ሐዋሩንꬅ ኦቻ
ገለ
ሐዋሩንꬅ ኦቻ ማጻፍዘ፥ ሉቃሳ ዎንገለ ካሊ ጻፍንትደ ማጻፈ። ማጻፍዘስ የዘ ኣፈ ቆፍታ ቲኖ የሱሳ ካልደ አሱንꬅ ጌሽ አያና ካልꬅን፥ ኤ ባዝ ኦህዘ ዎንገለ ቃላ፥ የሩሳላመ፥ ይሁዳ ሳአ ኡባ፥ ሳማራ፥ ሳአ ጋጻፓ ጋጻ የሎደስ (1:8) ዋይዝ የልዛኮ ኦሆደስ። ማጻፍዘ፥ ማርካትꬅ አይሁደ አሱንꬅ ግዳ አይኪ፥ ኩሙꬅ አላምተ የዘ አሱንꬅ ስኦደ ዎንꬅስ ዋይዝ ዳልገዛኮ ኦህዘ ታሪከ አይክዳያ። Ꮉይ ማጻፍዘ ጻፍዘ፥ አማንዘ አሱንꬅ ሮመ ካእቱሞ ጎልእሳደስ ግዳራ ዞርንትዘ አስ ማቅካይዛኖን አማኖ አይሁዱንꬅ ሃይማኖተ ፎሎ ኦችዛ ማቅዛኖ ኤርሶደስ ጋማ ላቢ ኦችዳ።
ሐዋሩንꬅ ኦቻ ማጻፍተ የሱሳ ባዝ ኦህዘ ዎንገለ የልꬅዘ በስታ ዎድተ ዎድተ ዳልጊ ዳልጊ Ꮉማዳኖን ዎሳ ኬꬂ ኤቅዳኖ ቤዘ Ꮉይꬕ ኣፈ ክፍለ ታጎደስ ዳንዳእንታነ፦
አማኖ የሱሳ ሳሎ ኬዚ ማቅን አይክንትዳኖ።
አማኖ እስራኤለ ሳአ ኡባ የልዳኖ።
ሮመ ጉጂ መድትራነ አባ ካለ ዉቲ የዘ ሳአ ኡባ ዳልግዳኖ ቤዛነ።
ሐዋሩንꬅ ኦቻ ማጻፍተ አꬊ በንትዘ ጌሽ አያና ኦቻ ማቃደራ፥ ጰንጠቆስጠ ዎደ የሩሳላመ የዘ አማንዙንꬃላ ዎልቃራ ዎꬍዳኖ ኦህነ። ይኒ ጋራ፥ ማጻፍዘ ግዳ ኦችንትደ ኦችቶ ኡባ በንትዳንጋራ ጌሽ አያና ዎሳ ኬꬃን ዎሳ ኬꬃ አህዙንꬃና ካልꬆዳኖን ምንꬅꬆዳኖ ጉጂ ኦህነ። ሐዋሩንꬅ ኦቻ ግዳ ኦችንትደ ኦችቶ ኪትዘ አማንዘ አሱንꬅ ደእተን ዎሳ ኬꬃ ፈተትꬃ የዘ ዎልቃ አኮ ጋር ዳማ የዛኮ ቤዛነ።
ኣፈ ቆፉንꬅ
ማርካትꬅስ ጊግንተ 1:1-26
የሱሳ ዉርሱꬅተ እንግደ ኪታን የኦደስ የዘ አያና እንግደ ኡፋይስ 1:1-14
ይሁዳ በስተ ማትያሳ ዶረ 1:15-26
ማርካትꬅ የሩሳላመ 2:1—8:3
ማርካትꬅ ይሁዳን ሳማራን 8:4—12:25
ጳዉሎሳ ሐዋረትꬅ ኦቻ 13:1—28:31
ቲኖ ሐዋረትꬅ ቅተ 13:1—14:28
የሩሳላመ ሺቆ 15:1-35
ላምእንꬃ ሐዋረትꬅ ቅተ 15:36—18:22
Ꮉይꬕንꬃ ሐዋረትꬅ ቅተ 18:23—21:16
ጳዉሎሳ የሩሳላመ፥ ቂሳርያን ሮመን አጭንተ 21:17—28:31
