1 ይኒ ፋና አስ ኑና ክርስቶሳ አሮ ፋና ጾዘ ጋꬅ ቆፋ ቆንጭዝ ታማርስዘ Ꮉዳራ እንግንትደ አስ ፋና ማህ ፋይዶ። 2 ታማርስዙንꬅ ላꬄስ አማንንትዱንꬃና ማቃደስ ቤዛነ። 3 የዝን ይን ዎይ መሉንꬅ ታላ ፍርድኮ፥ ታስ አኮን ባያ። መለ አቶ፥ ታንን ታላ አፋ ፍርዶደስ ዳንዳኦስ። 4 ታ ኤርዛን ጋር ማቅኮ ታ ዎዝንታ ታላ ፍርዶስ፥ የዝን ይናን ታ ጽሎትꬅቶ ቤዞስ። ታላ አፋ ፍርዶዳይ ላꬃ ጻላላ። 5 ይኒ ግሾ፥ ዎደ የልካይዝን፥ ላꬂ ይእካይዝን ኦደላን ፍርድፈተ። ኤ ꬉማ አችንትደ ባዝ ፎኦ ከሶዳ፤ አስ ዎዝና አችንትደ ቆፋ ቆንጭሳዳ። የ ዎደ ፈተ ፈተ ጾዘፓ ቤዝዘ ጋላታ ኤኮዳ።

6 ታ እሹንꬆ፥ ይንታና ማዶ ጋእ ታናን አጵሎሳን አዝዘ ማህ ታ ኦህዳ። ይኖ ታ ዪዝዳና፥ «ጻፍንትዳንፓ ኣꬍፈተ» ያጋዘ ዞርቶ ይን ኑፓ ታማሮደ ፋና። ይኒ ግሾ፥ ኦደን ፈታ ናሺ Ꮉንካያ ለቆደስ ቤዞስ። 7 ኔኒ መሉንꬃፓ አኮራ አ? ኔኒ ኤክካይዘባዝ አኮ የዘ? ዬዝን፥ ኔኒ ኡባ ባዝ መለ አሳፓ ኤክደባዝ ማቅኮ፥ ኤክካይዘ አስ ፋና አኮስ ጬቅንተ?

8 Ꮉተ ይን ምዥዳ። Ꮉተ ይን ዱርꬍዳ። ኑ ሻክንት ይን ጻላላ ካእትዳ። ይን ቱሮ ካእተዛኮ፥ ኑንን ይንታራ ካእቶድ የሻ። 9 ጾዚ ኑና ሐዋሩንꬃና፥ Ꮉይቆ ፍርድንትደ አስ ፋና አስ ኡባፓ ኑና ሱብ አꬅዳ ታስ አዛነ። ኑኒ Ꮉና አላምትስ፥ ኪታንቾስን አስስን ካስ ባዝ ማቅዳ።

10 ኑኒ ክርስቶሳ ግሾ ኤያ ማቅዳ፥ የዝን ይን ክርስቶሳ ግዳ ጭንጩንꬃና ማቅዳ። ኑኒ ቦዛ፥ የዝን ይን ምንꬅ ማቅዳ። ይን ቦንችንትዳ፥ የዝን ኑኒ ቶችንትዳ። 11 Ꮉይኖ የሎደስ ኑ ናይꬋነ፥ ባርꬋነ፥ ካልꬋነ፥ Ꮉꬊንታነ፤ የሳደ ኬꬅ ꬋብን ማꬋ በእነ። 12 ኑኒ ኑ ኩሽተ ኦቺ አቃነ። ኑና አስ ጫዦደራ አንጃነ፤ ኑና ባይእዘ ዎደ ዳንዳአነ። ሐዋ. 18:3 13 ኡን ኑና ጫዥዘ ዎደን ኑ ሱንꬅቶ ኢስዘ ዎደ አዳትꬃራ ማሀነ። ኑ Ꮉኖ የሎደስ አላመ ቡረን አላ ኦልንትደ ፍጾ ማቅዳ።

14 ታኒ ይኖ ጻፍዳና፥ ታ ካዽዘ ናኡንꬅ ፋና፥ ይንታና ዞሮደስ ጻፍዳ ፋትን ዬልሳደስ ባያ። 15 ክርስቶሳ ግዳ ይንታና ድችዘ ጋማ ካልꬅዙንꬅ የዝኮን፥ ይንትስ ጋማ አዱንꬅ ባያ። ታ ይንታና ክርስቶስ የሱሳ ዎንገለራ የልዳ። 16 ይኬ፥ ይን ታና አዞተ ጋእ ይንታና ዎሳነ። 1 ቆሮ. 11:1፤ ፍልፕ. 3:17 17 ይኒ ግሾ፥ አማንꬅዘን፥ ታ ካዽዘ፥ ላꬄ ባጋራ ታ ናአ ማቅደ፥ ጢሞትዮሳ ይንታጎ ኪትዳ። ኤ ዱማ ዱማ በሳ የዘ ዎሳ ኬꬃ ታ ታማርስደ፥ ክርስቶሳ የሱሳ ግዳ የዘ ታ ኦግቶ ይንታና ቆፍሳዳ።

18 ታኒ ይንታጎ የአመ ፋና አዝን፥ ኡቱራራ ኩምደ ፈቲ ፈቲ አሱንꬅ የነ። 19 የዝን ላꬂ ጋይኮ፥ ኡከራ ታኒ ይንታጎ ዮኦዳ። የ ዎደ ታኒ ኡቱራንቹንꬅ ኦህቶ ጻላላ ባይዝን ኡን ዎልቂቶን ኤሮደስ ኮያነ። 20 ጾዘ ካእቱሞ ዎልቃራ ፋትን ኦሄራ ባያ። 21 ታኒ ይንታጎ ጉፈራ ዮኦነነ ዎይ ሲቆራን አዳትꬅ አያናራ ዮኦነ? ይን አያ ዶረተ?