwrdr ninge. Nanibqlr ninge, a' mz zbq kratq mz nibr nzbz-krnge, ninge kc tqtulzpe-mopwc'.” 32 A' ncblo nedeng trnzkrlzlru drtwr ngr nzrpi-krde kx Kxnzmcpx sa nabz. A' naodr mya nzveati-krbzlr drtwr ngrde. ✡Mak 8:31-33; 9:11-12
Doa Kx Myalz-zlwzbz Mz Nzobqkr Gct
Matiu 18:1-5; Luk 9:46-48
33 Mz nibr nzyzlu-kr-mop Jiszs badr ncblo nedeng mztea Kzpznizm, sc tzvztrpeng mz ma kc tzmnc-ngrdr. Zbz Jiszs rveabz badr kx, “?Nikeng tqycmnetr-ngrnamu mzli kc tqvz-ngrmgu mz lrpzki?” 34 A' naodr mya nzayzlu-krbzlr natqde, murde tztalwzti-lzbq-ngrdr neke kx myatxpxbz mz nzobq-krde. 35 X sc tqawxbupele aposol kcng, tqrpipebzle badr kx, “Mrlx kx nangi doa kxmyalz, na-avzo-lzbq x nawztrpz mz kztedeng amrlx.” 36 Zbz vzmibz Jiszs kc doa kxtopwz, atubzle mz mzlirdr. X lolvztrple doa kc bade x rpibzle badr kx, 37 “Mrlx kx vz-nqblqle ninge mz nzabrtzlvz-krde doa kxtopwz mz drtqnge, abrtzlvz-kzle ninge. X krkc tqabrtzlvzle ninge, trabrtzlvzleu ninge esz'-krnge, a' abrtzlvz-kzle Trte kc tqatwzlr-ngrmle ninge.” ✡Matiu 10:40; Luk 10:16; Jon 12:44
Mrlx Kx Prtr Mz Nrlarde Nyz Jiszs
Luk 9:49-50
38 Zbz Jon rpibzle bade kx, “Kxakrlz, mckr kc ncblo kx rmaszlrpxngr drka' mz drtqm. A' pibzkr bade kx naesakipe, murde trprtrpuu bagu.” 39 A' rpibz Jiszs kx, “Bzkq rpwa'-ngrbzmu bade! Mrlx kx alele da kxmatq mz drtqnge, rblxbz bade nzpibqti-krde ninge. 40 Murde mrlx kx tr-rpwa'-ngrmleu bagu nzale-krgu nzwz-krgu, tukile mz nrlarde nyzgu. 41 Da angidrtx lc napibo bamu. Mrlx kx rkabz mqmu lue mz nzngini-krmu doa nengeng, sa nakabz Gct bade da kxmrlz mz nzabrtzlvz-krde nide.
Bzkq Atrkatiq Nzrlxngitikr Kzdu-kzng Leplz
Matiu 5:29-30; 18:6-9; Luk 17:1-2
42 “Aclvetio-lzbq murde ma tqatrkatiq nzrlxngitikr doa neng Gct. Murde Gct sa na-ayrplapx-zlwzle ncblo kx ataole mz alwx doa kxpobe mz nzrlxngitingr. Nzayrplapxngr nide namyaszlzle mrlx kx nzpetrpz rplz kxetu mz drtwrde x nzrtcongr prla me boongr. Mwx mrlz nzrnibqngr nide mz nrlc ka mzli kc tratrkatika-ngrde nzrlxngitikr doa ne Gct, myaszpxle nzayrplapx-alokr Gct nide mz alwx lc kalr. 43-48 Mz nzmu-krde lcde, aclvetio-lzbq kz murde ma tqatrkati-lzbqq. Mz mzli r nzatalzngr dwatx ani. Mz nzatalzngr kx batrpzle nztao-zvz-krm mz alwx, katxpx-lzbqm bade. Nzvztr-krm Heven kalr myaszpxle nzmnc-nrwx-krm mz nrlc ka. X nzaetq-krm drtqm mz nzmncngr kxtubq mz nrlc ka, myaszpx-zlwzle nzprtr-krm mz Hxl kalr, mrkc nzayrplapxkr Gct kxnzaleng alwx tresakiu apule be kc trbzu, x nzetqkr drtqdr tryrkrpxpwzu apule nyr kx ngctx alo. ✡Asaea 66:24 49 Kxmule-esz', a' mz nrlc ka nzkxpu-krmung nzapulr nyr mz nzalqngi-krdr nzrlxngiti-krmu. 50 Nzkxpungr lcng mrlz. A' rblx nzlolvz-amqngi-krmu nzrlxngiti-krmu nzmu napxtxpx-ngrnamu nzatubqtingr kc navzpxm mz nzkxpungr lcng. Rlr-ngrbzmu nzkxpungr lcng nzatubqti-krdr nimu murde namnc-zpwx-mouamu badr kztemung.” † 9:49-50 Rblx nzpi-angidrngr drtwr ngr ngalrde lcng. Murde trnzkrlzu nike drtwr Jiszs mz nzycmne-ebzpxngr lc. Vz-nqblqkr drtwr kxesz' mz nztekqtr-ngrdeng.
