Nzryr-krbz Pol Mz Lr Filipae
Natq Ngr Nzaplxtqngr Mz Nzryr-krbz Pol Mz Lr Filipae
Letz lc yrbz aposol Pol mz lrmakxtr kcng tzmncng taon kxetu Filipae mz provins kc Masedonia. Mzbq ka Masedonia nzrpibz kandre kc Gris. Trgalr lr Filipae kxnzrlxngiting mzli kx Pol nidr badr Saelas, Timoti, x Luk nzkrlzbzlr mrlcde mz nzvzpx-krde krali mz yiz 51 AD mz nibr nzrmcngr mz Jiszs. ✡Aposol 16:6-40 A' sc tzlxngiting mz nzryapwx-krbzlr Nrpakxmrlz badr. Oklati-moule nidr mz nibrde. Mz nzwzngr lc, leplz nzkqlung kxtrngiulrJiu nzrlxngitilr Jiszs.
Yrle letz lc mz nzwrde kc kai tqmnc-ngrde mz presin mrkc Rom. ✡Aposol 28:30-31 Yrle mz mzlir yiz 60—62 AD. Mzli lc tqyr-kzpzle letz mz Filimon, lr Efiszs, x lr Kolosia. Letz lcng amrlx dzbede esz' kx nzyrng mz presin. Mz letz lc awibz mz lr Filipae murde nzatwzlr-ngrbzlr trau x Epafroditzs bade mz nzokatr-krdr nide.
Nzalvztrngr kxmyapxbz mz letz lc rpile kx na-aelalz-ngrm drtwrgu nzaetqngr drtqgu mz nzvz-nqblq-krgu Jiszs Kxnzmcpx. Murde mz nzaxvctr-krbzku bade mz nzetqkr drtqde, sa na-amrlzle nigu. Pol rpi-kzle kx leplz neng Gct drtwrdr naesz'ti x na-aclvetio-lzbqng mz kxnzalvztr-rbrng.
Mrkcng Mz Letz Lc
Pol awibz mz lr Filipae x krka'-ngrde nidr. [1:1-11]
Kxmule-esz' Pol mncpxm mz presin, drtwrde elalzm, murde suti drtwrde kx leplz naglqlzlr Kraes. [1:12-26]
Pibzle badr kx natu-amqngi-zvzng mz nzrlxngiti-krdr, x nzmnc-krdr natakitrde leplz neng Gct. [1:27—3:1]
Pibzle badr kx na-avzo-lzbqng da kc tqwai Kraes ma nzavzo-lzbq-krde. [2:1-11]
Pi-kzpzle badr kx navz-nqblqlr nzmnc-krde x natq Kxetu nakrlzbzle nzbz-krdr. [dckrlzde 3]
X pi-mopwzle badr kx naesz'ting mz drtwrdr, na-abrtzlvz-zvzlr nzkrlz-krdr Kxetu, x drtwrdr naesapx mz nzmnc-zpwxngr kx kabz Gct badr. [dckrlzde 4]
1
1 Ninge Pol, nigr ncdr Timoti, kxnzawz-nrbalqng ne Mevalu Jiszs.
Ryrbzkr bamu, nimu leplz kxnztrng ne Gct amrlx kx nzaxvctrpzng mz Mevalu Jiszs. Nimu kcng tzmncng mz taon Filipae, badr kxnzaclvelr nimu x kxnzaclveng dalr makxtr. 2 Krka'-ngrne kx Gct Trtegu x Kxetu rgu Jiszs Kxnzmcpx, naokatrlr nimu mz zmrlz ngrdr kxmyalz murde namnc-zpwxamu.
Pol Krka'-ngrde Lr Filipae
3 Awi-zvz-ngrbo mz Gct rnge mz nzdcpxkr mz drtwrnge nimu. 4 X mzli kznikeng krka'-ngrne nimu amrlx, krka'-abrtz-zvzx. 5 Murde okatr-zvzamu ninge mz nzwz-lxblr-krgu mz Nrpakxmrlz, yzuo mzli kc kai tqrlxngiti-ngrnamu, krlzmle mzli ka. 6 X krlzti-angidrx kx Gct dekc tqayzutrpzle nztekqtr-krde nimu, x sa navz zvz nztekqtr-krde nimu nakrlzbzle mzli kx na-ayrkrpx-ngrdele, mzli kc nayzlu-mou-ngrm Mevalu Jiszs. 7 Nimu la tqyc zvz mz drtwrnge. X takitrde nzaoti-zvzkr drtwrnge lc nimu amrlx ngrmu. Murde nargu tutr-lxblrpe mz nzwzngr kxmrlz mzli ka tqmncpx-ngrmc mz presin, x mzli kc tqaxplrtr-ngrne Nrpakxmrlz mz nzalvztr-krnge. 8 Krlz Gct kx trpokiawxu mz nzrpi-krbo kx nzmrlzti-zlwz-krnge nimu vzpxm mz nivz lr Mevalu Jiszs.
