1 ይንፓ ሱባ፥ የሱሳ ጽባርዮሳ አባ ካለ ፋ ታማሩንꬅስ ማህ ቆንጭዳ። ኤ ኡንትስ Ꮉንፓ ካሊ የዘ Ꮉኖትꬃር ቆንጭዳ። 2 ስሞን ጴጥሮሳ፥ ዲዲሞሳ ጋእንትዘ ቶማሳ፥ ቃና ጋልላፓ ይእደ ናትናኤላ፥ ዛብዶሳ ናኡንꬅን የሱሳ ታማሩንꬃፓ መለ ላምኡንꬅ ዎላ የነ።

3 ስሞን ጴጥሮሳ ኡንታጎ፥ «ታ ሞሎ አይኮደስ ቅታነ» ያጋይዳ። ሉቃ. 5:5

ኡን፥ «ኑንን ኔራ Ꮉማዳ» ያጋእ፥ ጎንገ ግዳ ገልዳ። የዝን ኡን ይና ቃምተ አኮ ሞሎን አይክካያ።

4 ዎንታ ጎዳ ጻልቀ ኬሳዳንፓ ቲኖ፥ የሱሳ አባ ጋጻ ኤቅዳ፥ የዝን ኤ ታማሩንꬅ የሱሳ ማቅዳኖ ኤርካያ። 5 የሱሳ ኡንታጎ፥ «ናኡንꬆ፥ አኮ ሙእዘ ባዝ የነ?» ጋይዳ።

ኡን ማህ፥ «አኮን ባያ» ያጋይዳ።

6 ኤ ማህ፥ «ይን ሞሎ አይክዘ ግተ ጎንግዘፓ ምዛቅ ዛላራ ኦሎተ፤ ሞሎ ይን አይኮዳ» ያጋይዳ። ይኒ ግሾ፥ ሞሎ አይክዘ ግቶ ምዛቅ ዛላራ ኦልዳ። ሞሎ ገሊ ኩምደ ግሾ ጎቺ ኬሶደስ ጋምዳ። ሉቃ. 5:6

7 የሱሳ ካዽዘ ታማርዘ ጴጥሮሳጎ፥ «Ꮉይኒ ላꬂ!» ያጋይዳ። ስሞን ጴጥሮሳ ኤ ላꬂ ማቅዳኖ ስእደ ዎደ ጋሪ ጋድደ ፋ ማእቶ ማእ አባ ግዳ ዶሊ ገልዳ። 8 የዝን ጎንግተ አትደ Ꮉንኮ ታማሩንꬅ ሞሎ ኩምደ ግቶ ጎቺ፥ አባፓ ጋጻ ከዝዳ። ኡን አባፓ ላምእ ጼት Ꮉꬋ ፋና Ꮉክዳ። 9 ኡን አባፓ ጋጻ ከዝደ ዎደ ኬንቼሎ ታማ ቃቃ፥ ሞሎን ቦራን ብእዳ።

10 የሱሳ ኡንታጎ፥ «Ꮉተ ይን አይክደ ሞልትፓ አነ ታስ ኮኦተ» ያጋይዳ።

11 ስሞን ጴጥሮሳ ጎንግተ ገሊ፥ ጼት እችንታም Ꮉይꬕ ዳማ ሞሎ አይክደ ግቶ ጎቺ አባፓ ጋጻ ከስዳ። ሞልታ ይኒ ጋር ጋማ ማቅኮን ሞሎ አይክደ ግቶ ፈርእካያ።

12 የሱሳ ኡንታጎ፥ «Ꮉንካ ይእ ዳይጸ ሞኦተ» ያጋይዳ። ኤ ላꬂ ማቅዳኖ ኡን ኤርደ ግሾ ኤ ታማሩንꬃፓ ፈትን፥ «ነ ኦደ?» ጋእ ኤዛ ኦጮደስ ሚንግደ ባያ። 13 የሱሳ ይእ፥ ቦራ ኤኪ ኡንትስ እንግዳ፤ ሞሎፓን ይኒ ጋራ እንግዳ።

14 የሱሳ Ꮉይቆፓ ደንዲ ፋ ታማሩንꬅስ በንትደ Ꮉንራ Ꮉይꬓንꬆ።

15 ኡን ዳይጽቶ ሙእዳንፓ ሱባ፥ የሱሳ ስሞን ጴጥሮሳጎ፥ «ዮና*ዮና፦ ግርኬ ዶናራ ዮና ጋዘ ሱንꬅታ ዋሐንሳ ጋዘ ሱንꬅትስ ሳቅን ሱንꬅ። ናአ ስሞና፥ ታና Ꮉንሳፓ አꬂ ካꬋነ?» ያጋይዳ።

