1 ይን ታስ ጻፍደ ኪትስ ማህታ Ꮉኖ። ፈቲ አስ ማቾ ቦችካይዛር የዝኮ ሎኦ። 2 የዝን ኦላለፓ አቶደስ ፈተስ ፈተስ ማቻ የሰ፤ ማህ ፈትስ ፈትስ አዝኒ የሰ።

3 አዝንዘ ፋ ማችትስ፥ ማችታን ፋ አዝንዘስ ኮሽዘ ባዝ ኩንꬆ። 4 ማችትስ ፋ አሽትላ አፋ ኢስ አደትꬅ ዎልቃ ባያ፥ የዝን አደትꬅ ዎልቃ እ አዝንዘስ። ይኒ ፋና፥ አዝንዘስ ኤ አሽትላ አፋ አደትꬅ ዎልቃ ባያ፥ የዝን አደትꬅ ዎልቃ ማችትስ። 5 ይን ዎሳራ ኤራꬅ ዎደ ጋምኦደስ ዞረራ ማቃንጽኮ፥ ፈተ ፈታ ካይፐተ። ይኒ ግሾ ይን ይንታና አሆደስ ጋምን፥ ጻላሄ ይንታና ፋታናመ ጋር ዎላ የዞተ። 6 የዝን ታኒ ይንታና ዞሮደስ Ꮉኖ ጋነ ፋትን ኪታ ባያ። 7 አስ ኡባ ታ ጋር ማቾ ኤክካይዛራ የዛኮ ካꬋነ፥ የዝን ጾዚ ፈተስ ፈተስ እንግደ ዱማ እሞ የነ። ፈተስ Ꮉኒ ፋና እሞ Ꮉንካይስ ይኒ ፋና እሞ የነ።

8 ማቾ ኤክካይዙንꬅስን አዝኒ ገልካይዙንꬅስን ማህ አዝኒ Ꮉይቂዱንꬅስ ታኒ ጋዛና፥ ታ ጋር ኤክካይዛራ ዎይ ገልካይዛራ የዞተ ጋእ ዞራነ። 9 የዝን አሞራ ኤጽንትዛንፓ ኤክዛናን ገልዛና ሎኦ ማቅደ ግሾ ኡን ፋና አሆደስ ዳንዳአንጽኮ፥ ኤኮን ገሎ።

10 ታኒ ኤክዱንꬃናን ገልዱንꬃና Ꮉንጋራ ጋእ ዞራነ፤ ታና ባይዝን ላꬂ ኪታነ፤ ማችታ ፋ አዝንዘፓ ሻክንትፐ። ማቶ. 5:32፤ 19:9፤ ማር. 10:11-12፤ ሉቃ. 16:18 11 የዝን ሻክንትኮ መለ አዝኒ ገልካይዛራ ፋስ የዞ ዎይ ፋ አዝንዘራ ጊጎ። አዝንዘ ፋ ማችቶ ብልፐ።

12 የዝን መሉንꬅስ ላꬂ ባይዝን ታኒ Ꮉንጋራ ጋነ። አማኖሰ ማቻ የዘ አማንዘ አዝኒ የዝኮ፥ ኤ ማችታ ኤራ ፈትላ የሳደስ ኮይኮ እዞ ዳክፐ። 13 ማህ አማኖሰ አዝኒ የዘ አማንዘ ማቻ የዝኮ፥ እ አዝንዘ ኢራ ፈትላ የሳደስ ኮይኮ ኤፓ ዳክንትፐ። 14 አማኖሰ አዝንዘ ፋ አማንዘ ማችት ባጋራ ጌዣነ፤ ማህ አማኖሰ ማችታ ፋ አማንዘ አዝንዘ ባጋራ ጌዣነ። ይና ባይዛኮ፥ ኡን ናኡንꬅ ቱና ማቃነ፥ የዝን Ꮉተ ኡን ጌሽ። 15 የዝን አማኖሰ አዝንዘ ዎይ ማችታ ብሎደስ ኮይኮ ብሎ። አማንዘ ማቻ ዎይ አዝኒ ይኒ ጋርዘ ባዛራ አጭንቶስ። ጾዚ ኑና ሳሮራ የሳደ ጋር ጼግዳ። 16 አማንዘ ማችተ፥ ኔኒ አማኖሰ ነ አዝንዛ አሾድ የዛኮ አኮ ኤረ? ዎይ አማንዘ አዝንዛዮ፥ ኔኒ አማኖሰ ነ ማችቶ አሾድ የዛኮ አኮ ኤረ?

17 ፈቲ ፈቲ አስ ላꬂ ኤስ እንግደ እሞትꬅተ ጾዚ ኤዛ ጼግዳን ጋር የዞ። ዎሳ ኬꬃ ኡባ ታኒ ታማርስደ ዎግታ Ꮉኖ። 18 ኦደን ጋራዝንቲ አማንዳ ማቅኮ፥ ጋራዝንትካይዘ ፋና ይእፐ። ጋራዝንቲ አማንደ ኦደን የዝኮ፥ ጋራዝንቶደስ ኮይፐ። 19 ጾዘ ኪቶ ፎሎደስ ቤዛነ ፋትን ጋራዝንትን ጋራዝንታንጽ አሽን አኮን ማዶስ።

