1 ጭማ ነ አዳይ ፋና ቦንቾፕ አትን ካጭፐ። ይꬉንꬃና ነ እሸ ፋና ማህ ቦኦ። 2 ማች ጭሙንꬃና ነ እንቲ ፋና፥ ዉዱሩንꬃና ነ ምሹንꬅ ፋና፥ ፎሎ ጌሻትꬃራ አይኮ።

3 አዝኒ Ꮉይቂደ ቱሪ ቡዳኑንꬃና ማዲ ቦንቾ። 4 የዝን ቡዳንትስ ናኡንꬅ ዎይ ናኡንꬅ ናአ የዝኮ፥ የንꬅ ናኡንꬅ ቱሪ አያና የስ የዛኖ ቤሳደ ፋና የልዱንꬃናን፥ ፋ አፍቶን ማይዛያን ማዲ ኩሸ ማሄ ታማሮ። ይና ጾዝ ኡፋይስዘ ባዝ።

5 ፋ ፋስ የዘ ቱሪ ቡዳንታ ጾዘፓ ማደ ደንጎደስ ኡፋይሳራ ናጋነ። አዋራን ቃማ ጾዚ ፋና ማዶደ ፋና ዎሳራ ምንጋነ። 6 የዝን Ꮉና አላምተ ሎኦ የስ ጻላላ ኮይዘ ቡዳንታ ፋጻ የዛራ Ꮉይቂዳኖ። 7 ኦንን ኡንታና ቦራመ ፋና Ꮉና ትምርትቶ ኡንትስ እንጎ። 8 የዝን ፋ እግኑንꬅስ፥ ኡባፓ አꬂ ፋ ካራ አሱንꬅስ ቆፖሰ ኦንን ፋ አማንቶ ካድዳያ፤ አማኖሰ አሳፓን ወዝ ኢታ።

9 በረ እዝፑንታም ኩምካይዘ ቡዳንትስ ሱንꬅቶ ማዝጋበ ጻፍፐ። ማህ ይንላ አፋ እዛ ፋ አዝንዘስ አማንንትዳኖ ማቆደስ ቤዛነ። 10 ናኡንꬃና ድቼራ፥ ዛቆ ሞከራ፥ ጌሹንꬅስ ቶሄ ሜጨራ፥ ማꬍꬍደ አስ ማደራ፥ ሎኦ ኦቻ ኡባስ ፋና አꬂ እንግዳኖን ሎኦ ኦቻራ ኤርንትዳኖ ማቃደስ ቤዛነ።

11 የዝን ናአትꬅ ማቅደ አዝኒ ባይዙንꬅ ሱንꬅቶ ማዝጋበ ጻፍፐ። ኡንታና አዝኒ ገለ ገሎ ጋዘ አሾ አሞ አይክዘ ዎደ ክርስቶሳ አሾዳ። 12 ኡን ቲኖ ገልደ ቃልቶ መንꬅደ ግሾ ፍርድንቶዳ። 13 ይንላ አፋ ኡን ኦቻ ꬋብን ኬꬃፓ ኬꬂ ዉቶዳ። ዉተ ጻላላ ባይዝን ዝግርስን ፋና ገልꬆሰ ባዛ ገሊ ቤዞሰ ባዝ ኦህንታነ። 14 ይኒ ግሾ፥ ኑ ሞርኩንꬅ ኑላ አፋ ኦህንትዘ ኢታ ባዝ ደንጋመ ፋና ናአትꬅ ማቅደ አዝኒ ባይዙንꬅ አዝኒ ገሊ፥ ናአ የሊ፥ ፋ ኬꬅቶ አሆደ ፋና ዞራነ። 15 Ꮉንፓ ዛጋ ኤርꬅ አዝኒ ባይዙንꬅ ጻላሄ ካሎደስ ሱብ ማቅዳ።

16 ፈቲ አማንዘ ማችታ ካራ አሱንꬅ ግዳ አዝኒ ባይዛና የዝኮ እዛ ኡንታና ማዶደስ ቤዛነ። ይኒ ጋር ኦችኮ፥ ዎሳ ኬꬅስ ቶፎ ፎላነ። የ ዎደ ዎሳ ኬꬅታ ማደ ቤዝዘ ቱሪ አዝኒ ባይዙንꬃና ማዶደስ ዳንዳእነ።

17 ዎሳ ኬꬂ ሎይꬂ የንግዘ ጭሙንꬅ፥ ኡባፓ አꬂ፥ ቃላ ሳባኬራ ታማርሰራ ላቢዙንꬅ ዳኮ ቦንቾ ኤኮደስ ቤዛነ። 18 ጌሽ ማጻፈ፥ «ቆይዳ ባሃ የꬍዘ ቦራ ዶና አጭፈ» ይኒ ፋና፥ «ኦችዘ ፋ ዳሞዘ ኤኮደስ ቤዛነ» ያጋይዳ። ማሄ 25:4፤ ማቶ. 10:10፤ ሉቃ. 10:7

19 ላምእ ዎይ Ꮉይꬕ ማርካ ባይዝን፥ ዎሳ ኬꬂ ጭማ ሞትዘባዝ ስእፐ። 20 መሉንꬅ ዣሽቶደ ፋና ናጋራ ኦችዘ ኦናን አስ ኡባ ቲኖ ሴሮ። ማሄ 17:6፤ 19:15

21 ኔኒ አስ ስኖ ብእካይዛራ፥ ፈታያ ፈታይፓ ዱሙዝካይዛራ Ꮉና ኪቶ ናጎደ ፋና ጾዘ፥ ላꬄ የሱሳ ክርስቶሳን ዶርንትደ ኪታንቹንꬅ ቲኖ ታ ነና ዞራነ። 22 ኦደላን አፋ ነ ኩሽቶ ጋዲ ሹሞደስ ኤልስፐ። መሉንꬅ ናጋራ ገልፐ፤ ነና ጌሻትꬃራ ናጎ።

23 ኔኒ ኡባ ዎደ Ꮉርግንትዘ ግሾን ነ ሳዛ Ꮉርግት ግሾ Ꮉꬅ ጻላላ ኡዥፐ፤ ኤራꬅ ዎይነ ኡዦ።

24 ፈቲ ፈቲ አሱንꬅ ናጋርታ ቆንጨ፤ ባጉንꬅ ናጋርታ ኡንታና ፍርዶደስ ኡንታፓ ቲኒ ኤርንታነ፥ የዝን መሉንꬅ ናጋርታ ሱባፓ ጋምእ ቆንጫነ። 25 ይኒ ጋር፥ ሎኦ ኦቻን ቆንጨ፤ ቆንጫንጽ እጽኮን ገንጎደስ ዳንዳኦስ።