ስሞን ጴጥሮሳ፥ «ዬ ላꬆ፥ ታ ነና ካꬍዛኖ ነ ኤራነ» ያጋይዳ።

የሱሳ ኤጎ፥ «ታ ꬋንግዘ ዱሮ ናኡንꬃና ዬንጎ» ያጋይዳ።

16 የሱሳ ላምእንꬃ፥ «ዮና ናአ ስሞና፥ ታና ካꬋነ?» ያጋይዳ።

ስሞን ጴጥሮሳ፥ «ዬ ላꬆ፥ ታ ነና ካꬍዛኖ ነ ኤራነ» ያጋይዳ።

የሱሳ፥ «ታ ዱሩንꬃና ዬንጎ» ያጋይዳ።

17 የሱሳ Ꮉይꬓንꬆ፥ «ዮና ናአ ስሞና፥ ታና ካꬋነ?» ያጋይዳ።

የሱሳ Ꮉይꬓንꬆ ስሞን ጴጥሮሳጎ፥ «ታና ካꬋነ?» ያጋእ ኦጭደ ግሾ ጴጥሮሳ አዛኒ፥ «ላꬆ፥ ነ ኡባባዝቶ ኤራነ፤ ታ ነና ካꬍዛኖ ነ ኤራነ» ያጋይዳ።

የሱሳ፥ «ታ ዱሩንꬃና ዬንጎ። 18 ታ ኔስ ቱሮ ቱሮ ጋነ፤ ነ ናአትꬃ የዘ ዎደ ነነስ ማእ፥ ነ ኮይዘ በሳ ቅታነ። የዝን ነ ጭንግደ ዎደ ነ ኩሽቶ ምጪ ቤሳዳ። መለ አስ ዳንጭሳዳ፤ ነ ካꬎኦሰ በሳ ካንጎዳ» ያጋይዳ። 19 የሱሳ ይኖ ጴጥሮሳ አኮ ጋር Ꮉይቆ Ꮉይቂ፥ ጾዛ ቦንችሳድ የዛኮ ቤሳደስ ጋይዳ። ይኖ ጋይዳንፓ ሱባ፥ የሱሳ ጴጥሮሳጎ፥ «ታና ካሎ» ያጋይዳ።

20 ጴጥሮሳ ሱባ ማቂ፥ የሱሳ ካዽዘ ታማርዘ ፋፓ ሱባራ የእዛኖ ብእዳ። የ ታማርዘ፥ ካዎ ሙእዘ በሳ የሱሳጎ ሺቂ፥ «ላꬆ፥ ነና አꬂ እማደ ኦደ?» ጋይዳያ። ዋሐ. 13:25 21 ጴጥሮሳ የ ታማርዛ ብእ፥ «ላꬆ፥ Ꮉይ አꬄ ዋያደ?» ያጋእ የሱሳ ኦጭዳ።

22 የሱሳ ኤጎ፥ «ታ የኦደ ዎንꬅስ ኤ ሸምፖራ የሳደ ጋር ታ ኮይኮ፥ ነና አኮ ማ? ነ ታና ካሎ» ያጋይዳ።

23 ይኒ ግሾ፥ የ ታማርዘ Ꮉይቆስ ጋዘ ኦሄ እሹንꬃና ኡባ የልዳ። የዝን የሱሳ፥ «ታ የኦደ ዎንꬅስ፥ ኤ ሸምፖራ የሳደ ጋር ታ ኮይኮ ነና አኮ ማ?» ጋይዳፕ አትን «Ꮉይቆስ» ጋይካያ።

24 Ꮉና ኦህት ባዝ ማርክꬍዳይን Ꮉኖ ጻፍደ የ ታማርዘ ኤዛ። ኤ ማርካትꬅታን ቱሮ ማቅዳኖ ኑ ኤራነ።

25 የሱሳ ኦችደ መለ ጋማ ባዝ የነ። ታ ቆፕን፥ ኡባ ባዝ ፈተ ፈተ ኦማራ ጻፍንትዛኮ፥ ጻፍንትዘ ማጻፍትስ አላመ ጋዶደስ በሲ ማቃዳ አዞስ።