1 Hoka pan nia Ikonium oyo, Paulus runa Barnabas uaso onususo pan sio Yahudiu no numa mananoune sirinia. Pani rei oaunauso iake, reiso sio panesi oparisaa tau Yesus, sio Yahudiu runa sio wason sio Yahudiu tewa. 2 Ne sio Yahudiu umau openeso oparisaa tau Yesus, reiso oapamanu sio wason Yahudiu tewa na ouna sio rei anoo rasaa tau sio wason oparisaa. 3 Reiso uaso orueso potuina pan rei. Oaunauso rerihoni Upuri, okaitau tewa. Upuri iatuheteso ata sio no maunauna rerihoni sapani na irui iake osiso areimo manisate. Iatuheteso tau irui kawasa osiso na ouna sima-simana waron retuhete ata no kawasa rerihoni Anahatana runa sima-simana raasiraso. Sima-simana sani osuiseneso runa onei sakahatena. 4 Sio Ikonium wason osamaso tau ua. Sio umau opusu sio Yahudiu na openeso oparisaa tau Yesus, sio umau opusu sio maisosia uaso.

5 Oyo sio wason sio Yahudiu tewa, sio Yahudiu, runa sio ona Yahudiu oheu, nanie ouna uaso sinsaraso. Nanie orauso tau hatu. 6 Ne uaso oatinu rerihoni kaheute rei, reiso orumaso nau nia Listra, nia Derbe runa otoe Likaonia pusiki. 7 Tau otoe rei, osima na Sou Iake rerihoni Yesus.

8 Paulus runa Barnabas ohokaso nau nia Listra, oyo osupu ia isa wain ieu ise-ise. Ia reimo iamrai san rei. On iamrai ieui tau ain tewasi. Ain atua manna. 9 Waini iru-ruei iatinu Paulus iaunauso. Paulus iroui, oyo ianei ata iparisaa ata Anahatana imaha iunai iake. 10 Reiso Paulus iasau osiki nioi mainae, “Hitio roe. Aoo katopu!” Oyo isoman roe, oyo ieui.

11 Sio hutue rei wason oatinu tau Paulus ne maunauna onoo Paulus ne sima-simane rei, oyo oakapona tau sio no sou, areimo sou Likaonia. Oahata, “Sio wason ita iainaa runaso okaisunso mai tuniai reini nea! Ouna tumatau nea!” 12 Oyo ohete Barnabas nanai tau Seus. Ohete Paulus nanai tau Hermes. Tau sae, sio Listra oainaa runa Seus runa Hermes sani sio Yahudiu oainaa runa Anahatana. Ohete Paulus nanai tau Hermes. Tea mo, ianamana iake. Hermes iae ianamana iake. 13 Reiso ia wain isaka ianori runa Seus iatinu tau rei. Ia rei isaka Seus ne numa hae niane muie. Tau numa rei, sio oainaa runa Seus. Reiso inesa koropou hanaiya runa irori kupako mai kota rei nene mitanunua. Oyo ia runa sio hutue rei, nanie orehire osi Paulus runa Barnabas oainaa runaso.

14 Sio maisosia, Barnabas runa Paulus, oatinu tau rei, oyo okiha no papita na sio oanei ata openeso tau sio Listra oainaa runaso. Oruma kua sio hutue rei tihue oakapona san rei, 15 “He, omi wani ouna san rei, nanie tau sae? Ami reini mo, ami tumatau oi, tea? Ami sani omi reino oi. Ami wani asima na Sou Iake rerihoni Yesus osimo. Ami wani asau osimo ata kahurae oarihoni oainaa runa sae wani remahaiki tewa, sani Seus runa Hermes. Kahurae oainaa runa Anahatana wain iamahaiki. Anahatana sahoro ihaye nante, runa tuamane, runa nuae runa pusire waron tuniai reini. 16 Masike naone Anahatana itapiso opusu ruao no maue, 17 iatuheteso rerihoni ruai oi. Iatuheteso pusu irui iake osiso. Iuna uane osi pusita. Iuna atuhu raruhu. Tau musum tinou, iuna atuhu huaya. Reiso irui muaine osita. Iuna anori mirika.”

18 Ne masike oaunauso san rei iae, mtinte oapamanuso na pene orehi koropou rai osiso. Ne poe oyo, orehire tewa.

19 Oyo sio Yahudiu umau ohokaso mai Listra on ria kota Antiokhia ria otoe Pisidia runa otoe Ikonium, oyo oanamana osi sio panesi rotu-tu oapamanu orau Paulus tau hatu. Reiso oraui, oyo onesai pan niane muie oahata imatai. 20 Ne sio mampusua ohoriki, oyo ihitio roe, oyo inusui pan niane rei honu.

Hanu roe oyo, ieui pan nia Derbe ikata Barnabas.

21 Hoka pan nia Derbe oyo, Paulus runa Barnabas uaso osima na Sou Iake rerihoni Yesus rotu-tu sio panesi ouna Yesus ne mampusua. Oyo uaso onunso poe nia Listra, nia Ikonium runa kota Antiokhia poe otoe Pisidia honu. 22 Sui niana rai, oakahai sio mampusua na oparisaa ia-ia. Oaunauso na oparisaa asi. Oahata, “Kahurae sinsarata panesi naone, samatoro ipusu tau Anahatana irime ne mansiau.” 23 Ohiti sio onata tau sio wason oparisaa no tikana pusire. Oyo oahusieso oainisi tau Upuri wain sio oparisaa rei na Upuri ikata runaso. Oahusieso, oainisi, oamaon.

24 Oyo uaso oeuso honu onikuso poe otoe Pisidia rotu-tu ohokaso nau otoe Pampilia honu. 25 Hoka nau oyo, oaunauso tau Anahatana ne anamanaya nau nia Perga, oyo oeuso nau nia Atalia. 26 Hoka nau oyo, osaa kapane, nanie onunso pan Antiokhia. Sio Antiokhia sahoro oahusieso runa oainisi na Anahatana irui iake osiso na sio oaunauso runa ouna sima-simana. Ouna san rei nea.

27 Hoka pan oyo, uaso oanaha runa sio pusiso wason oparisaa, nanie osima runa Anahatana iuna sae pusu sio. Oruni rerihoni sapani na Anahatana iheka arena na sio wason sio Yahudiu tewa oparisaa tau Yesus. 28 Oyo uaso orue tau kota rei potuina okata sio mampusua.