20
የሱሳ Ꮉይቆፓ ደንደ
(ማቶ. 28:1-8፤ ማር. 16:1-8፤ ሉቃ. 24:1-12)
1 ዎጋ ኦደ ዎንታ Ꮉጋ ሳአ ጌዥካይዝን፥ ማግደላ ማይራማ፥ የሱሳ ሞግንትደ ቦዛ Ꮉንግ ሹችታ ቦዛ ዶንትፓ ደንድዳኖ ብእዳ። 2 ስሞን ጴጥሮሳጎን የሱሳ ካዽዘ Ꮉንካይ ታማርዘጎ ዎጺ Ꮉንግ፥ «ቦዝትፓ ላꬃ ኤክዳ፤ ኤዛ አባ ጋደዛኮ ኑ ኤሮስ» ያጋይዳ።
3 ይኒ ግሾ፥ ጴጥሮሳን Ꮉንካይ ታማርዘ ኬዚ ዎጽተራ ቦዛ Ꮉንግዳ። 4 ላምኡንꬅን ፈትላ ዎጽዳ፥ የዝን Ꮉንካይ ታማርዘ ጴጥሮሳፓ አꬊ ቲኖ ቦዝተ የልዳ። 5 የ ታማርዘ ዙጊ፥ ኤዛ ጻጽደ አፉልቶ ብእዳ፥ የዝን ቦዝት ግዳ ዎꬍካያ። 6 ስሞን ጴጥሮሳ ኤዛ ካሊ ይእ፥ ቦዝት ግዳ ዎꬊ ኤዛ ጻጽደ አፉልታ እዘ የዛኖ ብእዳ። 7 ማህ የሱሳ ኦምቶ ጻጽደ አፉላ ጻጽንት ቦዝተ ኦማ ጉሮ የዝን ብእዳ። የ አፉልዘ ዱማ በሳ የነፕ አትን ቦዛ አፉላራ ዎላ ባያ። 8 የ ዎደ ቲኒ ቦዝተ የልደ Ꮉንካይ ታማርዘ ገሊ ብእ አማንዳ። 9 የሱሳ Ꮉይቆፓ ደንዶደስ ቤዛኖ ኦህዘ ጌሽ ማጻፈ የዘ ቃልቶ ኡን Ꮉጋ ቲርካያ። 10 ይንፓ ሱባ፥ ኤ ታማሩንꬅ ፋ ካራ ማቂ ቅትዳ።
የሱሳ ማግደላ ማይራምስ በንትዳ
(ማቶ. 28:9-10፤ ማር. 16:9-11)
11 የዝን ማይራማ ይና ቦዝት ዶንተ ኤቂ ዬክተራ ዙጊ ቦዝቶ ብእዳ። 12 ቦꬅ ማኦ ማእደ ላምእ ኪታንቹንꬅ የሱሳ አህታ ዎይእደ በስተ ፈተ ኦማ ጉሮራ ፈተ ቶሄ ጉሮ በቴዝን ብእዳ። 13 ኡን ኢጎ፥ «ማችተ፥ አኮስ ዬከ?» ያጋእ ኦጭዳ።
እዛ፥ «ኡን ታ ላꬃ ኤክዳ፤ ኡን አባ ጋደዛኮ ታ ኤሮስ» ያጋይዳ።
14 ይኖ ጋይዳንፓ ሱባ፥ እዛ ሱብ ማቂ በእዘ ዎደ የሱሳ እዘ ኤቀዝን ብእዳ። የዝን ኤ የሱሳ ማቅዳኖ ኤርካያ። 15 የሱሳ ኢጎ፥ «ማችተ፥ አኮስ ዬከ? ኦና ኮየ?» ያጋእ ኦጭዳ።
ማይራማ አታክልተ ኦችዘ አስ አዝን፥ «ላꬆ፥ ነ ኤከዛኮ፥ ኤዛ አባ ጋደዛኮ ታስ ኦሆያ። ታ ኤዛ ኤኮዳ» ያጋይዳ።
16 የሱሳ ኢጎ፥ «ማይራመ» ያጋይዳ።
እዛ ኤጎ ማቅን፥ እብራይስጠ ዶናራ «ረቡኒ» ያጋይዳ። ብልꬅታን «አስታማርዛዮ» ጋኤ።
17 የሱሳ ኢጎ፥ «ታ Ꮉጋ ታ አደጎ ከዝካይዘ ግሾ ታና አይክፐ። የዝን ታ እሹንꬃናን Ꮉንግ፥ ‹ታኒ ታ አደጎን ይን አደጎ፥ ታ ጾዘጎን ይን ጾዘጎ፥ ኬሳዳ ጋይዳ› ጋእ ኡንትስ ኦሆ» ያጋይዳ።