*9:1 Kxnzetung mz Nzryrngrkxtr, nzrpilr kx natq lc ngidatipe mz kzdq mzli lcng tq: mz mzli r nztekqtr-lzbqkr nrkrdrtq Jiszs, mz mzli r nztulz-krmle mz nzbzngr, o mz mzli r nzvzo-krm Mqngrkxtr mz nibr nzvzdzkr Jiszs Heven. Murde mz mzli lcng tq, Jiszs vectrple leplz bade mz nzlxngiti-krdr nide.
†9:8 Natq Gct lc aelwapx-ngrde kx Jiszs x nzalvztr-krde myaszpxle ncblo kxnzetu lcng li, kxmule-esz' Elaeja nide profet kxmyapxbz x Mosis yrle Lou Kxtr. X aelwapx-kz-ngrde kx Jiszs nide Gct, x trngiu ncblo kxmatq txpwz.
‡9:10 Rblxbz badr nztwz-krdr drtwr kx Kxnzmcpx ne Gct nabz.
✡9:11 Malakai 4:5
§9:13 Trnzaopxpwzu mz lr Jiu kx Nzryrngrkxtr rpile kx Kxnzmcpx na-aetqbz drtqde x naobqszo nide, na-atrkati nide, x nanibq nide. [Sam 22:1-18; 69:8, 11, 20-21; 118:22a; Asaea 53:1-12.] Murde nzlxngitilr natq Gct kx rpile kx Kxnzmcpx nangi king kc etu na-aovxiole enqmi rdrng amrlx x na-aclve-alole leplz amrlx. A' trnzlxngitilru natq kzbleng. Jon Kxawrkxtr ngi ncblo kc tqngi Elaeja, mz nzale-krde nzwzngr kcpwz, mz nzrngisc-krde zmatq kcpwz, x mz nzmnc-krde kz lzke. X da kc tqwai Kwin Jesebel rpile nanibqle Elaeja, Kwin Herodizs kxrngi-batr-kzpz nzrnibqngr Jon. Mz nzmu-krde lc, nzmnckr Elaeja ngi rkx ngr da kx naprtzbz mz Jon. [1 King 19:1-18; 21:23-24; Malakai 4:5-6; Matiu 17:11-13]
*9:29 Mz kzdung nzryrngr kcng pnz trnzyrou natq lcng ‘vzmi nzaxtxngr dakxnzng.’ Nakrlzku kx kzdung drka' nzxplr-krdr nzmyaszpxlr kzdung kz drka'. Mzli kc drka' trprszpx-ngrdeu ncblo mz drtq Jiszs, nakrka'ku nakrlz-zpwxbzle mzli kx prszpx-ngrdele. X kzdung mzli nakrka'ku navzmi nzaxtx-ngrbz dakxnzng.
✡9:37 Matiu 10:40; Luk 10:16; Jon 12:44
✡9:43-48 Asaea 66:24
†9:50 9:49-50 Rblx nzpi-angidrngr drtwr ngr ngalrde lcng. Murde trnzkrlzu nike drtwr Jiszs mz nzycmne-ebzpxngr lc. Vz-nqblqkr drtwr kxesz' mz nztekqtr-ngrdeng.