9 X krka'-ngrne nimu, kx nivz lrmu naetunepx zvz, mz nzkrlz-angidr-krmu Gct x nzabrtzlvz-krmu da kxtubq. 10 X nakrlzamu nzrmcpxngr da kx brngz-esz'ngr, x nzmnc-krmu natubq x natr nakrlzbzle mzli kc Kraes nayzlu-mou-ngrmle. 11 X krka'-ngrne kx nztubq-krmu lc naetunepx zvz mz nzaxvctr-krbzmu mz Jiszs Kxnzmcpx, murde leplz naglqpxlr Gct.
Nzmnctr-ngrbz Mz Kraes
12 Mzlengeng x inwengeng, abrtztx-ngrne nzpi-krbo bamu kx kxmule-esz' nzatrkatilr ninge, a' krlc okatrle x axplrle nzwz-krnge mz Nrpakxmrlz. 13 Murde kxnzaclveng mz ma nyz King kc etu mrka Rom x kzdung kz leplz nzkrlzlr kx mncpxmc mz presin murde wztrpo mz Kraes. 14 Nzmncpx-krmc lc mz presin, apqtr-mopwzle nabz mzlegung kxnzkqlung. X mzli ka nelzdr br mz nzpipx-krdr Nrpakxmrlz, x trnzmwxlrpeung. 15 Kxmule-esz' kzdung nidr nzdobulvzlr x sc tzyapwxtipx-ngrdr Nrpakxmrlz mz drtwr kxmwa, a' kzdung nzryapwxpxng murde suti drtwrdr nzokatr-zpwxlr ninge, vzpxm mz nivz lrdr. 16 X nzkrlzlr kx Gct mcpxle ninge mz nzaxplr-krnge nzwzkr Nrpakxmrlz. 17 A' ncblo lc-kzng tzyapwxtipxlr Kraes, murde suti drtwrdr namyalzng mz nzamatqkr leplz nidr. X nzrpilr na-aetunepx-zlwzlr nztalvzokr nabznge mzli ka tqmncpx-ngrmc mz presin. 18 A' sa tqmrlz ye! Murde da kx myapxbz ngi nzvz-zvzkr nzryapwxtipxngr Kraes. Kxmule-esz' nzyapwxtipx mz nabz kxnzpokiangr o mz nabz angidr, a' nzryapwxtipxngr Kraes, dela tqabrtz-ngrne. X abrtz-zvz-ngrne. 19 Murde krlzx kx sa na-aovxiox mz nzkrka'-krmu ninge, x mz nzokatrkr Mqngr Jiszs Kxnzmcpx. 20 Da kx pqtx zlwz mz drtwrnge, x da kx obqtipxx, kx bzkq taox mz nzwztr-krbo mz Kraes. A' suti zvz drtwrnge kx nelznge bzkq twz-prlzm, myapxbz mzli ka. Murde na-alex da kx naglqpxngr Kraes, kxmule-esz' mz nzlu-krnge o mz nzbz-krnge. 21 Murde mz nzmnc-krnge mz nrlc ka, mncbo mz Kraes. A' nzmu nabzx, sa namnc-zvzpebo bade Heven. 22-23 Trkrlzwxu myx kxmrlz, nzlungr o nzbzngr. Mncx mz drtwr kxli. Nzmu namnc-zvzbo mz nrkrdrtq, krlzx nzwztr-zvz-krbo mz Kraes. A' suti drtwrnge nzrlaszpx-krnge nzlu-krnge mz nrkrdrtqnge lc, murde namnctrpebo mz Kraes. Murde nzmnctr-ngrbz bade ngi da kx myapx-esz'ngr. 24-25 A' krlzx kx sutibe drtwrmu ninge. Mz nzmu-krde lcde, krlz-kzx kx sa nalubex. X sa namnc-zvzbo bamu mz nzokatr-krnge nimu. Murde nzlxngiti-krmu Jiszs x nzabrtzlvz-krmu nide naetunepx. 26 X nayzlu-mopwc' mzli kc Mevalu Jiszs na-avzpx-ngrmle ninge mz presin, murde na-abrtzlvz-kzamu nzkrlz-krbo nimu.
Tu-amqngiamu Mz Nzotangr
27 Kxmule-esz' da kx prtz, a' da amrlx kx aleamu natakitrde Nrpa ngr Kraes. Murde kxmule-esz' vzmc mz nzmc-krnge nimu mz mzke', o mncmc rlru, a' naxlrtxpwo nrpa kx tu-amqngiamu mz drtwr kxesz', mz vea ngr Nrpakxmrlz. 28 Bzkq mwxlrtiamu ncblo kcng tqotaamu badr, murde Nrpakxmrlz aelwapx-ngrde kx Gct sa naodatile nidr, a' na-arlapxle nimu. 29 Gct rlr-ngrbzle bamu nzwztr-krbzmu mz Kraes murde lxngitiamu nide. X rlr-kz-ngrbzle nzetqtr-krbz drtqmu bade. 30 Murde mzli ka nzkxpungr kcpwz tqrmctiamu, dekc tqrmcti-zvzx.