1
1-2 ተዎፍሎሳ፥ የሱሳ ፋ ኦችቶ አይክደ ዎደፓ ሳሎ ቅቶደ ዎደ የሎደስ፥ ኦችዳኖን ታማርስዳኖን ኡባ ታኒ ታ ቲኖ ማጻፍተ ጻፍዳ። ሳሎ ኬሳዳንፓ ቲኖ ኤ ፋ ዶርደ ሐዋሩንꬃና ጌሽ አያናራ ኪትዳ። ሉቃ. 1:1-4 3 ኤ ፋ ማꬍትፕ ሱባ Ꮉይቆፓ ደንድዳኖ ደኦ ማቂ ኡንትስ ፋና ቤዝዳ። ኦይታም ቃማ ኡንትስ በንቲ ጾዘ ካእቱሞ ኡንታና ታማርስዳ። 4 ፈቲ ኦደ ኡንታራ ዎላ ሙእተራ ኡንታና Ꮉንጋር ጋእ ኪትዳ፦ «ታ ይንትስ ኦህደ፥ ታ አዳይ እንጎዳ ጋይደ ኡፋይስ ቃልቶ ናጎተፕ አትን የሩሳላመፓ ኬዝፐተ። ሉቃ. 24:49 5 አኮስ ጋይኮ፥ ዋሐንሳ Ꮉꬃራ ጻማቅዳ፥ የዝን ኤራꬅ ዎደፓ ሱባ ጌሽ አያናራ ይን ጻማቅንቶዳ» ጋይዳ። ማቶ. 3:11፤ ማር. 1:8፤ ሉቃ. 3:16፤ ዋሐ. 1:33
የሱሳ ሳሎ ቅተ
6 ኡንትን ዎላ ሺቅደ ዎደ፥ «ላꬆ፥ እስራኤሉንꬅስ ካእቱምቶ ነ ማሆደ ዎድታ Ꮉኖ?» ያጋእ ኦጭዳ።
7 የሱሳ ኡንታጎ፥ «ታ አዳይ ፋ አደትꬅ ዎልቂተ ኦችዘ ዎድቶን በርቶን ይን ኤሮደስ ዳንዳኦስ። 8 የዝን ጌሽ አያና ይንታላ ዎꬍደ ዎደ ይን ዎልቃ ኤኮዳ። የይዝ ማቂ፥ የሩሳላመ፥ ይሁዳ ሳአ ኡባ፥ ሳማራን ሳአ ጋጻ የሎደስ ይን ታስ ማርካ ማቃዳ» ጋይዳ። ማቶ. 28:19፤ ማር. 16:15፤ ሉቃ. 24:47-48
9 ይኖ ጋይዳንፕ ማቂ ኡን በእዝን፥ ꬎቅ ꬎቅ ጋእ፥ ሳሎ ከዝን ꬎነ ኤዛ ኡን ኣፍትፓ ጌንꬅዳ።ማር. 16:19፤ ሉቃ. 24:50-51
10 የሱሳ ቅቶደራ ኡን ሳሎ ማህ በአደራ፥ ቦꬅ ማኦ ማእደ ላምእ አሱንꬅ ቲርካይዝን ኡን ካለ ኤቂ፥ 11 «ጋልላ አሱንꬆ፥ ሳሎ ብእተራ፥ ይን አኮስ ኤቅዶተ? Ꮉይ ይን በእዝን ሳሎ ቅትደ የሱሳ ይኒ ፋና ማቂ የኦዳ» ጋይዳ።
ይሁዳ በስተ ማትያሳ ዶርንትዳ
(ማቶ. 27:3-10)
