1 ጳዉሎሳ፥ ስላሰን ጢሞትዮሳ ተሰሎንቄ ዎሳ ኬꬃ የዘ፥ ጾዘ አዳይ ባዝን ላꬄ የሱስ ክርስቶሳ ባዝ ማቅደ አሱንꬅስ ጻፍደ ኪታ።

2 ጾዘ ኑ አዳይፓን ላꬄ የሱስ ክርስቶሳፓ አꬎ ኬሃትꬅን ሳሮትꬅ ይንትስ ማቀ። ሐዋ. 17:1

3 ኑ እሹንꬆ፥ ይን አማኖራ ይን ፈታይ ፈታያን መሉንꬃና ሲቅዘ ሲቅታ ጋማ ድጭዘ ግሾ ኑኒ ይንስ ጾዛ ኡባ ዎደ ጋላቶደስ ቤዛነ። 4 ይንታና የልደ ባይእተን ማꬋ ኡባነ ገንጨራን አማኖራ ሚንግ ኤቅደ ግሾ ኑኒ ኑ ኦምተ ጾዘ ዎሳ ኬꬃ ይን ባዝ ማርክꬍተራ ይንታላ ጬቅንታነ።

5 ይን ኤ ግሾ ጋእ ማꬋ ኤክዘ ጾዘ ካእቱሞስ ቤዝዙንꬃና ማቂ ፋይድንቶደ ፋና ጾዘ ጽሎ ፍርዳስ Ꮉና ማላ። 6 ጾዚ ቱሪ ፍርዳ ፍርዶዳ። ጾዚ ይንታና ዋይꬄዙንꬃላ አፋ ዋየ ኮኦዳ። 7 ላꬄ የሱሳ ፋ ዎልቃማ ኪታንቹንꬃራ፥ ሳሎፓ የእዘ ዎደ ዋይንትዘ ይንታናን ኑና ሸምፕሳዳ። 8 ማህ ጾዚ ፋና ኤሮሱንꬃናን ኑ ላꬄ የሱስ ክርስቶሳ ዎንገለስ ኪትንቶሱንꬃና ታማ ሎጸራ ፍርዶዳ። 9 ኡን ላꬄ ቲኖፓን ኤ ቦንቾ ዎልቃፓ ሻክንት መዽና ꬋበ ፍርድንቶዳ። 10 ይና ቃምተ፥ ይን ኑ ማርካትꬅቶ ኤኪ አማንዙንꬅ ኤ ቦንችንቶደስን ሳብንቶደስ የእዘ ዎደ ኑ ይንትስ ኦህደ ኪቶ ይን አማንደ ግሾ ይን ኤዛ ቦንችዙንꬅ ግዳን ሳብዙንꬅ ግዳ የሳዳ። ኢሳ. 2:10

11 ኑኒ ይንትስ ኡባ ዎደ ጾዝ ዎስዛና ይንስ። ኑ ጾዘ ይንታና ጼግደ ደኦስ ቤዝዙንꬃና ማቂ ፋይድንቶደ ፋና ኑኒ ዎሳነ። ይን ሎኦ ባዝ ኦቾደስ አሙꬍዘ አምቶን ይን አማኖ ኦችቶ ኤ ፋ ዎልቃራ ፎሎ። 12 ይነ ኑ ጾዛን ኑ ላꬄ የሱስ ክርስቶሳ አꬎ ኬሃትꬅተ፥ ላꬄ የሱሳ ሱንꬅቶ ይን ቦንቾዳ፤ ይንታናን ኤ ቦንቾዳ።