20 ፈቲ ፈቲ አስ ጾዚ ኤዛ ጼግዘ ዎድተ የዛን ፋና የዞ። 21 ጾዚ ነና ጼግደ ዎድተ ኔኒ አሮ? አኮ ባያ ይንስ ኡንእንትፐ። የዝን ኔኒ አሮትꬃፓ ዋሎ ኬሳደስ ዳንዳእኮ ኔፓ አትፐ ከዞ። 22 አሮ ማቂ የዝተራ ላꬄ ግዳ ጼግንትደ አስ ላꬄ ግዳ አሮትꬃፓ ዋሎ ከዝዳ። ይኒ ጋር፥ አሮ ማቅካይዛራ የዝተራ፥ ላꬄ ግዳ ጼግንትደ አስ ክርስቶሳ አሮ። 23 ጾዚ ይንታና ሚሸራ ዎንግደ ግሾ አስ አሮ ማቅፐተ። 24 ታ እሹንꬆ፥ ይን ፈተ ፈተ ጼግንትደ ዎደ የዘ የስተ ጾዛራ ዎላ የዞተ።

25 ዉዱሩንꬅባዝ ላꬂ ታና ኪትደባዝ ባያ። የዝን ላꬂ ታስ እንግደ ማሮትꬅተ አማንንትዳያ ማቂ ታ ይንታና ዞራነ። 26 ይኬ፥ Ꮉተ ማꬍት ግሾ ኤክካይዛራ ዎይ ገልካይዛራ የሲ ታስ ሎኦ አዛነ። 27 ነ ማቾ ኤከዘባዝ ማቅኮ፥ ብሎደስ ኮይፐ። ነ ማቾ ኤክካይዘባዝ ማቅኮ፥ ኤኮደስ ኮይፐ። 28 የዝን ነ ማቾ ኤክኮ ናጋራ ባያ። ይኒ ጋር ዉዱርታን አዝኒ ገልኮ ናጋራ ባያ። የዝን ኤክዘን ገልዘ አሱንꬅስ Ꮉና ሳእተ ጋማ ማꬋ የዘ ግሾ ይንቲ ይንፓ አቶደ ጋር ታ ኮያነ።

29 ታ እሹንꬆ፥ ታ ጋዛና Ꮉኖ፤ ዎደ Ꮉልእዳ። ይኬፓ ቲኖ ማቻ የዘ ማቾ ኤክካይዘ ጋር የዞ። 30 ዬክዙንꬅ ዬኮሰ ጋር፥ ኡፋይትዙንꬅ ኡፋይቶሰ ጋር፥ ዎንግዙንꬅ አኮን ባይዙንꬅ ጋር ፋና ፋይዶ። 31 Ꮉና ሳአ ቆልተ ማድንትዙንꬅ ማድንቶሰ ፋና ዪእ የዞ። Ꮉና አላምት ብሽታ አꬎዳ።

32 ይን ይርጋ ባይꬅ የሳደ ጋር ታ ካꬋነ። ማቾ ኤክካይዘ ላꬃ ኡፋይሶደስ ኮይዘ ግሾ ላꬄ ባዝ ቆፓነ። 33 የዝን ማቾ ኤክዳይ ፋ ማችቶ ኡፋይሶደስ ኮይዘ ግሾ Ꮉና ሳእትባዝ ቆፓነ። 34 ኤ ቆፍታ ላምእ በሳ ሻክንታነ። አዝኒ ገልካይዘ ዉዱርታ ፋ አሽተን ፋ ሸምፕተ ጌዥ ላꬃ ኡፋይሶደስ ኮይዘ ግሾ ላꬂ ባዝ ቆፓነ። የዝን አዝኒ ገልዳና ፋ አዝንዛ ኡፋይሶደስ ኮይዘ ግሾ ሳአባዝ ቆፓነ።

35 ታኒ ይኖ ይንትስ ኦህዛና፥ ይን ማድንቶደ ጋር ጋእ ፋትን ይንታና ኡንእꬆደስ ባያ። የዝን ይን ቆፍታ ሻክንትካይዝን ዎጋራ የዚ ላꬃ ኡፋይስዘ ባዝ ይን ኦቾደ ጋር ታኒ ኦህነ።

36 ኦደን ፋ ኦጭደ ዉዱርትስ ገልዘ ዎደ አꬍዳ ጋእ እዞ አሾደስ ቆፕኮ፥ ይና ማህ ኢስ ሎኦ ማቆሳና ኤስ ስንትኮ፥ ፋ ኮይዳኖ ኦቾ፤ ኡን ኤኮን፥ ገሎን፤ ይነ ናጋራ ባያ። 37 የዝን ፈቲ አስ ኡንእꬅዘባዝ ꬋብን፥ ፋ ዎዝንተ ሚንግ፥ ፋና ናጊ፥ ፋ ኦጭደ ዉዱርቶ ኤካንጽ አሾደስ ኮይኮ ሎይꬅዳ። 38 ይኒ ግሾ፥ ዉዱርቶ ኤክዘ አꬄ ሎይꬅዳ፤ ማህ ኤኮሰ አꬄ ጋማ ሎይꬅዳ።

39 ማችታ ፋ አዝንዘ ፋጻ የዘ ዎደ ኡባ ኤራ አጭንትዳ። የዝን እ አዝንዘ Ꮉይቂኮ፥ ፋ ኮይደ አዝኒ ገሎደስ ዳንዳአነ። ማቆየዝን፥ እዛ ገልዘ ꬊራ አማንዘ አስ ማቃደስ ቤዛነ። 40 ታ ቆፋ ማቅኮ፥ እዛ ገልካይዛራ የዝኮ ኡፋይሳራ የሳዳ። ማህ ታስን፥ ታራ ጾዘ አያና የዛ አዛነ።