12 ይንፓ ማቂ፥ ሐዋሩንꬅ ሻማሄ ደርዘፓ የሩሳላመ ማቅዳ። ሻማሄ ደርዘ የሩሳላመስ ፈቲ ክሎ መትረ ፋና የነ። 13 ኡን የሩሳላመ ገሊ፥ ፋ የዘ ፎቀ ኬꬅትላ ከዝዳ። ኡንትን፦ ጴጥሮሳ፥ ዋሐንሳ፥ ያይቆባ፥ እንድራሰ፥ ፍልጶሳ፥ ቶማሳ፥ ባርቶሎምዮሳ፥ ማቶሳ፥ እልፍዮሳ ናአ ያይቆባ፥ ፋ ሳእትስ ይቅስንትዘ ስሞናራ ያይቆባ ናአ ይሁዳ። ማቶ. 10:2-4፤ ማር. 3:16-19፤ ሉቃ. 6:14-16 14 Ꮉንስ ኡቡንꬅ ማቹንꬃራ፥ የሱሳ እንታ ማይራምራን የሱሳ እሹንꬃራን ኡባ ፈቲ ዎዝና ማቂ ምንꬂ ዎሳነ።
15 የ ዎደ ጴጥሮሳ ጼት ላምእታም ማቃደ አማንዘ አሱንꬅ ሺቅደ በስተ ደንዲ ኤቂ፥ Ꮉንጋር ጋይዳ፦ 16 «አሱንꬆ፥ የሱሳ አይክዱንꬃና ካልꬅደ ይሁዳባዝ ጌሽ አያና ቲኖ ዳዉተ ዶንተ ኦህደ ጾዘ ቃልታ ፎልንቶደስ ቤዛነ። 17 ይሁዳ ኑራ ዎላ Ꮉና ኦችቶ ኦቾደስ ዶርንትደ አስ።»
18 የዝን ይሁዳ ፋ ገነ ኦችትራ ደንግደ ሚሸራ ጋደ ዎንግዳ። ኤ ቲኖር ጉጱንቲ ጎልእን፥ ኤ ሳዝታ ፌꬍንትዳ፤ ኤ መርቅታ ዉልእንትዳ። ማቶ. 10:2-4፤ ማር. 3:16-19፤ ሉቃ. 6:14-16 19 ይሁዳላ አፋ Ꮉንዳኖ የሩሳላመ የዘ አስ ኡቡንꬅ ስእዳ። ይኒ ግሾ፥ ይና ሳእቶ ፋ ዶናራ አኬልዳማ (ሱꬅ ጋደ) ጋእ ጼግዳ።
20 «ይናን ማዝሙረ ማጻፍተ፥
«ኤ ኬꬅታ Ꮉሪ አቶ፤
ኦደን እዘ የዝፐ።
ማህ ‹ኤ ሹማትꬅቶ መለ ኤኮ› ጋእንት ጻፍንትዳ። ማዝ. 69:25፤ 109:8
21 «ይኒ ግሾ፥ ላꬄ የሱሳ ኑ ግዳ ዉቲ Ꮉንትደ ዎደ ኡባ ኑራ የዙንꬃፓ፥ 22 ማህ ጻማቅዘ ዋሐንሳ ዎድትፓ አይኪ ላꬄ የሱሳ ሳሎ ከዝደ ዎደ የሎደስ ኑራ የዙንꬃፓ ፈቲ አስ ኤ ደንድትስ ኑራ ማርካ ማቃደስ ቤዛነ» ያጋይዳ። ማቶ. 3:16፤ ማር. 1:9፤ ሉቃ. 3:21
23 ይኒ ግሾ፥ አሱንꬅ ዶርትስ ኢዮስጦሳ ጋዘ ባርሳባሳ ጋእንትዘ ዮሴፋን ማትያሳ ላምኡንꬃና ሺሽዳ። 24 ይንፓ ሱባ፥ ጾዝ ዎስተራ፥ «አስ ኡባ ዎዝና ኤርዘ ላꬆ፥ Ꮉንꬅ ላምኡንꬃፓ ነ ኦና ዶረዛኮ ኑና ቤዞ። 25 ይሁዳ ፋ በሳ ቅቲ፥ አሽደ ኦችተ ሐዋረትꬅ ኦቻ ኤኮደ ጋር Ꮉንሳፓ ኑስ ሻጎ» ጋይዳ። 26 ኡንትስ እጻ ኦልዳ። እጽታን ማትያሳስ ዎꬍን ማትያሳ ታጶ ፈቲ ሐዋሩንꬃላ ጉጅንትዳ።