18 ማግደላ ማይራማ ላꬃ ብእዳኖን ኢስ ኤ ኦህዳኖ Ꮉንግ ኤ ታማሩንꬅስ ኦህዳ።
የሱሳ ፋ ታማሩንꬅስ በንትዳ
(ማቶ. 28:16-20፤ ማር. 16:14-18፤ ሉቃ. 24:36-49)
19 ዎጋ ኦደ ኡጉረ፥ ኤ ታማሩንꬅ አይሁዱንꬅስ ዣሽቲ ፉርꬅቶ ጎርዲ ሺቂ በቴዝን፥ የሱሳ ይእ፥ ኡን ግዳ ኤቂ፥ «ሳሮ ይንትስ ማቀ» ያጋይዳ። 20 ይኖ ጋእ ማቂ ፋ ኩሽቶን ፋ ምልቶ ኡንታና ቤዝዳ። ኤ ታማሩንꬅ ላꬃ ብእደ ዎደ ጋማ ኡፋይትዳ። 21 የሱሳ ማህ ኡንታጎ፥ «ሳሮ ይንትስ ማቀ፤ ታ አዳይ ታና ኪትዳንጋራ ታንን ይንታና ኪቶዳ» ያጋይዳ። 22 ይኖ ጋእዳንፓ ሱባ፥ ኡንታላ ኡፍ ጋእ ፉግዳ። ማህ፥ «ጌሽ አያና ኤኮተ። 23 ይን አቶ ጋይደ አስ ናጋርታ አቶ ጋእንቶዳ። ይን አቶ ጋይካይዘ ናጋርታ አቶ ጋይንቶስ» ያጋይዳ። ማቶ. 16:19፤ 18:18
የሱሳን ቶማሳን
24 የዝን ታጶ ላምእ ታማሩንꬃፓ ፈተ፥ ዲዲሞሳ *ዲዲሞሳ ጋዘስ ብልꬅታ ዋሐ 11:16 ቦኦተ። ጋእንትዘ ቶማሳ፥ የሱሳ የእዘ ዎደ ኡንታራ ባያ። 25 ይኒ ግሾ፥ Ꮉንኮ ኤ ታማሩንꬅ ቶማሳጎ፥ «ኑኒ ላꬃ ብእዳ» ያጋይዳ።
የዝን ቶማሳ ኡንታጎ፥ «ምስማረራ ኤ ጫድንትደ ኤ ኩሽተ የዘ ቤቶ ብእካይዛራ ይና ቤቶ ታ ግልአራ ቦችካይዛራ፥ ማህ ታ ኩሽቶ ኤ ምልተ ዳኪ ብእካይዛራ አማኖስ» ያጋይዳ።
26 ኦስፉን ቃማፓ ሱባ፥ የሱሳ ታማሩንꬅ ማህ ኬꬃ ሺቂ በትዳ፤ ቶማሳን ኡንታራ የሻ። ፉርꬅታ ጎርድንቲ የዝን የሱሳ ይእ፥ ኡን ግዳ ኤቂ፥ «ሳሮ ይንትስ ማቀ» ያጋይዳ። 27 ይንፓ ሱባ፥ የሱሳ ቶማሳጎ፥ «ታ ኩሽቶ ነ ግልእትራ ቦቺ ቦኦ። ማህ ነ ኩሽቶ ታ ምልተ ዳኪ ቦኦ፤ ሶእፐ፥ አማኖ» ያጋይዳ።
28 ቶማሳ ማህ፥ «ታ ላꬃዮ፥ ታ ጾዛዮ» ያጋይዳ።
29 ዬዝን የሱሳ፥ «ነ ታና ብእደ ግሾ አማንዳ፥ የዝን ብእካይዛራ አማንዱንꬂ አንጅንትዱንꬃና» ያጋይዳ።
Ꮉይ ማጻፍዘ ቆፋ
30 የሱሳ ማጻፍተ ጻፍንትካይዘ መለ ጋማ ክሌ ባዝ ፋ ታማሩንꬅ ቲንተ ኦችዳ። 31 የዝን የሱሳ ኤ ክርስቶሳ፥ ጾዘ ናአ ማቅዛኖ ይን አማኖደ ጋራን አማኒ ኤ ሱንꬅተ ደኦ ደንጎደ ጋር Ꮉና ጻፍንትዳ።